ROMIA 8 - KHYINGEI PU'TLOU Bible (BSI)

Lhawaira Khring Chaan Klei

¹ Heine asinungri Christa Jesu'ra klei thimirap nammanungri koukhatkhi klal dayernanungei makkura.

² Kouweiyo toulanungri Christa Jesu'nung klei Khring chaanyei Lhawaiyei tloulamne keiya borhle khiyei tloulam'rouwei malhetthutpila.

³ Ngamri tlaipang sharungni shulnei ngamrou, Tloulamne toumanemak heiri Dunpune toumane. Ane Aiyei Chanapawaya tlaipang thimirung khoine yenmalhetpibi, Ane borhrei tlaipang sharungnakrim yongpibi borhya klal dayerbi manewurla.

⁴ Dunpune anakya toupikur heiri tlaipang sharungei hilthungne ringbi klei nimakne kaiyei rilla ringbi klei Lhawaiyei kning hilthungbi klei kanungei Tloulamyei kyun heiwaya tlungyernanungei toukura.

⁵ Ngamri sharungei kningya hilthungbi klei thimi rapne yai ukningrap heiri sharungei lhouyathil kardonbine leirou, heiya Lhawaiyei kningya hilthungbi klei thimi rapne yai ukningrap heiri Lhawaiyei lhouyathil khourou.

⁶ Kouweiyo toulanungri sharungei kningyatom ningkardonbi klei thimirap heiri khi thimi, heiya Lhawaiyei kningya ukningra ningchabi klei thimirap heiri khring chaanle heirou kyingya pharou.

⁷ Ngamri ukningra sharungei kningni manebi klei thimi heiri Dunpule karhoukril hoirou; ngamri ane Dunpuei Tloulamya chanthungpimak.

⁸ Heini tlaipang sharungei kningya hilthung thimirap heiri Dunpuya malung khrahyer manemakrou.

⁹ Heiya nari sharungei kningya hilthungne ringbi leimaklei, heinung'tlimri Dunpuei Lhawaine naiyei rilla leiyanungri, nane Lhawaiyei kningya hilthungbi leirou. Ngamri hukhatne Christaei Lhawaine anungei makanungri, a heiri Christaei hoimakrou.

¹⁰ Heiya Christaei Lhawaine nanungei leiyanungri nane borhrei ngamrou naiyei sharungrap heiri hiyuranungkhi, naiyei lhawairap heiri chimyerpiwurnei ngamrou khring pharou.

¹¹ Jesu'ya khirouwei ringthutyerkur Lhawai heine nanungei leiyanungri, naiyei rilla klei Lhawai heiyei ngamne Christa Jesu'ya khirouwei ringyerpikur Dunpu heiri kimkur kya naiyei sharung raprakhi khring chaan leiyerpirou.

¹² Heiyanungri keitei-keinaorap, kane sharungei kning hilthungbi ringnanungei sharungra laltul tulbi klei nimak.

¹³ Ngamri nane tlaipang sharungei kning hilthungne ringbi leiyanungri, nari hirou; heiya Lhawaiyei ngamne nai borhrei lhou rapya hiyerlanungri, nane khring pharou.

¹⁴ Ngamri Dunpuei Lhawaine ruibi klei thimirap namma heiri Dunpuei.

¹⁵ Ngamri Dunpune nanungei piwurkhou Lhawai heiri naya hil kallengyerbi ukningra kandupyernung heirou shok hoiyernanungei lhawairi nimak, heinung'tlimri Lhawai heine nayari Dunpuei chanaorap hoiyerbi heirou Lhawaiyei mantrang heiwane kayari Dunpuya “Abba! Keiyei Pawa!” toubine ungyerlei.

¹⁶ Dunpuei Lhawaine kai lhawaira marapbi kaya Dunpuei chanao rapme toubi shunthutyerlei.

¹⁷ Heineri kari Aiyei chanaorap hoiyura, heisitoubi Ane Aiyei thimi rapnung marshikpikur phor heiwaya kane pharouwa, heirou Dunpune Christa'nung marshikpikur klah-knang heiroukhi kane yakanthrinbine, kane Aiyei thang'alya kantlangni alyerrou.

Hillei Hungrou Kyou thang'al

¹⁸ Keiyei khalnarari asiyei klah-knang doubi klei ari hillou kanungei mutpirou kyou thang'al heile markherillanungri koukhi nimaklei.

¹⁹ Heirou ringbi klei Dunpuei hutsa rapne, Dunpune Aiyei chanao rapnung muyerou kyou heiya msul-yuikhatne karngeibi leilei.

²⁰ Ngamri ringbi klei chiwirap nammane ai'aiyei kningni nimakne, yaya pu hoipibi klei Dunpuei kning hilthungne namyerwa maangeirou.

