TITUS 3 - KHYINGEI PU'TLOU Bible (BSI)

¹ Lhou'ur, laa'ur thimi rapbei bomra heirou upa rapbei bomrakhi pilhakurle kalhonne lhoulam kantangrou shunya kningne lhangaiya touyernanungei neiyei thimi rapya ningthutyerlak.

² Thimi hukhatdei dourakhi yayari lhangaimak tlou yunyermak, heiya thimi kantangnung kyingne heirou karyalkril hoinanungei kheenserou ukning khnimni heirou marnimni mutrilyernanungei touyerlak.

³ Ngamri bongnungri kane muheikhoumak, kyun chanthungmak thimirap, heirou klallei lhoutou thimirap hoikhou. Heitoubi lhoubom kantangrou sharungei kningyatom pilyerna'nungei heirou hakrao-nungkngai heiyatom chanchakhoubi shok khoine leikhou. Kai chaanrou ngaal'ok thukril, khatle-khat karkhalril, horthiril, heirou kaya machin thimi rapya kanekhi machinkhou.

⁴ Heiya kaya Kalpipu, Dunpuei kringpikhei heirou malungshipi khei heiya mutpikur heirouri,

⁵ Ane kaya kalpiwurla. Ari kane lhangai lhouya touwurnei ngamrou kaya kalpikurri nimak, heiya Aitamei kringpi'khei heiyei ngamni Lhawai Khyingne kaya chaamthaiwurpibi rannei chaanra kallengni pukyerwurnei ngammei kaya Ane kalpikur.

⁶ Dunpune kaya Kalpipu Jesu Christaei ngamni kaidoura Lhawai Khyingya marthumni shungsundapiwurla.

⁷ Heitounei ngammei Aiyei kringpi'khei heine kayari Dunpuei bomra chimyerpirou heirou Ane malungamni ningchabi klei klui naimak chaanya phaheirou.

⁸ Kyun ari chimhakme: Lhoubomrap heiya lilkhoine keine neiya chetne churphopbi leiyerkni, heiyanungri Dunpuya uklumbi klei thimi rapne yai'msha-yaitamni lhangaiyei lhouya touyeinung, thimi kantangnung tungcha'nungei heirou lhangaina'nungei mukheine lhou tourou.

⁹ Heiya mutlungmakei tlou yitkril, nutar-patar rapbei minlam rapya, ngaal'ok thukril heirou Tloulamyei ngamrou karkhalrilnei tlou rapya lakurkhoulak. Heinaksi tlourap heiri koukhi karsukmak, heirou man naimakei tlourap.

¹⁰ Heitoubi thimi rapya lhang-lhang dayerbi klei thimi heiyari hanuidik, nimanung khnui tlungne shunthilak, heirou ani chanthungmaka'nungri, heiya duinarari akou koulhou khatkhi churmalnamaka.

¹¹ Heitoubi nane heinaksi thimi heiyari lhangaimak borhyei lhou touwurnei ai'msha-aitamne lalkyer thimime toubi mulaka.

Luilhakna Khoiyei Shunmatupi

¹² Keine Artemas nimanung Tychicus'ya neileinara heiyilyeinung, nangne khrangne toubi Nicopolisra keiyei leinara wananungei toulak, koungameiyo toulanungri, keine phalbinung bi heirou leinanungei toubi marshikkurla.

¹³ Heitoubi Picharpu Zenas'le Apollos yakhuntayei ram chananungei changbomthuk koukou kwatsam klei-makya nangne thikulpithunglak.

¹⁴ Kaiyei thimi rapne kouroukhi karyimkur toumakni, yai chaanya leemni mangyermakni, kheenserou changbomthuk nammaya phayer maninanungei, lhangaiyei lhouya toubi leinanungei marnolaksu.

¹⁵ Keikou leimalkna thimirap namyerwani nanungei karyemnei tlou bethunglei. Heitoubi kaiyei karyemnei tlou rapya nakou leimalkna uklum thimirap namma'nungkhi loushunpilaklo. Dunpuei kringpikhei heiri na namyerei doura leipiniyasu!