ZECHARIAH 2 - KHYINGEI PU'TLOU Bible (BSI)

Ram Holmarkhena Rui

¹ Keine hanui kallengni mangalthutbi, keiyei mitni thrilthiyei kheenrouri, thilak, bi heitamrou napawa napung khatne aiyei hutra ram holmarkhena rui khat shinbine mayungbi klei heiwaya keine mukur.

² Heirouri keine heikngai, “Nangri kouranungeiyo?” Heirou ane keinungei loumallangbi kyun, “Jerusalem'ya holmarkhebi, heiyei homne kounak marya, heirou heiyei Dungne kounakbil shaangleiyo toubi thinanungei wamayungkura.”

³ Heirouri thilak, keikou tlou kallangkril Thangring heiwane wathukkura, heitoubi Thangring khatkhi wathukbine aya murilkur.

⁴ Heirou lamkri Thangringne khatpanungei loushun, “Khrangni wabi kartlang douwa heiwanung atoubi shunpilaklo, ‘Jerusalem'ri thimi rapne yuldakur chungachakurnei ngamrou, heirou ui-waa rapkhi chungachakurnei ngamrou, raalpal yaomakei yultlai paalkurnaksi hoirouwame.’

⁵ Kouweiyo toulanungri, Umpune atoubi shunpilei, ‘Jerusalem karhilni Keine meithlanyei raalpal khoini koolphobpirou, heitoubi heiyei rillari Keine thang'al khoini albine leipirou.’ ”

Raal Manloukur Thimi Rapya Yaiyei Ramranung Ungmallengpi

⁶ “Ho! Ho! Khalu-lhangei ram heirouwei wathukbine truklakalo,” toubi Umpune shunlei; kouweiyo toulanungri, “Nayari Keine tlaipang mshung'phali wa'tlungni karyouni chaichekkur'khoulame,” toubi Umpune shunlei.

⁷ O Babylon'ra raal manphopbi klei Zion'rei thimirap, naitamne truk'kartleibine kallengalo!

⁸ Kouweiyo toulanungri, Thangwan-Shimleiyei Pu Umpune atoubi shunlei, “Ane Keiya thang alyerkur hillouri naya maangyerkur lim rapbei doura karhane Ane Keiya yenmalhetpikur; ngamri naya marhotkur thimirap heiri manklu mitlung manuibi marhotkur thimi rapme.

⁹ Kouweiyo toulanungri, thilak, Keihut hakpani yaidoura raal daeirouhui; heitoubi, yani shok rapbei hutra himangrouwa; heirouri Thangwan-Shimleiyei Pu Umpune keiya yenmalhetpime toubi nani murouwa.

¹⁰ Hakraowei laaya shalaklo, O Zion'yei chanaorap; kouweiyo toulanungri, thilak, Keine yongbine heitoubi naihangra thrungroume,” toubi Umpune shunlei.

¹¹ Heiyei tlainirouri limrap nammane Umpunung wachangchirou; heitoubi Keiyei thimirap hoirouwa; heitoubi Keine naihangra thrungrou; heirouri Thangwan-Shimleiyei Pu Umpune Keiya nanungei yenmalhetpime touri nani murouwa.

¹² Heirou Umpune Judah'ya Aiyei khyingei ram shiruk hoiyerrou; heitoubi Jerusalem'ya yerrouwei lhangai Aiyei khukarthil khoini hanui khalthutthurou.

¹³ O tlaipang thimirap, na nammane kouhoukhi shaomakne ri leilaka; kouweiyo toulanungri, Umpune Aiyei khying bom'rouwei kanthouwura.