²¹ Koungameiyo toulanungri, chiwirap nammayakhi nungkhatnuiri shok hoinei bom'rouwei malhetthutpibi, Dunpuei chanao rapbei thang'allei hangra kalhonne leiyerrou.

²² Ngamri kane mulei touri, lhawai nammane angtuei chaan ramphane, naokhounei kna dounakne klah-knangei houni ungraobine leilei.

²³ Heiya ringbi klei chiwi rapthil ungraochabi klei nimakne; Dunpuei lamkri Lhawaiyei hutthulrap phabi klei kakhi kaihangra klah-mrimne ungraochabi leilei, heisitoubi Dunpune kaya malhetthutpibi Aiyei chanaorap hoiyerrou kyou heiya kane karngeibine leilei.

²⁴ Ngamri kayari kaiyei malungam heine kalpiwurla; heiya kane kaiyei kmu heiwaya malungambi klei nimak. Kouweiyo toulanungri, thimi napung khatne aiyei kmu heiwaya ane koutoubi malungambi leithurou?

²⁵ Heiya kane tekkhi mukhoumak khatya malungamne karngeibi leiyanungri, heiwarou kane kanthrambi karngei manerou.

²⁶ Heinakrimne Lhawai Khyingne anakei kanringkur kaya trungpinanungei yongpiwurla. Ngamri kane kaiyei shunchabom thukyakhi mumaklei; heiya Lhawaine aitam Dunpuei bomra kanung'tlim murnikhi yunthutchangmak tlou rapne shunchapibine leilei.

²⁷ Heirou kai ukningyakhi mubi klei Dunpune, Lhawaiyei kningkhi mubi klei; ngamri Lhawaine Dunpukou kalhonne leibi Aiyei thimi rapnung'tlim, Dunpuei kning hilthungne tlou numpibine shunchapibi leilei.

²⁸ Kane kmu touri Dunpune lhou nammarou, Aiyei kning hilthungei ungthutpikur lhangai thimi rapkou kalhonne lhou toubine leilei.

²⁹ Ngamri Dunpune heinaksi thimi rapya lamkrine khalthutdurbi, Ane yaya Aiyei Chanapawaei shakrungnak hoiyerkur, heisitoubi yaihangra Aiyei Chanapawaya lamkrine pukyerkur.

³⁰ Heitoubi Dunpuei khalthutpikur thimi rapya Ane ungthutpikur; heirou Aiyei ungthutpikur thimi rapya Ane Anung'tlim chimyerpikur, heitoubi chimyerpikur thimi rapya Aiyei thang'alya phayerkur.

Christa Jesura Dunpuei Malungshi Klei

³¹ Lhou namma heiyei doura kane kouya yunserou? Dunpune kaiyei hoiyanungri, kaya manerouri hu leilei?

³² Kanung'tlim aiyei Chanapawaya thikmallengmakni pithutbi makatpikur Dunpune put namyerwa heiya kanungei khoupikur manemakrouko?

³³ Huni Dunpuei khalthutkur thimi rapya klal theibaangpikur manerouko? Ngamri Dunpu Ahakne yayari klal koukhatkhi makme toubi paothutdurla!

³⁴ Heiyanungri hune yaya klal dayerkur manerou? Christa Jesu'ni kanung'tlim hipikur nimaka? Nimanung heiyakhi duini Aya ringthutyerbi Dunpuei thya lhangra ombine kanung'tlim shunchapibi tlou numpi nimaka?

³⁵ Heiyanungri, hune kayari Christaei malungshinarei thikkarkhaikur manerou? Ukningra plangkyer heine manerouko? Nimanung kna'sane manerouko? Nimanung marhotbi klah-knang pikur heine manerouko? Nimanung chak-msulni manerouko? Nimanung purvi-purchamni manerouko? Nimanung shuikngamne, nimanung khi-knane karkhaiyerkur manerouko?

³⁶ Khyingei Lailikni asitoubi yunkhou klei. “Nanung'tlim kayari kheenserrou hikur kyayei klah-knangei bomra dayerbi leilei; heitoubi kayari hatnungei yaoshunya marekna'nakne klah-mrimne mareknawurla.”

³⁷ Nimakme, kaya malungshipikur Aiyei ngamrou kane heinaksi nammaya yenmaneheila.

³⁸ Ngamri keine kanreni mulei touri kayari Aiyei malungshinarei koukhatnekhi thikkarkhaikur manemakrou; khi'nekhi heirou khring'nekhi manemakrou, Thangring rapnekhi heirou khiya ramrei mane-mantrang rapnekhi manemakrou; angtuei chaan'nekhi heirou hillei hungrou kyou chaan'nekhi manemakrou,

³⁹ tlaipangnikhi heirou khiya ramnikhi manemakrou - heirou tlaipang-Thangmunrei ringbi klei Dunpuei hutsa lhawaipal koukhatnekhi kayari kaiyei Pu Christa Jesura pikur Dunpuei malungshinarei thikkarkhaikur manemakrou.