ROMIA 10 - KHYINGEI PU'TLOU Bible (BSI)

¹ Keityei teinaorap, keiyei ukningrari Dunpune keiyei thimi rapya kalpiyerninei ngamrou keine yanung'tlim shunchapilei.

² Yari Dunpuei lhoubomra kalthi lhawai kyaone lhou toulei, heiya yai ukningrari Dunpuya kanreni mubi lhou touri nimakleime touri nai maibongra keine yunchangrou.

³ Ngamri, yaneri chimyerpinei lhou heiri Dunpu'reime touri mumaknei ngamrou, heirou yane yaitamyei kningnitom chimleime toubi urbaangnanungei wairaangbi, Dunpuei chimyerpinara pilhaknimaklei.

⁴ Ngamri Christa heiri Tloulam suidongna, heitounei Aya uklum thimi kantangya uklumnei ngamrou Dunpuei bomra chimyerpirou.

Ralthutpina Bom Heiri Thimi Nammanung'tlim Khoi

⁵ Tloulamya hilthungbi Dunpuei bomra chimyerpi phawurnei ngamrou Mosesne mayekhoulei, “Huhune tloulamei chay rapya chanthunganungri, heiwane ringrou.”

⁶ Heiya uklumnei ngamrou Dunpuei bomra chimyerpikur heiri Khyingei Lailikni asitoubi kyun leilei. “Nai ukningra ‘hune Christa'ya ruisundananung Thangmunra karouwo?’ toubi ningchanungei bomri nimak.

⁷ Nimanung, ‘hune khiya ramra yongchangbi Christa'ya hiwurnarei ringyerbi ungbaangpirouwo?’ toubi khalnungeikhi maklei.”

⁸ Heiya Khying Lailikrei kyunri, “Dunpuei Pao-laa heiri naipongra leilei, nai murpaalra, heirou naiyei ukningra leilei - touri kai shunthutpikur malungam kya paolaa heiwariya.

⁹ Ngamri nai murne Jesuri Pu, heirou Dunpune Aya khirouwei ringyerkurme toubi yunbi, naiyei ukningra uklummanungri, naya Dunpuei bomra chimyerpiwurla; heirou kai murne yunthutnei ngamrou kayari kalpiwurla.

¹⁰ Kouweiyo toulanungri, uklumnei ngamrou kayari Dunpuei bomra chimyerpiwurla; heitoubi kaiyei murni yunthutnei ngamrou kaya kalpiwurla.”

¹¹ Khyingei Lailikni asitoubi yunlei, “Aya uklumkur thimirap hukhatyakhi rikrai phayermakrou.”

¹² Ngamri Jehudia raple Gentile rapbei tlakra koukhi kartlikril mak; Dunpuei thimi namyerwayei Pu, heirou Ane Aya ungkur thimi kantangya Aiyei kwatsam naimak phorya kantlangni pilei.

¹³ Khyingei Lailikni asitoubi yunkhou, “Trungpina'nungei Puwei minra ungkur thimi kantangya kalpirou.”

¹⁴ Heiya Aya uklummak thimi rapne koutoubi Aya ungrou? Heirou yane Pao-laaya mayekmakni koutoubi uklumrou? Heirou Pao-laa heiwaya shunthutpimakneri koutoubi yane mayekrou?

¹⁵ Heirou Paocharou thimi rapya malhetmakneri koutoubi paolaa shunthutpirou? Khyingei Lailikei kyunnakne, “Kyingei Lhangai paolaaya shunthutbi yenkarwaicha thimi rapri kounak likarsui lhangairou!”

¹⁶ Heiya ya namyerwane Lhangaiyei paolaaya loulhakur nimak, Isaiah ahakpane yunthutkhou heinakne, “Puwo, kai shunthutpikur paolaaya huhune mayekurlawo?”

¹⁷ Heisitoubi, uklum heiri Lhangai paolaaya mayeknei, heirou Pao-laa heiri Christa'ya shunthutpinei ngamrou hungthukur.

¹⁸ Heiya keiyei ngaikniri. Pao-laa heiwaya yane mayekmakhui toulanungri chimrouko? Heiya yane mayekurla, ngamri Khyingei Lailikni asitoubi yunlei. “Yai paothutkur hou heiwari tlaipangpal karyouni wa'tlungura; heitoubi yai yunthutpikur tlou heiwari tlaipang thleidongna phane wa'tlungura.”

¹⁹ Keine hanuikhi ngaithinilei. Israellei thimi rapne koukhatkhi mulhakmakhuiko? Moses hakpane tlou heiya mallangkri thimi khoi. “Keine nayari nai limyei thimi nimak rapbei doura horthiyerrou; heirou nayari muheimak lim rapbei doura keine malungkhayerrou.”

²⁰ Heirou Isaiahni koukhatkhi chi naimakni krakne yunthutkhou, “Keiya raphamak thimi rapneri keiya muwurla; heirou Keiya ngaiphamak thimi rapnungei Keine muyerwurla.”

²¹ Heiya Israel rapbei ngamrou ane yunthutkhoupi, “Keine tlainiser, shunya ningmak thimi rapya heirou lamdui thimi rapya rkolpinanungei Keihut lamthutpi.”