ZECHARIAH 11 - KHYINGEI PU'TLOU Bible (BSI)

Klah Dakur Yaorul

¹ Neiyei cheemkharya latlaklo, O Lebanon, heineri neiyei Cedar rapya meine kaangurlaksu.

² Kalletchane chapbalo, O cypress heengrap, ngamri Cedar heengtrung rapri kanellurame; kouweiyo toulanungri, ril-lhangai heengtrung rapri mangurchiyame! Kalletchane chapbalo, nari, O Bashan'yei bok'heengrap; kouweiyo toulanungri, chetkarbukkur heengyao rapri shaat'taakurchila!

³ Yaosilpu rapbei kalletchabine ungraochani chapnei houya mayekleime; ngamri yaiyei thang'alri makurame, heirou yangkong rapbei ungraochani rangnei houya mayeklei; ngamri yaiyei kallena Jordan'yei heengyao heiwari taakwurchiyame!

Yaosilpu Khintam

⁴ Dunpu, keiyei Umpune asitoubi shunlei; “Hatnungei yaorul rapya sillaklo;

⁵ yaorul pu rapne yaya hatlanungkhi koukhi lhawai lapimaklei; yaya kyor thimi rapne atoubi yunlei, ‘Umpuya mathanglei, heirou yaiyei yaosilpu rapne yaidoura koukhi kringpikhei makkuranungkhi keiri laldun hoiyurame.’

⁶ Kouweiyo toulanungri, ram heirou paalbi klei thimi rapyari Keine kringpimarou,” toubi Umpune shunlei; “Heiya thilak, thimi napung kantangya aiyei cheemlhun rapbei hutrale heirou aiyei Krungei hutra pilhakrouwa; heirouri yane ram heiyei doura raaldabi norrouwa, heirou yayari Keine yai hutrouwei kalthutpimarou.”

⁷ Heirou hatnungei marshikbi khoukur maleithung yao rapya touri klah-mrimni khoupikur yao rapya Keine silpirou; heirou Keine shungkrok khintam loumarshikpikur; shungkrok khatyari ‘Kringpikhei’ toubi Keine min thulpikur; heitoubi khatyari ‘Kantlang’ toubi Keine min thulpikur; heisi toubi Keine yaorul heiwaya silpikur.

⁸ Heirouri tangla tlun khatdei rilla Keine yaosilpu napung khyum toumaangkur; kouweiyo toulanungri, Keiyei ukningra yaya yanimaknei douchangmakur; heirou yanikhi Keiya machinknaei mithrilni thikur.

⁹ Heirouri Keine shun, “Keine naya silpimakarou, hiroukyou rapri hilakasu, heirou maangrou kyou rapri maangurlakasu; heitoubi ya khatne khatdei shamiteeya thatmairillaksu.”

¹⁰ Heirou Keine Keiyei “Kringpikhei” shungkrok heiwaya khulloubi, mtumkhni thukni khribdeekkur; heisi toubine Keine thimirap nammale mardingrilkur tlou kantom heiwaya Keine toubaikur.

¹¹ Heisi toubine heiyei tlainirou mardingrilkur heiwaya baiyerkur, heineri marhotkur yaorul heirouwei Keiya karngeibi klei hirom rapne kyuntlou heiwari Umpuei tloume toubine ningmurouwa.

¹² Heirou Keine yanungei shun, “Kounakpi naiyei mit'thrilnara lhangaime toulanungri, Keiyei churnei klahman pilaka; heiya kounakpi lhangaimakme toulanungri, koumankhi naimakne heisi leilakasu.” Heisitoubi yani keiyei churnei klahman heiwari lapathir shekel somthum holthutpikur.

¹³ Heirouri keinungei shun, “Tuyrap heiri phusa thimiyei hutra khinglhaklaklo, tuyrap heiri yani keinungei churneiman khoini matikchaei pikur tuyme.” Heisitounei Keine lapathir shekel somthum heiwaya loubine, Umpuei Pucheemra phusa thimiyei hutra khinglhakpikur.

¹⁴ Heirouri Keine ‘Kanthang’ toubi ung khintam tlung shungkrok heiwakhi mtumkhni thukni khribdeekurthu. Heisitoubi Keine Judah'le Israelyei tlakra klei teinaowei mrieya toubaikur.

¹⁵ Heirou Umpune keinung shun, “Nangne yuntlungmak yaosilpu khatdei hutsu rapya neinungei hanui loulak.

¹⁶ Kouweiyo toulanungri, thilak, Keine ram arouwei yaosilpu khat kathukyerrouwa; a heiri himangrou kyou yao rapyakhi lhou hoipimakrou, rochekkur yaoshun rapyakhi thikulpimakrou; kna rapyakhi buldampimakrou; msul-yuikhat rapyakhi namh pishaimakrou; heiya marnamkur yaoshun rapya Ane hatmailourou; heitoubi yaiyei hut-hokhi umdeekrou.

¹⁷ Heirou yaorul rapya horkhouwurbi trukkur karshukmak yaosilpu heinungeiri kounakei lah'kna shakrung hoikurrawo! Heinaksi yaosilpu heiyei doura, heirou aiyei thyarei mitlungra raalshon'ne klah dayerlakasu; heisitoubi aiyei hutbang mringsundalaksu, heirou aiyei mitlungkhi deolakasu.”