ROMIA 14 - KHYINGEI PU'TLOU Bible (BSI)

Neiyei Teinao Rapbei Doura Pichar Toumak

¹ Uklum chetmak thimiya unglhakpilak; heiya aiyei kning lhoubomyei ngamrou akou tlou rkalrilmak.

² Thimi napung khatne aiyei uklumnei hilthungne ane koukouya chamaikur kya, heiya uklum chetmak thimiri anna-lounayatom chamaibi klei.

³ Aiyei kning hilthungne cha'kmai thimi heine, chamaimak thimi heiyari lam tamungyermakniasu; heirou anna-lounayatom cha'kmai thimi heinekhi koukouya cha'kmai thimiyei doura pichar toumakniasu; ngamri Dunpune aya yapiwurla.

⁴ Thimi napung khatdei shokya pichar toupirou thimi nangri kounaksi thimiyo? Heiri shok heiwane aiyei cheempuei maibongra mayungchanganungkhi, mayungchangmanungkhi, Pu aitamei kningni pichar tounarou. Heirou shok heiwane mayungchangrou, ngamri Puni aya maneyerlei.

⁵ Thimi napung khatne tlaini khatri dei tlaini rapya duini lilkhoime toubi ningcha'yeinung, thimi napung khatneri tlainirap namyerwa heiri khatnakthil toubi ningchalei. Heini thimi kantangne ai'aiyei ukningra ningchabi klei heiri khminne tirisundabi mayungrou da.

⁶ Thimi huhune ningchabi tlaini khatya lilkhoine ngaaklanungkhi, ane Dunpuya rikrai-chini ngaakrou da; heinakrimne huhune koukouya chamaiyanungkhi, Dunpuya rikrai-chini chamairou da; ngamri ane chamaiput heinung'tlim Dunpuya mathangbi cha'kmai. Huhune heinaksi cha'kmai putya ngeibi klei thimi heinekhi Dunpuya rikrai-chini ngeibi klei, heirou ane Dunpuya mathanglei.

⁷ Ka hukhatnekhi aitamtom'nungei ringbi klei nimak, heirou hukhatnekhi aitamtom'nungei himak.

⁸ Kane ringanungkhi, kaiyei ringbi klei awari Dunpu'nungtlim ringbi klei, heirou kane hiyanungkhi Dunpu'nungtlim hikurra. Heini kane ringanungkhi nimanung hikurya hoiyanungkhi, kari Dunpuei hoiyura.

⁹ Ngamri Christa'ne ringbi klei thimiyeikhi heirou hikur thimi rapnungkhi Pu hoipinanungei hiwurbi khring chaanra ringthutpiwurla.

¹⁰ Heiyanungri anna-lounayatom chamaibi klei thimirap nane-koutoubi neiyei teinao rapya pichar toukurrawo? Heirou koukouya cha'kmai thimirap nanekhi kouya tounanungei naiyei teinao rapya lam tamungyerkurawo?

¹¹ Ka nammane Dunpuei maibongra mayungbi Ane kaya pichar touweirouhui.

¹² Kouweiyo toulanungri, Khyingei Lailikra asitoubi yunlei: “Keine Khring Dunpu hoinei ngamrou, khuklu nammane kanthrunchabine Keiya khrumheirou, heitoubi malei nammane yunthutbi Dunpuya mathangeirou, toubi Dunpune yunlei.” Heineri ka thimi napung kantangne ai'aiyei toukur lhou rapbei ngamrou Dunpu'nung namyerwa sherbaangeirou.

Neiyei Teinaoya Malhimnara Dayerbi Kanelyermak

¹³ Heiyanungri, kane khatle-khat pichar toukril heiri dongase, heinungchumri neiyei teinaoya kouniroukhi malhimnara kanelyerbine borhra dayernanungei lhou toumakroume toubi nane tlou mayungnanungei toulak.

¹⁴ Keiyei kmuri heirou keiyei kningri Pu Jesu Christara uklumnei ngamrou keinungri chamaiput namma mardun touri koukhatkhi mak; heiya thimi napung khatne chamaiput thayari mardunme toubi khallanungri, chamaiput heiri anungeiri borh hoirou.

¹⁵ Nangni koukouya chamaibi neiyei cha'kmai heiwane neiyei teinao khatya aiyei ukningra klal dayerlanungri, nangri malungshipina rilla leibi lhoutou thimi nimaklei. Heirou nangne koukouya chamaibi Christaei hipikur thimi rapya maangyernanungei lhouya toumak.

¹⁶ Heini nangne lhangaime toubi ningchakur heiwaya thuithinara min chayermak.

¹⁷ Kouweiyo toulanungri, Dunpuei Krungram heiri chamai putnaksi nimak, heiya Lhawai Khyingei pikur chimle, kyingle heirou houklumyei bom hoilei.

¹⁸ Heirou thimi hukhatne heinaksi lamra Christa'ya watlhou touyeinung, aya Dunpune yapirou, heitoubi thimi rapnekhi lhou heiwaya mupirou.

¹⁹ Heiniri, kane kheenserou thimi khatle-khat kyingya yenpina'nungei heirou mantrangyernanung trungpirilnei lhouya toupirou da.

²⁰ Heitoubi cha'kmai putcheiyei ngamrou Dunpuei touwurkhou lhouya maangyermak, chamai'put namyerwa heiri chamai kyakhi louhoirou, heiya aiyei cha'kmai heiwini thimi deiya borhra dayernanungei hoiyanungri, heihakri chimmakrou.

²¹ Chimhakri anchum maibi, tul mongbi, heirou koukouya chamaibi, heinakpini neiyei teinaoya thikmathuiyerbi kanelkyer hoiyanungri, koukhatkhi chamaimakni lhangairou.

²² Lhoubom aei ngamrou neiyei uklumyei kning heiwaya nangle Dunpuei tlakra leiyerlak. Heirou thimi napung khatne aitamne yalhakurbi heitoubi aitamei yalhakur heine aya pichar touyerbi klal dayermakur thimi heiri likarsui lhangailei.

²³ Heiya aiyei cha'kmai heirou ane khalcha'kna leiyanungri, aya Dunpuei picharra klal dayerwurla, ngamri ane uklum kyaone lhou heiwaya toumaklei. Heirou uklum yaomakei lhoutou namyerwa heiri borhthil.