RUTH 1 - KHYINGEI PU'TLOU Bible (BSI)

Judah'yei Ramra Butaamkur

¹ Kheen heirouri asitoubine hungthukura, Picharpu rapni ruibi palyei kheenrou yairam heirouri karyouni butaam thukkura. Heitoubi heiyei kheenrou Judah'yei Bethlehem'rei napawa khatni ale, aiyei nule heirou chanapawa napung'khniya ruibine, Moabei ramra ramtaangbi paalnanungei wakur.

² Napawa heiyei minri Elimelech toubine ungkhou, heirou aiyei nuyei minri Naomi toubine ung, heirou aiyei chanapawa napung'khniyei min rapri Mahlon heirou Chilion toubine ung. Yarap heiri Judah'yei Bethlehem'ra klei Ephrathia'rei thimirap. Asinungri yane Moabei ramra wachangbine paalkur.

³ Heirouri Elimelech, Naomi'yei shal heiri ram heirou leiyei kaalnang hiyura, heisitoubi Naomi'le, aiyei chanapawa napung'khniya lakkurkhou.

⁴ Heirouri yane Moabei cha'nyul rapya nu khoini loukur; heirou napuiya khatpiyei minri Orpah toubine ung, heirou khatpiyei minri Ruth toubine ung. Heisitoubi yane bi heirou kum chipbeimal paalkur.

⁵ Heirouri kum beileibi Mahlon'le Chilion yakhu teinaokhi hiwurthua; heisitoubi Naomi'ne aiyei chanapawa napung'khnile aiyei shalne hiwurnei ngamrou beimak klah'mrimni khi-kanrilwurkhou.

Judahra Yenkallengkur

⁶ Heirouri Naomi'ne kanthoubi aiyei mourap napung'khnile kalhonne Moab ram'rouwei kallengnanungei marshikkur; kouweiyo toulanungri, ane Moabei ramra leiyei kaalnang, aiyei thimi rapya Umpune trunwai marthumni lukyerwurlame tounei paori ane mayekkur.

⁷ Heisitoubi ane aiyei mouwirap napung'khnile kalhonni aiyei leikhouna ramya lakurkhoubine shaalkur; heitoubi Judah'yei ramranung kallengkur.

⁸ Heirouri Naomi'ne aiyei mouwirap napung'khninung shunkur, “Nakhuntari shaalbi, neinei pui-payei cheemra kallengalo. Nakhuntane khi rapnungle heirou keinungkhi lhangaine watlhou toupiwurkhou heinaksine, Umpune nakhuntanungeikhi lhangaine toupilaksu.

⁹ Heirou Umpune kringpibi nakhuntarekne shal khatsol raphabini heitoubi ai'aiyei shalwa rapbei cheemra malung'khrahne paallaklo.” Heisitoubi ane yaya machuppikur. Heirouri yane hou choune ungraobi, malungdoune chapkur.

¹⁰ Heirou yane Naomi'nung loukyun, “Kakhuntari shaalmakrou, heiya kakhi neihilla chanthungbi, nei thimi rapbei leinara shaalloume.”

¹¹ Heiya Naomine shun, “Keiyei mouwirap, neipui-neipayei cheemra kallengalo; nane koutoubi keikou kalhonne charouwo? Naiyei shal hoinanungei keiyei ukwaira chanapawa pomnungei leiheirouhuiko?

¹² Keiyei mouwirap, kallengbi shaallaka; kouweiyo toulanungri, keiri shal dunthuweise toulanungkhi tarachakura; kounakpi keine shal dunroume toubi ningchabinekhi, angtu masahak miyei napawa khatkou phitho iptilbine, keicha napawarap pukbi pomlanungkhi;

¹³ heirou yane kartlang phani kattang heiwaya nane ngaakchangrouko? Heinungei'tlim nane shal dunmakni dongurouko? Nimakme, heisi toumaklo, keiyei mouwirap! Kouweiyo toulanungri, naiyei ngamnung'tlim yuk'khalsun'dalanungri keiyei solungri duiduine kaangura, ngamri Umpuei hutri keiya karhane khreithutdurla.”

Ruth'yei Malungamkna Tloumayung

¹⁴ Heirouri yani hanuikhi hou chouni ungraobini chapburthu, heitoubi Orpah'ne aiyei neeniwiya machupkhoubi shaalkur; heiya Ruth'neri Naomi'ya krakni churphopbi marapbine leikur.

¹⁵ Heirouri Naomi'ne shun, “Thilak, neiyei'tei Orpah'ri aithimi rapbei leinara heirou aiyei thrai rapnung kallengurame; nangkhi aihilla chanthungbi shaallakalo.”

¹⁶ Heiya Ruth'ne loukyun, “Keiyari neihilla chanthungnarei lakkurkhoubi shaallalo toubine shunpimaklo; kouweiyo toulanungri, neiyei chanara keikhi charou, neiyei chaknara keikhi chakrou, neiyei thimirap heiri keiyeikhi hoirou, heirou neiyei Dunpu heikhi keiyei Dunpu hoiroume.

¹⁷ Neiyei hina bira keikhi hirou, heitoubi neiya khi'ruina bira keiyakhi ruiyerrou. Kounakpi khi heine kakhuntaya toukarkhaibongyen, Umpune heisibil toupilaksu, nimanung heiyakhi duine hoiyerlaksu.”

¹⁸ Heirou Naomi'ne, Ruth'ne aya chanthungroume toubi ukningra krakne mayungkur heiwaya muwurnarouri, anieRuth'yari shaallakalo toubi yunmakura.

Bethlehemra Yenkallengkur

¹⁹ Heisitoubi yakhuntane Bethlehem'ra hungtlungbongyen hungkur. Heirou yane Bethlehem'ra hungtlungkur heirouri, yai ngaimrou khukarthil heiyei thimirap nammanungri kngakni thimkur; heirouri napuiya rapni loukyun, “Heiwiri Naomi nimako?”

²⁰ Heirouri ane yanungei loukyun, “Keiyari Naomi toubi ungmakalo, heinung'tlimri keiyari ‘Mara’ toubine ungpilaklo, ngamri Yerrouwei Toumane Umpune keiyei rongchan awaya thuithini khayerwurlame.

²¹ Keine chawuryei kheenrouri marthumne urbine pothutkur, heiya Umpune keiyari hutdingne yenkallengyerwurla. Heiyanungri Umpune keiyari anakei lahyerwurbi, heirou Mane-Mantrang Umpune keiyari kalpimakne, keiyari koutoubi nane Naomi toubi ungeirouhuiyo?”

²² Heisitoubi Naomi'ne aiyei mouwi, Moabei nyul Ruth'le kalhonni Moab ram'rouwei yenkallengkur. Heisitoubi yane chanal trun-khumlumei kheenrou yenkallengbi Bethlehem'ra hungtlungkur.