ROMIA 4 - KHYINGEI PU'TLOU Bible (BSI)

Abraham'ri Kaiyei Mulounanungei Bom

¹ Heiyanungri kane tlaipang sharungei youkna hilthungne, kai patar Abrahamei ngamrou kouya yunserou? Heitoubi Abrahamyari aiyei touwurkhou lhou rapne aya chimyerkur hoiyanungri,

² aiyei tangchanungei bom beicha leileihui, heiya Dunpuei maibongrari heihakri nimak.

³ Ngamri Khyingei Lailikni yunlei, “Abraham'ne Dunpuya uklumkhou, heingammei aiyei uklum heiwane aya chimyerpila.”

⁴ Lhouchur thimi khatne aiyei lhou churnei klahman pharou, heiya ane lhou churbi phachana.

⁵ Heiya thimi napung khatne aiyei lhou churkur hei nimakne, aiyei borhya kukpi mane Dunpuya uklumma'nungri, aiyei uklum heine Dunpune aya chimyerpi manelei.

⁶ Heisitoubi David'nekhi thimi napung khatne aiyei lhou toukur heirouwei nimakne uklumnei ngamrou Dunpune chimyerpikur thimiyei doura phoryei tlou yunkhoupi.

⁷ “Yaiyei klalya kukpi phawurbi heirou borhya mkhubphobpikur thimirap heiri likarsui lhangairou!

⁸ Dunpu'ne aiyei borhya mshing sherphobpimakrou thimi heiri likarsui lhangairou!”

⁹ David'ne shampikur phor heiri murdankur thimi rapbei douratom leirouko? Nimanung murdanmak thimi rapnungkhi leirouko? Kaneri “Abrahamri uklumnei ngamrou ayari chimyerpime toubi yunlei.”

¹⁰ Heiyanungri aya koukaallou chimyerpikur? Aya chimyerpikur heiri murdan hillei nimak heiya murdanbongei.

¹¹ Lhou heiri ane mur dinbongnung Dunpune aya chimyerpime toubi mutnanungei, ane murdannei lhou heiwaya hutlha khoine loubi toukur. Abrahamei murdannei lhou heiri murdanmakni uklumnei ngamrou Dunpune yaya chimyerpikur thimirap nammanungei tharmuei pa hoinanungei toukura.

¹² Heitoubi murdanbi heirou murdannei youkna lhouya chanthungbi kleitom nimakne, kai patar Abrahamne murdanbongei waiyoubi, aiyei chakhou uklumnei lam heirou hilthungbi klei thimi rapbeikhi, a heiri murdannei pa hoinanungei toukhou.

Dunpuei Tlou Kantompi Heiri Uklumnei Ngamni Pharou

¹³ Abraham'nungle aiyei yu-cha rapnung Dunpune yaya tlaipangra paalyernanungei tlou kantompikur heiri Tloulamyei ngamrei nimak, heiya ane uklumnei ngamrou chimyerpikur.

¹⁴ Kouweiyo toulanungri, Dunpuei tlou kantompikur heiri Tloulamya baimakni chanthung heiwane Dunpuei Cha mranglam hoiyerlanungri thimiyei uklum heiri karsukmaklei, heitoubi Dunpuei tlou kantompikur heikhi karsukmaklei.

¹⁵ Ngamri tloulamne Dunpuei malungkha yenlei, heiya Tloulam maknarari, heiwaya baiyerbi klallei lhou tounanungkhi maklei.

¹⁶ Heitounei ngamrou Dunpuei tlou kantompi heiri uklumnei ngamrou kringpibi Abrahamei yu-cha rapbei doura Dunpune hutthul khoine leemni piwurla- Tloulamya hilthung thimi rapnungtom nimakne, Abrahamei uklumnak uklum thimi rapnungkhi piwurla, ngamri Abrahamri tharmuei pa hoilei,

¹⁷ Khyingei Lailikrei mayekhounakne, “Keine neiya lim namyerwayei pa hoiyerwurla.” Heisitoubi tlou kantompikur heiwari Abrahamne uklumbi klei Dunpu- khirouwei khring chaan yenpikur, heirou mak putya ungthutbi leikyer Dunpuei maibongrakhi lhangailei.

¹⁸ Abrahamne ukningra malungamkna makkuryei kheenroukhi, Dunpune anungei shunpikhou touri, “Neiyei yu-charap chungwane shunniyasu,” toubine Khyingei Lailikra mayekur heinakne ane uklumnei ngamrou lim namyerrei Pa khat hunghoikur.

¹⁹ Heiyei kaalnungri ai'mshaei kum macha yentlungrou waiyoubikhi, heirou hilumkhi yenphawa'nungkhi, heitoubi aiyei nu Sarahkhi chanao tlamakura toubi ningchabikhi, heirapne aiyei uklumya koukhi kanthrit'khoumak.

²⁰ Ngamri Dunpune anungei kantompikhou heiwaya ane koukhatkhi khalcha'kna leiyerkhoumak, heitoubi aiyei uklum heiya mantrangyerbi, heirou ane Dunpuei thangya mathangkur.

²¹ Dunpune anungei kantompikur heiwaya yulmakni hoiyerroume toubi ningmlungambi aiyei uklumya mantrangyerkur.

²² Heisitoubi Abraham'ne uklumnei ngamrou “Aya Dunpune chimyerpikur.”

²³ “Aya chimyerpikur” toubi kyun tloulhangrap heiri aitamnung'tom mayekhou nimak,

²⁴ heiya tloulhangrap heiri khirouwei ringthutyerkur, kaiyei Pu Jesu'ya uklumkur thimirap ka namma'nungkhi mayepikur.

²⁵ Ngamri kaiyei borhnung'tlim aya hiyerwurbi, heitoubi kaya Dunpuei bomra chimyerna'nungei aya khirouwei ringthutyerwurla.