ROMIA 13 - KHYINGEI PU'TLOU Bible (BSI)

Khobungei Pu Rapnung Toubomthuk Rui

¹ Thimi kantangne Khobungei pu rapbei shunya chanthunglaksu; ngamri Dunpuei kya nimakne hukhatnekhi pu hoichangmak, heitoubi pu hoibi klei namyerwa heiri Dunpuei hoikyerdik.

² Ngam heine huhune lhou'urpu rapya lhouhoimak thimi heiri Dunpuei shilpikur heiyakhi yeekna thimi; heitoubi lhouhoimak thimi heinungri aidoura pichar leiheirou.

³ Koungameiyo toulanungri, lhou'ur thimi rapya lhangaiyei lhoutou thimi rapne chibomri thukmak, heiya lhangaimak lhou toubi klei thimi rapne yaya chibom thuklei. Heitoulanungri nane lhou'urbi klei pu heiwaya chibom thukmakrouko? Heiyanungri nane lhangaiyei lhouya toulak, heitoulanungri nane Aiyei mathangpi heiya pharou;

⁴ ngamri A heiri nanungei lhangaiyei lhou toupibi klei Dunpuei shik khat. Heiya nane lhangaimak lhouya toulanungri nane Aya chiyalo, ngamri Ane picharrei shonkhyang heiwari koukhi tounabom makni urchabi klei nimak; Ari lhangaimak lhou toubi klei thimi rapbei doura Dunpuei malungkhayei picharya tounanungei mayungbi klei Dunpuei shik khat.

⁵ Ngam heine nane Dunpuei malungkhayei picharya chinei hilthungtom nimakne- chim klalya munanungkhi naimshane ningmubi lhou toulak.

⁶ Ngam heinung'tlim nanekhi khulrui pibine leilei; ngamri lhou'urpu rapne yaiyaiyei lhou rapya ukning-lhawai kyaone toupikur heiwane Dunpuei watlhou toulei.

⁷ Nane yanungei pibomthuk namma pithaiwurlak, khulrui tullanungkhi pithaiwurlak, tuy tullanungkhi shingthaiwurlak; chibomthuk thimi rapya chini lhou toulak, rikrai-khrumbom thuk thimi rapya rikrai khrumknane lhou toulak.

Khatni Khatnungei Watlhou Tloupi'kril

⁸ Nane khatne khatle malungshirilnei laltul tulkril nimakne deiri koukhi laltul tulrilmak. Ngamri hukhatpane heinaksiya toulanungri, Tloulamya ane chanthungbi leilei.

⁹ Chaylamrap heiri, “minu-micha lalnei lhou toumak; nangne thimi hatmak; mucha-mumaimak; miput-micheiya khramphabi madumak,” heiya duinarakhi chaylamrap deideiyakhi chaylam khattomne thiktilbi leilei, “Nangni neimsha-neitamya malungshinakne, neiyei cheemlhun thimi rapyakhi malungshipilak.”

¹⁰ Nangni thimi hukhatya malungshipilanungri, nangne anungei koukhatkhi klal tounimakrou. Heiyanungri malungshiyotou ari Tloulam nammaya hilthunglei.

¹¹ Nane anakya toubom thuklei, ngamri nane kheen heiya muwurla touri asinungri nai ipbi leina birouwei kanthoulum phawurla; ngamri kane haallei uklumbi leinarouwei asinungri kaya ralthutpina kheen yennakkura.

¹² Masari yenraallou waiyouwura, heitoubi tlaini kwaarrei kheen yennakkura; ngam heine kane kmehyei lhouya lakurkhoubine kwaarrei raalshambya mansambi kardounanungei toulakase.

¹³ Kane nunghangei karwaicha'nakne chimni chananungei touwase; youkna mumakni chamalip-maimalipbi, napuiya-napawa chorit naimakni tilrilbine klei borh thimi'nakne heirou plek thimi nakne; horthirilbi ngaal'ok toubine leimakase.

¹⁴ Heinung'tlimri, Pu Jesu Christa'ya raal-shamb'nakne kansamloubi tlaipang sharungei kningya tlungyerna'nungei lhouyatom toubine sharungya pilyermak.