ZECHARIAH 1 - KHYINGEI PU'TLOU Bible (BSI)

Umpu ne Israelya Ukning Hungnanungei Ungpikur

¹ Darius'yei Krungchaan kum-khni hungtlungle, tlunchot tlung tanglarou, Iddo'yei cha napawa Berechiah'yei chanapawa, Thimkhui Zechariah'nung Umpuei tloulhangni yongbi asitoubi shunkur:

² “Umpune nai nutar-patar rapbei doura beimak malungkhakhou.

³ Ngam heineri nangne yanungei shunlaka, ‘Thangwan-Shimleiyei Pu Umpune atoubi shunlei touri nani Keinungei kallenglhaklak, heiyanungri Keinekhi nanungei kallenglhakpirou,’ toubi Thangwan-Shimleiyei Pu Umpune paothutlei.

⁴ Nari naiyei nutar-patar rapnaksine toumak, bongei waiyoubi Thimkhui rapne yanungei atoubi shunthutpikhou, ‘Thangwan-Shimleiyei Pu Umpune atoubi shunlei, touri nani asinungri naiyei chimmakna lam'rouwei mai khreithutbine, naiyei lhangaimak lhourouwei nani kallekthutlak.’ Heiya yaneri Keiyei shunya ninglhakhoumaklei,” toubi Umpune shunlei.

⁵ “Asinungri naiyei nutar-patar raple Thimkhui rapri kourangachiawo? Heirou yarap heiri hi naimakne ringleihuiko?

⁶ Heiya Keiyei shikrui Thimkhui rapya shunthutyerkur Keiyei tloulhangrap, heirou Chaylam rapya naiyei nutar-patar rapne chanthungmaknei ngamrou yaidoura klah-knang dawurkhou. Heirouri yani ukning hungbine kyun, ‘Thangwan-Shimleiyei Pu Umpune kaiyei touwurkhou lhourap hilthungni kaya klahra dayerrouwa toubine toupikur lhouroume.’ ”

Thimkhuini Sapuklha Rapya Kar'anbi Kmu

⁷ Darius'yei Krungchaan kum'khniyei, tangla tlun chiple khat, touri Shebat tanglayei, tlaini somnile phalinirou Iddo'yei chanapawa Berechiahyei chanapawa, Thimkhuiwa Zechariah'nung Umpuei tloulhang yongbine atoubi shunkur:

⁸ Masanung keine thiyei kheenrouri, thimi khatne sapuk mrao khat tungbine, phaitlaiyei heengyao hangra mayungbine klei heiwaya mulhakkur; heitoubi aiyei hillani sapuk mrao khatkhi, mrao-bungrang khatkhi, heirou khngoukhi mayungbine heiklei.

⁹ Heirouri keine heikngai, “O keiyei Upawa, heirapri kounungeiyo? Heirou keikou tlou kallangkril Thangring heiwane keinungei loushun, ‘Sapukrap heiri kounungeiyo touri Keine neinungei mutpirou.’

¹⁰ Heirouri heengyao hangra mayungbi klei thimi heiwane loumallangbine atoubi kyun, ‘Sapukrap heiri tlaipangpal karyouni karwaichabine yilthinanungei toubi yaya yenmalhetkura.’

¹¹ Heirouri yani heengyao hangrei mayungbi klei Umpuei Thangring heiwanung mallangbi loushun, ‘Kane tlaipang karyouni kyongle-kale karwaichabine yilthiwurla, heirouri thilak, tlaipangpal namma kyingni, ri daini mathrilbi leiwurchiya.’ ”

¹² Heirouri Umpuei Thangringne loumallangbi kyun, “O Thangwan-Shimleiyei Pu Umpu, Nangne Jerusalemei doura, heirou Judah'yei khukarthil rapbei doura yenralkur kum somret malungkhawurna douroukhi kounak tlani yaidoura kringpimakne leiheirouwo?”

¹³ Heirou Umpune keikou tlou kallangrilkur Thangring heiwanungei lhangaiyei tlouni heirou malung damyernei tlou rapne loushunpikur.

¹⁴ Heisitoubine keikou tlou kallangrilkur Thangringne keinungei loushunpi: “Nangne ungraochane shunthutpilak, Thangwan-Shimleiyei Pu Umpune atoubi shunlei, Keine Jerusalem'ya, heirou Zion'ya tanghakpani malungshipi.

¹⁵ Heiya limdei rapne kying-nungkngaiyei klei heiwaya Keiri beimakne malungkhapilei; ngamri Keine beicha malungkhabi leiyeinung yani Keiyei thimi rapya heisi marhotpi.

¹⁶ Heingammei Umpune atoubi shunlei, ‘Keine Jerusalem'ya kringpile kalhonne yenkallenglei, heiyei rilla Keiyei Cheemri hanui kallengni sabaangthurou, heitoubi Jerusalemei doura ram holmarkhena ruini thikyengbine taangmarkherouwa.’ ”

¹⁷ Hanuikhi ungraochani paothutpithulak, “Thangwan-Shimleiyei Pu Umpune atoubi shunlei, Keiyei khukarthil rapri tangbaang-choubaangeirou; heitoubi Umpune Zion'ya malung damyerpithurou; heirou Jerusalem'ya hanui kallengni khalthutpithurou.”

Halchee Kar'ankmu

¹⁸ Heirouri keimitni mangalthutbi thiyei kheenrouri, thilak, halchee phalitam kar'anbine mukur.

¹⁹ Heirouri keikou tlou kallangkril Thangringnung keine heikngai, “Heirapri kou tounanungeiyo?” Heirouri ane keinungei loushunpi, “Heirapri Judah'ya, Israelya heirou Jerusalem'ya khotbaiwurbi hulchekkur halchee rapme.”

²⁰ Heirouri Umpune keinungei hutshakhei tlangsha napung phalikhi mutpithu.

²¹ Heirouri Keine loukngai, “Yarap heiri koutourou wathukko?” Heirou ane loushunpi, “Halchee rapne Judah'ya khotchekyei kaalnung thimi hukhatnekhi yailu mangalthut manikhoumak, heiya yayari tlangsha rapne maniwurbi, heitoubi lim deirap touri Gentile rapne Judah'yei ramra chee mangalchabi khotchekwurkhou heiwaya namsundanungei wathukurame.”