RUTH 2 - KHYINGEI PU'TLOU Bible (BSI)

Ruth'ne Boaz'yei Phailoura Chakao Khulphakur

¹ Kheen heirouri Naomi'yei shal Alimelech'yei shullam teinao thukril, beimakni dun thimi, aiyei minri Boaz toubine ung napawa khat leikhou.

² Heirou Moabei nyul, Ruthni Naomi'nung shunchakur, “Thimi hukounak khatni keiya kringpibi aiyei lourei dathungkur chakao rapya khulyerleikouei, keiya miyei louyaora bei chayerpilaklo.” Heisi tounarouri Naomi'ne Ruth'ya loushun, “Keimouwi, chawalo.”

³ Heisitoubi ane chawurbine, phailoura cha-aat thimi rapbei hilla chakaorap heikhulthungkur; heirouri anungei likarsui lhangai'nakrimni, tinrimrim ane Alimelech'yei cheemkhur teinaothuk Boaz'yei phailoura wachangkur.

⁴ Kheen heirouri thilak, Boaz'ne Bethlehem'rei wabine, cha-aat thimi rapnung washunkur, “Umpune naya kalhonpilaksu.” Heirouri yane anungei loushun, “Umpune neiya phor pilaksu.”

⁵ Heirouri Boaz'ne aiyei trunluk thimi rapbei doura thikulpi shoknungei heikngai, “Napuinu douwa heiwiri huinuwo?”

⁶ Heirouri cha-aat thimi rapya thikulpi shokpane loumallangbi anung loukyun, “Napuinu douwa heiwiri Naomi'le kalhonni Moab ramrei yenkallengkur Moabei nyul khatme.

⁷ Heirou Ruth'ne keinungei shunbi, ‘Kringpibi keiya cha-aat thimi rapbei hilla chanthungyerbi, cha'sphal rapbei hangrei dathungkur chakao rapya khulyerpilaklo,’ toubine buchakur. Heisitoubi ane tui'ningshun waiyoubine asilumpha chakao rapya khulphabine kleime; kheen aroutom ane lepcha loumatru rilla ombine karngahuime.”

⁸ Heisi tounarouri Boaz'ne Ruth'ya shun, “Keimouwi, keiyei shunya ukningra tloukhoine louninglhaklak, keiyei louya raalwurkhoubi, thimi deiyei phailoura chakao khullou chawurmaka; heiya keiyei phailoura, keiyei shok-napuiya rapbei hangra chanthungbine chakao heikhulthunglaklo.

⁹ Neiyei mithril heiri loutlaira thibini, cha-aat thimi rapbei hilla chanthungbi heitoubi chakao rapya heikhulthunglak. Heirou shok rapne neiya daimarekmaknung keine yaya chay piwurkhoula. Nangne yui hatdanungkhi, shok rapbei mongnungei shukbi khouna yuikhangra hungchangbi yuikhi shormonglak.”

¹⁰ Heirouri Ruth'ne khuklu kanthrunchane thleira aiyei mai shikhuplhakbine anung kyun, “Miram-mithrillei thimi keinaksi khatya shak mupibi, neiyei keiya kringpikur awaya koutouneiyo?”

¹¹ Heirou Boaz'ne loumallangbi aya shun, “Neishal hiwurhillou nangne neiyei neeninungei toupikur lhangai lhou rapbei pao namma heiri keine mayekurla, heitoubi nangne koutoubi neiyei pui-paya heirou neiya pukna ramya lakkurkhoubine, bongnung tekkhi mukhoumak thimi rapbei hangra nangne koutoubi wachangkurro tounei warikhi keine namma mayekurla.

¹² Neiyei toupikur lhangai lhou heinung'tlim Umpune neinungei mallengpilaksu; heitoubi Aiyei kallera yulnanungei wachangkur Israel rapbei Dunpune neiya kwatsam naimakne neinungei klah-man pilaksu.”

¹³ Heirouri Ruth'ne loumallangkur, “Keine neiyei kringpi'kheiya phawurlame, keiyei upawa; kouweiyo toulanungri, neiyei shok-napuiya deirap'naksi nimanungkhi, neiyei shok puiyawi keiyari kringpi kheiyei tloulhangya yunpibi nangne keiyei solungya malung damyerwurlame.”

¹⁴ Heirouri chaktham chalumnungri Boaz'ne Ruthya shun, “Chaktham chayei kheenrou cheemwaira keipongra hungchangbi, mumtol loubini darkha yuira lupdokbini shailaklo.” Heisi toubine Ruth'ne cha-aat thimi rapbei pongra omkalhonbini chamaikur; kheen heirou Boaz'ne Ruth'nungei mumtol ranya khaipikur; heirouri ani ukthoni shailoukur, heirou thakhi shaichichangmakni maleikur.

¹⁵ Heirou Ruth'ne chakao khulpharou marshikyei kheenrou, Boaz'ne aiyei shok rapnung chay piwurbi shun, “Cha'sphal rapbei hangra ramphani ane chakao khulphalaksu, ayari nani loushunnung yamakrou.

¹⁶ Heitoubi nane chahuirap thakhi chamcheni thaitatbi loutousunda'khoupilak, heiyanungri ane heikhul'thunglaksu, nani aya lousampimak.”

¹⁷ Heisitoubi ane phailou heirouwei rawaiphani chahui khulphakur. Heitoubi aiyei khulmarkumkur chakao rapya ani tatchunkur, heisitoubi cha heiwari ephah phakur.

¹⁸ Heirouri ane heiwaya thungbaangloubi, heitoubi khukarthilla kallengkur, heirouri aiyei niniwi Naomi'ne aiyei yenkhulphakur heiwaya loumukur. Heirouri ani ukthoni shailoukur hillou shaimaleibi yumlhakkur mumtol rapkhi aiyei neeniwinungei louthutbini pishaikur.

¹⁹ Heirouri aiyei neeniwine anungei loukngai, “Angturi nangni huilourei chakao khulphakuro? Heirou koura lhou pangkuro? Neiya shak mupibi lhangaine loutoupikur loupuwa heiri likarsui lhangai thimi hoiniyasu.” Heisi tounarouri Ruth'ne aiyei niniwinung, ane hukou lhou paangmalnakuro tounei tlouya hungyunpikur. Heirou ane kyun, “Angturi keikou lhou paangmalnakur napawaei minri Boaz toubi ungme.”

²⁰ Heirou Naomi'ne aiyei mouwinung loukyun, “Khring thimiyakhi heirou khi thimiyakhi kringpikhei thimi heiyari Umpune phor pilaksu.” Heirou Naomi'ne hanuikhi Ruth'nung yunpikur, “Napawa heiwari kaiyei karnakril thimime, a heiwari kaiyei shullamrei thimime.”

²¹ Heirouri Moabei nyul Ruth'ne yenyunpithu, “Heiyakhi duinara, ane keiya, ‘Nangri keiyei shok-napuiya rapbei pongra keiyei trunwai lukchibongyen yaothunglaklo,’ toubi shunme.”

²² Heirou Naomi'ne aiyei mouwi Ruth'ya shun, “Thimi deirapne deiyei phailoura neiya daimarek'maknungei, nangni aiyei shok-napuiya rapkou chabine lhou paangkurne duine lhangairoume, keimouwi.”

²³ Heisi toubi Ruth'ne chanal'le gehu trun lukchibongyen, Boaz'yei shokpuiya rapbei pongra karnakrilbi chakao khulphabine lhou churkur. Heitoubi ane aiyei neenikou paalkur.