ROMIA 2 - KHYINGEI PU'TLOU Bible (BSI)

Dunpuei Pichar

¹ Keiyei paluirap, nane midoura pichar toubi leileiko? Nari huhuya hoiyanungkhi, nayari tekkhi kukpibom thukmaklei. Ngamri nane miya pichar touyeinung, heirou yai toubi klei heinakrimne nanekhi toubi leileihui, heingammei naimsha-naitamya klal dayerkna. Kane mulei touri heinaksi pichar toupibi klei thimi rapbei doura Dunpune chimni pichar toubi leilei.

² Heiya asinungri kane kanreni mulei touri, heinaksi picharya toupikur thimi rapbei doura Dunpuei pichar heiri chimni leiheirou.

³ Heiya keiyei paluirap, nari miya pichar touyeinung heinak lhouya toukur heiwane Dunpuei pichar'rouwei kartleichangrou toubi nane ningmuleiko?

⁴ Nimanung, nane Aiyei kringpikhei, ngaakpikhei heirou dourumpikhei heiya manthapimako? Heinimakne Dunpuei kringpikhei heiwari naya ukning hungyernanungei ruipime touri nane mumako?

⁵ Heiya naiyei kalkur ukning heirou kanthram heimak ukning heiwini hungrou kyou Dunpuei meithukei malungkha heile chimmei pichar toupinei Tlaini heirou mutrou kyou marpeibi khoukur Dunpuei duiyei malungkha heiwaya naitam phachanarou.

⁶ Ngamri Dunpune thimi kantangnung ai'aiyei touwurkhou lhou hilthungne klahman yerpiheirou.

⁷ Kanthrambi lhangaiyei lhouya toubi, thang'alle rikrai khrumkna heirou trim naimakei chaanya rapha thimi rapnungri Dunpune klui naimakei chaanya piheirou.

⁸ Heiya yaitamyei kningya toubi, heirou chimmakei lhouya chanthungna'nungei chimya loulhakpimakne namphumkur lhangaimak thimi rapbei doura Dunpuei meithukei malungkha daheirou.

⁹ Lhangaimak lhouya toubi klei thimi nammane, lamkrine Jehudia rapbei doura, heithangrou Gentile rapbei dourakhi Dunpuei yunnungei makni klah-mrim knang leiheirou.

¹⁰ Heiya lhangaiyei lhouya toubi klei thimi rapnung, lamkrine Jehudia rapnungei, heitoubi Gentile rapnungkhi Dunpune thang alyerpirou, rikraikhi khrumpirou heirou kyingkhi pirou.

¹¹ Ngamri Dunpune thimi kantangnung lingkhat khoine pichar toupirou.

¹² Gentile rapne Moses'yei Tloulamya hil'thungkhoumak - heirou yane borhyei lhouya toulanungri yaya Tloulamne pichar toupimakni hikur. Heitoubi Jehudia rapne Tloulamyei daakra leibi borhyei lhouya toulanungri, yaya Tloulamne pichar tourou.

¹³ Ngamri, thimi rapne Tloulamya ninglhaknei ngamrou yaya Dunpuei bomra chimyerpirou nimak, heiya Tloulamyei pikur chay heiwaya hilthungne lhou toukur thimi rapya Dunpune malungpillou.

¹⁴ Gentile rapne Tloulam makanungkhi, yane yaiyei youkna lhouya touweinung Tloulamyei chay hilthungne touthutlei, heirou yaiyei Tloulam makanungri, yai touthutkur lhourap heiwane yaiyei Tloulam hoilei.

¹⁵ Heirou yai malungra Tloulamyei chay rapya mayebi khoulei touri yaiyei touthutkur lhou rapne mutlei. Heitoubi yai ukningrakhi chim-klalya khalmubine kounaksi kheenrouri yai ukning rapne khatle khat klal theibaangkril, heirou kounaksi kheenrou heiwane yaya ngaakpirilkhi leilei.

¹⁶ Heisitoubi keiyei shunthutpikur lhangai Pao-laa hilthungne, Jesu Christaei ngamne Dunpune pichar tounei tlainirou thimi kantangei ukningya pichar toupiheirou.

Jehudirap Heirou Tloulam

¹⁷ Heirou nari kousitoulei? Nari naitam Jehudiame toubi ungnalei; heirou nane Tloulamya ningmlungambi Dunpu'nungtlim tangchane leilei;

¹⁸ heitoubi Dunpune naya kou touyerkniyo toukhi nane mulei, heirou nane Tloulamrei chimya khalthutnanung marnola;

¹⁹ nari mitdeo rapya lamruipi thimi, heirou mehnara klei thimi rapya warkyer thimi rapme touri naimshanekhi mulei;

²⁰ heirou yuntlungmak thimi rapya shunmtupi purap, heirou douwa rapya marnopi pume toubi naimshane mulei. Heirou Tloulamyei rilla naiyei shingkheile chim heiwakhi yertleng yaochilei toukhi nane kanreni mulei.

²¹ Heirap nammaya nane thimi deinung marnopilei - heiyanungri koutounei ngammei naimsha-naitamya marnonamako? Naneri ‘muchamaklo’ toubine shunmtupilei - heiya nari muchabine leileiko?

²² Nane kyun, ‘Minu-micha lalnei lhou toumak’- heiya nari minu-michaya klallei lhouya toubi leileiko? Nari thrailha rapya machinlei - heiya nane Pukhrumna Cheemrei muchabine leileiko?

²³ Nane Dunpuei Tloulamya ngaaknei ngamrou heinung'tlim tangchako - heiya nane Aiyei Tloulamya rikrai pileiko?

²⁴ Dunpuei Khying Tlouni yunlei, “Jehudiarap nai ngamne, Gentile rapne Dunpuei ngamrou lhangaimak tlouya yunlei.”

²⁵ Nane Tloulamya chanthungpila'nungri, naiyei murdannei lhou heiwari manklu hoirou; heiya nane Tloulamya hilthungmakni baiyerlanungri, naiyei murdannei lhou heiwari dinmak'nakrimne hoiyura.

²⁶ Murdanmak Gentile khatne Tloulamyei chay heiwaya chanthunganungri, Dunpune aiyei murdanmak heiwaya murdan khatnakei lingra loupimakrouko?

²⁷ Heisitoubi Jehudiarap nane tloulamra mayekhoulei toubine mur dinlanungkhi, nane heirapya baiyernei ngamrou Gentile rapne nayari picharra theibangpibi klal dayerheirou; heiyei ngamri yaimshara mur dinmanungkhi yane Tloulamya hilthungbine leilei.

²⁸ Heiyanungri, baorei mintomne Jehudia khoi heinetom Jehudiahak nimak; heitoubi tlaipang sharungrei murdan heitomne murdanhak nimak.

²⁹ Heinung'tlimri, thimi napung khatne aiyei ukningra murdannei lhou toukur heiwane Jehudiahak hoirou, heitoubi heinakei lhou heiri Tloulamra mayelhakur nimakne Dunpuei Lhawai Khyingei toupikur lhou. Heirou heinaksi thimi heine thimi rapbei mathangpi nimakne Dunpuei mathangpiya pharou.