ROMIA 1 - KHYINGEI PU'TLOU Bible (BSI)

Tlou Youthut Heirou Tloulung

¹ Dunpune Aiyei Lhangai Pao-laaya shunthutpina'nungei Paocha thimi khat khoine khalthutbi ungpikur, Christa Jesuei shik Paul keirouwei Chethi awaya manthunthunglei.

² Pao-laa heiri Khyingei Lailikra mayekur heinakne, bongei waiyoubi Dunpune Thimkhui rapnung tlou kantomkhoupi.

³ Pao-laa heiri Aiyei Chanapawa, Pu Jesu Christaei ngammei. A heiri tlaipangpallei youkna khoine Davidyei yu-cha yenraannarei tlaipang thimirung khoine pukkhou;

⁴ heitoubi Aya khirouwei ringthutyerbi Lhawai Khyingei ngamne Aya mane-mantrangra Dunpuei Khyingei Chanapawame toubi mutpiwurla.

⁵ Aiyei ngam'rouwei Dunpune keiyari, Christa'nungtlim lim nammaei thimi rapya uklumnei lamra ruilhakpibi, Dunpuei shunya hilthung thimirap hoiyernanungei, ruipipu khat khoine Dunpune keiya kringpibi Paocha thimi khat hoiyerwurla.

⁶ Tlou awari Dunpune ungpiwurbi Jesu Christaei hoiyerkur Rome'rei klei thimirap nanungeikhi kyao.

⁷ Asitoubi keine, Dunpune malungshipibi, heirou Aiyei thimirap hoiyernanungei ungthutpikur Rome'rei klei thimirap na nammanungei mayelei touri. Kaiyei Pawa Dunpu heirou Pu Jesu Christa'ne nanungei kringpibi kying hoiyerniyasu!

Mathangnei Shunchapi

⁸ Lamkrine, keine Jesu Christaei ngamne na namnung'tlim keiyei Dunpuya mathanglei, ngamri naiyei uklumnei ngam heiwari tlaipangpal karyouni mayekurla.

⁹ Kouweiyo toulanungri keiyei lhawai kyaone Aiyei Chanapawaei Pao-laaya shunthutpinara watlhou toupibi klei Dunpune keinung'tlim mayungpilei, touri keine shunchayeinung kheenserou malumkur naimakni nanung'tlim karyomne mintlangchokbi leilei,

¹⁰ keine asinung luiwairou Dunpune kringpibi keiya naileinara wamuril manenanungei buchalei.

¹¹ Ngamri nai uklum heiya mantrangyernanungei Lhawaiyei phorya shunpinanung toubi keine naya beimakni murilkni.

¹² Kouweiyo toulanungri, kane khatle khat murilbi, naiyeikhi heirou keiyeikhi uklumnei lamra thoubaangrilkni.

¹³ Keiyei teinaorap, keine nayakhi muyerkni touri keine naya wathinanung karyomne wairangkhou, heiya karyomne keiya maneyermakni dongkur. Keine Gentile rapbei hangrei thimi kounakya manelbi uklumyerkur heinakne, keine naihangreikhi thimi thaya uklumyerkni.

¹⁴ Ngamri thimi nammanungei, Gentile rapnungkhi, lim deinungkhi, shingkhei thimi rapnungkhi, heirou muheimak thimi rapnungkhi keine heinakei lhou rapya toupibom thuk leilei.

¹⁵ Heingammei keine Rome'rei klei thimirap nanungei Lhangaiyei Pao-laaya shunthutpi'kni.

Lhangai Pao-laa'yei Mantrang Klei

¹⁶ Ngamri keine Lhangai Pao-laa heinung'tlim koukhi rikrainabom mak! Kouweiyo toulanungri, Pao-laa heiwaya uklum thimi kantangya kalpi phayernanungei Dunpuei mantrang leilei, lamkrine, Jehudia rapnung, heirou Gentile rapnungeikhi khoi.

¹⁷ Kouweiyo toulanungri, uklumnei ngamrou Dunpuei tharmu chim heiwari kyou'rouweini klui phane mutpiwurla; Khyingei Lailikra mayekurnakne, “Dunpura chimyerkur thimi heiri uklumnei ngamrou ringrou.”

