SOLOMONYEI LAA 4 - KHYINGEI PU'TLOU Bible (BSI)

Solomonei Malungshiya Yunthut

¹ Keiyei malungshiwi mannei, nangri kounakei lhangai-karyuikna! Nangri kounakei malungshi'kna! Maikhum-lingkhang phiyei kallera klei neiyei mitlung khintam heiri kounakei karyuikna! Neiyei shamphon heiri Gilead Lhungdourei yun-yun yongchum tlangrul naksilei!

² Neiyei ha rapri khmul ngoumathaitir yaorul rapne hak choumathainarei kathuknaksine yeryer allei. Yarap nammani yaoshun khatchatomkhi rulmakni, kanfirthil pukthutlei.

³ Neiyei murkhor rapri phaikhring mrao naksilei, heirou neiyei murpal rapkhi malungshinalei. Neiyei maikhumphi rilla klei neiyei maibung rapkhi poheilhang naksine lhangailei.

⁴ Neiyei ngakhung heiri thlungtum marpeibi shabangkur David'yei raaldaang naksilei; heiyei rilla raallui rapbei chung rapya yarbaangbi lhangaine mansambi khoukur naksilei.

⁵ Neiyei nubom khintam heiri kounakei lhangai-karyuikna; heirapri sholeng-paryao hangra rchaoshun khintam kanthrinni namh chakshaibi klei naksilei.

⁶ Ningshun kulkayei kying marthee thibongyen, heirou kmeh masayei lhimni kanchaibi trimbongyen, myrrh mrohle frankincense mrohyei khrimni bil thimkur Lhungdoura kakabi keiyei kanwang solungei malungshiya kanthrambi leiyeise!

⁷ Keiyei malungshiwi mannei nangri yerrouwei lhangai-karyuinalei. Neirouwei kwat touri koukhatkhi maklei.

⁸ Lebanon Lhungdourei wathukalo keiyei manneiwi, Lebanon lhungdourei nangni keikou kalhonne chalakase. Yangkong rapbei khur leina bi heirou keiyangla rapbei khur leina bi Amana'le, Senir heirou Hermon lhunglim raprouwei yongchummase.

⁹ Kei solungei malungshiwi mannei, keicharwi, neiyei mit'thril khatcharou keiyei solungya mulouheilame; heirou neiyei ngakhungrei khrullung rapbei kar'alkur heiwani keiyei solungya kanwangyerwurlame!

¹⁰ Kei solungei malungshiwi mannei, neiyei malungshi heiri kounakei lhangai-karyuinalei keicharwi! Neiyei malungshi heiri tulningyakhi duini shimlei. Heirou neiyei malungshiei shirek khrim heiwari mrohkun limlimyei khrimyakhi duini malungshinalei!

¹¹ Neiyei murkhor'rouwei khuining yongdalei keimannei. Neiyei malei daakra khuiningle nuyui heikungthutlei. Heirou neiyei phirul-phishambmei khrim muiknam heiwari Lebanon'rei mroh khrim muiknam naksilei.

¹² Kei solungei mannei nangri pal shakoolbine hang rotphopkur yekulnaksi, heirou halpal shakoolkur yuiphumnaksi, keicharwi!

¹³ Neiyei rung lhangairi pohei trung naksine kounakei karyuiknani lhangai; heirou hutlha-hei lhangaile Nard mroh trungle Henna parbom naksine khrim muinamlei.

¹⁴ Nard mroh'le, saffron mroh'le, Calamus mroh'le heirou schairungkhor'le, frankincense mroh trung limlim'le, heirou myrrh'le, aloe, heirou yerrouwei lhangai manklu mroh trung limlim'le kalhonne bil thimni pukbi klei naksilei.

¹⁵ Keimannei nangri yekul tlailamrei heiputthutbi klei yuiputnaksilei; heirou tuysirrei yuiphum naksilei. Heirou Lebanonrei yenkungsunda tuysir naksilei!

¹⁶ Kanthouwalo, O khalu lhangrei marthee, heirou khate lhangrei marthee, katthilakalo! Heitoubi keiyei yekulrei parkhrim muiknamya katshathutlaklo, heitoubi heiyei parkhrim heiri tlatnarakhi karyoulaksu! Keiyei manneini aiyei yekul rilla hungchanglaksu, heitoubi aiyei madu hei rapya lachalaksu!