ROMIA 12 - KHYINGEI PU'TLOU Bible (BSI)

Dunpuei Watlhou Tounei Chaan

¹ Ngam heine, keiyei teinaorap, Dunpuei kringpinei ngamrou keine nanungei bucha'kniri. Nane nainaiyei sharung rapya Dunpuei watlhoura khringne, khyingne heirou Dunpuya pilyernanungei thuinaput khoine makatlak. Awari naiyei lhawaiyei khoi Dunpu'nungei watlhou.

² Heirou nane tlaipangpallei youkna shakrungei lhouya hilthungurmak; heiya nane neineiyei ukningya ranne hollurbi, Dunpuei kning hilthungne lhangaiya heirou Dunpune loulhak kya rongtlung heiri kouweiyo toubi munanungei nane raphalak.

³ Heirou Dunpune keinungei pikur kringpinei manklu hutthulyei ngamne, keine naihangra klei thimi kantangnung yunpi'kniri: Na hukhatnekhi nainaiyei khalbom thukya duini neimsha-neitamya choune khalbi leiwurmak. Heinung'tlimri Dunpune na napung kantangnung pikur uklumnei ling hilthungne, nainai mshaya pichar toubine nai ukningya nimyerlak.

⁴ Kouweiyo toulanungri, sharung khatrou ban chungwane klei, heitoubi ban namyerwa heiri ai'aiyei lhoubom lailaini klei.

⁵ Heinakrimne, kakhi thimichung hoiyanungkhi, ka namma ban laili khoine sharung khatra karyomrilbi Christara rungkhat hoiyura.

⁶ Ngam heine Dunpune kanungei laili'yei pikur kringpinei hutthul heiyei hilthungne kane yrengcharou da. Kaiyei hutthul heiwaya Dunpuei Pao-laaya shunthutnanungei hoiyanungri, kane kanungei klei uklumnei hilthungne shunthutpirou da;

⁷ heitoubi Dunpuei watlhou tounanungei hutthul hoiyanungri, kane Aiyei watlhouya tourou da; heirou marnopinei hutthul hoiyanungri, kane marnopirou da;

⁸ heirou hutthul heine miya ukning thoubaangnanungei hoiyanungri, kane heinaksi lhouya tourou da. Huhune thimi deinung trungpi hoiyanungri, ukningra mansermakni trungpilaksu; heitoubi huhune ruipi thimi hoiyanungri, lhawai kyaone ruipilaksu; huhune nanungei malungshipinei lhouya toulanungri, ane hou klumni toupilaksu.

Christen Rapbei Youkna Lhoulam

⁹ Malungshi heiri yerrouwei shunya hilchanthung hoirou; lhangaimakya machinlak, heitoubi lhangaiya loulhakbi chetne shinphoplak.

¹⁰ Christen rapne khatle-khat teinao khatnakne malungshirillak; heitoubi khatle-khat kluni rikrai khrumrilnei lhouya mutrillak.

¹¹ Yra theemakni lhou churlak; Dunpuei watlhouya ukning-lhawai kyaone toulak.

¹² Naiyei malungam heine naya ukningra nungwaiyerlak, klah-knangra kanthram heiya, heitoubi kheenserou shunchabi leiya.

¹³ Naiyei klei rapya nai palui Christen rapnungkhi changbom thuknara yerpirillak, heitoubi miyul-mithrillei thimi rapya lhangaini toupilak.

¹⁴ Naya marhot thimi rapnung phor bupilak; heitoubi yaya manchopimakni yanungei phor shaampilak.

¹⁵ Hakrao thimi raple haraomalnalak, heirou chap thimi raple chapmalnalak.

¹⁶ Na khatle-khat ukning khatsi khoine kantlangni leiya. Naiyei ukningra tangchabi naitamtomne shingkhei thimime toubi ningchamakni, ukningra marnimni, heirou khnimni naitam yachabi loulhaklak.

¹⁷ Thimi hukhatnungkhi klallei lhoura klalni khlang lhaakmak. Heinung'tlimri thimi namyei thinara lhangaiya mutnanungeitom ningchalak.

¹⁸ Yaleiyenri, na nammane kyingle kalhonne leinanungei toulak.

¹⁹ Keiyei malungshi'kna paluirap, nane khatle-khat khlang lhaakrilmak, heinung'tlimri Dunpuei malungkha heiwane khlang lhaklaksu. Ngamri Khyingei Lailikra asitoubi mayekhoulei, “Khlanglhak heiri Keiyei lhou, Keine khlang lhaakbom heiwaya lhaakrou toubi Puni yunlei.”

²⁰ Heirou Khyingei Lailikne asitoubikhi yunthulei, “Nangkou karhoukril thimine msullanungri anungei pichalak, ane yui hatdanungri pimonglak; ngamri nangne heinakya toupikur heiwane aiyei lura meihal khring shukbaangbi rikrai phayerkur hoirou.”

²¹ Lhangaimakne malhimbi neiya maneyermak, heinung'tlimri lhangaimakya lhangaini maneyerlak.