Thimi rapbei Lhangaimak

¹⁸ Thimi rapne tharmu yaomakei lhouya toubine yaiyei lhangaimak borhrei lhourap heine chimya mutyermakni namphumbi khoukur thimi rapbei doura Dunpuei malungkha heiri Thangmunrei muyerlei.

¹⁹ Dunpune yayari tanti pilei, ngamri Dunpuei ngamrou mubomthuk heiri yanungei khminne muyerpilei, ngamri Dunpu Ahakpane yanungei yertleng muyerpila.

²⁰ Kouweiyo toulanungri, Dunpune tlaipangpal sheemtirrei waiyoubine, tlaipangei mitni muphachangmak Aiyei thang'alya touri Aiyei klui naimak mantrangle khying heiwaya khintamrek muyerwurbi, ya heirapya Dunpuei sheemthutkur hutsa rapya shakrung khoine muyerwurla. Heitounei ngammei heinaksi thimi rapyari tekkhi kukpibom thukmak.

²¹ Ngamri yane Dunpuya muwanungkhi, yane Ayari Dunpume toubi rikraikhi khrummak, heirou Aya mathangkhi mathangmak. Heinungchumri yai ukning heiri koukhatkhi karsukmak hoiyura, heirou yai muheimakur ukning heiri mehwurchiya.

²² Yane shingkheime toubi yaitam yunkna, heiya yari yuntlungmak thimirap hoiwurchiya;

²³ heitoubi yane khi naimak Dunpuya khrumnung tlimri trimkur kya thimiyei lha rapya, nimanung waalha, nimanung yaalha rapya, nimanung frullei lha rapya yane sheemthutbine khrumrillei.

²⁴ Heitounei ngamrou Dunpune heinaksi thimi rapnung yai ukningrei madubi klei lhangaimak lhou rapya touyerbi, heirou yaihangra khatle khatne yai sharungya rikrairil'maknei lhouya touyerwurla.

²⁵ Ngamri yane Dunpuei ngammei chimtlou heiwaya mandallei tlou hoiyerwurla, heitoubi Dunpu'nung tlimri Aiyei sheemthutkur hutsa rapya khrumbine, heitoubi heirapya watlhoukhi toupibi leiwurchiya. Heiya Sheempi Pu Dunpuyari klui naimakni mathangbom thukme! Amen.

²⁶ Ngamri yai madubi klei heirou yanungei rikraiyerkna lhou rapya Dunpune yaya touyerkur. Kouweiyo toulanungri, napuiya rapnekhi chorit naimak lhouya toubine youkna lhou rapyari borhyerkur.

²⁷ Heinakrimne napawa rapnekhi yai youkna hoini napuiyakou tilrilnei lhouya lakurkhoubine, yane khatle khat thiduiril manemaknei ukningra meinak kangrilbine, napawa'dikdik tilrilbi chorit naimakei lhouya tourilbi leiyura, heitounei ngamrou yai lhangaimak klalyei lhou touwurnei klahman khoine yane yaiyei sharungra hikur kyayei tanti rapya phabine leiyura.

²⁸ Ngamri thimi rapne, yai ukningra lhangaimakya manenanungei Dunpuei pikur Aiyei ngammei chim ukning heiwaya yane loulhakbine khounimak, heitounei ngamrou yane yai toubom thukmak lhou rapya toubine leikura.

²⁹ Heirou yai ukningra tharmu yaomak, lhangaimak, khramtang, heirou horthiyei lhou rapne thimmura. Yai ukningra mittang, thimi hatkni, kngaal, minamtang, mikhril knayei tloukyun, heirou miya yorcharil, marbuphatang,

³⁰ miya yunkarhou, Dunpuei machinknayei lhoutou, rikrai mumak thimi, aitamei kningyatom tou thimi, tangcha, lhangaimak lhouya touthut thimi, pui-payei shunya chanthungmak thimi,

³¹ yuntlungmak thimi, kantomkril tlouya toubai thimi, malungshipi heimak thimi, heirou kringpikhei mak thimithil hoiwurchiya.

³² Heinakei lhou rapya toukur thimi rapri hiroume toubi Dunpuei Tloulamne kyun heiwaya yane muchilei; heiyanungkhi yane lhourap heiya heisi kallengni toubi leileihui, heiya heinakei lhangaimak lhou rapya toubi klei thimirap deiyakhi yane yapibi touyerleihui.