SOLOMONYEI LAA 1 - KHYINGEI PU'TLOU Bible (BSI)

Shulammia Nyul Khatle Jerusalemrei Chanapuiya Rul

¹ Arapri Solomonyei Laa rapbei Laa:

² “Neiyei machuppi heine keiya machuppilaklo! Kouweiyo toulanungri, neiyei malungshipi heiwari darkha yuiyakhi duini lhangai!

³ Neiyei shirekri khrim muinamlei, heirou neiyei minkhi fleithutkur khrim muiknam shirek naksilei. Heingammei nangaka rapne neiya malungshi.

⁴ Keiya ruipilaklo, khnotne neihilla chanthungeise. Keiyari Krungni aiyei rkhum bomthora ruilhakpilaklo! Kasiri haoklumni leimalnabi nungwaiyurase. Neiyei malungshipi heiri tulyakhi duine kanyerpiyeise; tanghakpani nangaka rapne neiya malungshikuri ngaknungei bom nimakme.

⁵ Jerusalemrei cha nyulrap, keiri msha monganungkhi karyuiknani lhangai. Kedaryei khuiluphi cheemnakni, heirou Solomonei yarkhalna phiyengnakne monglei.

⁶ Mongurnei ngamrou keiyari thimanthrampimaklo! Kouweiyo toulanungri, nungshani keiya phoukaangkurme, kai nuwiyei chanapawa rapne keiyari beimakne malungkhapime; heingammei yani keiyari darkha yekul rapya thikulyerkura. Heiya keiri keimshaei yekulyari thikulmakni leikurame.

⁷ O keiyei solungei Lhouyang, Neiyei yaorul rapya bi koutamrou silbi leileiyo? Keinungei shunpilaklo! Yayari nangni nunghangei kheenrouni bi koutamrou khoubine rehyerleiyo? Kouya tounei keiyari neipalui rapbei yaorul hangra karwaichayerbi leiyerkurawo?”

Malungshi Lhouyang Solomon'ne Loukyun

⁸ “O yerrouwei lhangaidui Reidangwi, kounakpi nangni neitam muheimakanungri, yaorul rapbei hochunra heichanthungbine, heitoubi neiyei yaoshun rapya yaosil puei khuiluphi cheem pongra hullhakbine sillaklo.

⁹ Keiyei Reidangwi, keinungeiri nangri Pharaohyei sapuk kaari hangrei sapuk kalla naksilei.

¹⁰ Neiyei maibung rapkhi sina reiparle chumchum mankhaibi karyuinalei, heirou neiyei ngakhungkhi khrul-lung rapne yilyil yitbi kansamkuri kounakne lhangailei.

¹¹ Kanekhi neinungei sina khrulle, kulshankhi ringbine mansambangpirou.”

¹² “Krungni aiyei rkhum doura leiyeinung, keiyei Nard shirekni khrim muinamkyer.

¹³ Keiyei malungshiwa Lhouyangri keiyei malungpak tlakra dalhakbi masantan leikur myrrh shirek koknaksi.

¹⁴ Keiyei malungshiwa Lhouyangri En-Gedi yekulrei marmui-chimchim parbi klei Henna parbomnaksi.

¹⁵ Keiyei malungshiwi Reidang, kounakei karyuiknaei lhangai nangri! Neiyei mitlung rapri ram-mathruei mitlungnaksine kounakei karyuikna!

¹⁶ Keiyei Lhouyang, kounakei thang lhangailei nangri! Heirou kounakei karyuikna nangri! Karukhniyei rkhumri heengbo mar'em naksine karyuiknani lhangailei!

¹⁷ Kai cheemri Cedar heengni shutlai yungchei khoine bunbangurlei, heirou heengpik rapkhi mnou heengpikdiklei.”