RUTH 4 - KHYINGEI PU'TLOU Bible (BSI)

Boaz'ne Ruth'ya Nu Khoini Klou

¹ Heirouri Boaz'ne khukarthillei palshungra wathukbi bi heirou wa'omkur; heirouri thilak, Boaz'ne wari yunnarei mintlangkur, karnakril shullamrei napawa heiwari aiyei pongra yenraalkur loukmu. Heisi tounarouri ane lou'ungbine kyun, “Ara wachangbi omriyalo, keipalui.” Heisi tounarouri ane bi heirou wachangbine omkur.

² Heirou Boaz'ne khukarthilrei yama uparap thimi napungchip unglouheibine shun, “Bi arou yuk'omriyalo.” Heisi tounarou yane omkur.

³ Heirouri Boaz'ne karnakril cheem lukbomthuk napawa heiwanung shun, “Moab ramrei yenkallengkur Naomi'ne kaiyei teinaowa Alimelech'yei cheem-kei harkhat yorroume toulei.

⁴ Heitounei ngamrou, keine neinungei heiyei tloubomya yunpinilei touri, ‘Nangne cheem-kei heiwaya, bi arou ombi klei keiyei thimi yama upa rapbei maibongra lolaklo. Kounakpi nangne cheem-kei heiwaya khumrou toulanungri khumlaka, heiya kounakpi khummakroume toulanungri, keinungei yunpilak, touri keikhi thiyeise,’ kouweiyo toulanungri, cheem-kei heiwaya khumrou thimiri nang nimakanugri dei hukhatkhi maklei; heirou neiyei ngamthangrei khubomthuk thimiri kei leilei.” Heisi tounarouri, “Heiyanungri keine khummeise” toubi ane loukyun.

⁵ Heirouri Boaz'ne kyun, “Nangni Naomi'yei cheem-keiya khumloukur tlainirou shal hikur Moabei nyul trulmeiwi Ruth'yakhi lourou dalei; heitoubi aiyei shullamya mitmaknungei yu-cha raanyerrou da.”

⁶ Heirouri shullam karnakril napawa heiwane loukyun, “Heiya hoiyanungri keiri khumchangmakrou, nimanungri keiyei shullamri mitkur kya. Heineri neinungei khoine nangne khumlaka; heirou keiyei lukbomthuk heiwaya neiyei khoine loulaka; kouweiyo toulanungri, keine heiwaya lukchangmakrou.”

⁷ Bongei chaanrouri Israel rapbei hangra kounakpi cheem-kei khumyeinung, nimanung kounaksi putchei kartlengrilyeinang, kulyomyei youkna lammitri atoubi klei: Lukbomthuk napawa heiwane manimakanungri, aiyei khorkhang lhukthutbine, heitoubi manirou napawa heiwanungei malanpirou; heisi toubine Israel rapne pichar luilhaknei tloumayung* hoirou.

⁸ Heisi toubine karnakril shullamrei napawa heiwani, “Neinungei khoini lolaka” toubi Boaz'nung shun. Heisitoubi ane aiyei khorkhangya lhukthutbi Boaz'nung malanpikur.

⁹ Heirouri Boaz'ne yama upa raple heirou thimirap nammanung paothutbi shun, “Angtu tlainirou keine Naomi'yei hutrei Alimelech'yei cheem-kei nammale heirou Chilion'le, Mahlon'yei cheem-kei nammakhi lowurlame touri nane tloumayung hoiyura.

¹⁰ Heiyakhi duinara, Mahlon'yei lakkurkhou trulmeiwi, Moabei nyul Ruth'ya keiyei nu khoine loulhakurlame, heitoubi aiyei hikur shalwaei shullamrei yu-cha raanyerbi, heirou hikur thimiyei minya aiyei teinao rapbei hangrouwei nimanung aiyei cheemkhur bommai'rouei mitmaknungei aiyei cheem-keiya khumwurla. Angturi heiyei tloumayungri nane hoikur awariya.”

¹¹ Heirouri khulbung kartilna bi yuntlangmai heirou kartilkur thimirap nammale yama uparap nammane kyun, “Kane tloumayung hoiyurame. Neiyei cheemra wachangkur napuiya heiwiya, Umpune Rachel'le Leah'ya Israellei cheemkhur sheembaangyerkur heinaksine, ayakhi phor pilaksu; heitoubi Ephrathah'ra dun thimi khat khoine, heirou Bethlehem'ra mincha thimi khat hoiniyasu.

¹² Heiyakhi duinara, Tamar'ne Judah'nungei Perez'ya pukbine, aiyei bommaiya phor phayerkur heinaksine, Ruth'yei ngamne Umpune neinungei yu-charap marthumne pukyerpilaksu.”

¹³ Heisitoubi Boaz'ne Ruth'ya loulhakbini, aiyei nu khoine paalkur; heirouri ane Ruth'le rkhum tilrilkur. Heirouri Umpune Ruth'ya nao uryerwurbi, heitoubi ane chanapawa khat pukkur.

¹⁴ Heirouri napuiya rapne Naomi'nung shun, “Angtu neiya khumpinungei teinao makne horkhoupimakur Umpuya choune mathang hoiniyasu; heitoubi Israel rapbei hangra Aiyei min duine chalaksu!

¹⁵ Heirou a heiwari neiyei chaanya lhukthutpi thimi khat hoiniyasu, heirou neichaanrou yentarphane nungkngaine thikulbi yukpi thimi khatkhi hoiniyasu; kouweiyo toulanungri, chanapawa napung'eniyei malungshiya duini malungshipikur nei'mou Ruth'ne neinungei anaksi chanapawa khat pukpiwurlame.”

David'yei Shullam Yenraanna

¹⁶ Heirouri Naomi'ne cha heichaya khaangloubine heitoubi aiyei pheikhnang doura phneibi naorui khoine pomtangkur.

¹⁷ Heirou cheemlhunyei napuiya rapne aiyei min thulbaangpibi kyun, “Naomi'nungei chanapawa khat pukpiwurla!” Heisitoubi yane aiyei min ‘Obed’ toubine thulbi ungkur. A heiwari David'ya pukkhou Jesse'yei pa.

¹⁸ Asinungri Perez'yei shullamya asitoubine yenrankur: Perez'nung Hezron pukkhou;

¹⁹ heirou Hezron'nung Ram pukkhou, heirou Ram'nung Amminadab pukkhou;

²⁰ heirou Amminadab'nung Nashon pukkhou, heirou Nashon'nung Salmon pukkhou;

²¹ heirou Salmon'nung Boaz pukkhou; heirou Boaz'nung Obed pukkhou;

²² heirou Obed'nung Jesse pukkhou; heirou Jesse'nung David pukkhou.