PICHAR PURAP 8 - KHYINGEI PU'TLOU Bible (BSI)

Zebahle Zalmunna'ya Hatkur

¹ Heirouri Ephraim thimi rapni Gideon'ya shun, “Nangni kanungei toukur awaya kouwo? Nangni Midian rapya raal darou chayeinung kayari koungammei ungkhoumako?” Heisitoubi yani aya kalthi tlou yeetrilkur.

² Heiya ani yanung mallangbini loushun, “Naiyei toukur lhou rapya thimarhilnalanungri, Keiyei toukur lhou awari koukhi nimaknaksi. Ephraim'yei darkha heitrun khumnarei maleithung heiwani Abi-ezer'yei trunwai marthumni lukmallongkur heiwayakhi dui nimaka?

³ Dunpune Midian rapbei krungrap Oreb'le Zeeb'ya naihutra pilhakurla. Naitoukur heiwaya thimarhilnalanungri keine kouya toumanirouwo?” Heirouri ani heiwaya louyunnarouri, yani aya malungkhani ningchakhounarei yendongkur.

Gideon'ne Midian'yei Krung Rapya Hulmankur

⁴ Yuikhat msulni lahwurbikhi, Gideon'ne akou chakalhon raallui macha-khyumni, lathotho raal hulbini chanthungnarou yani Jordan kung heiraalkur.

⁵ Heirouri yani Succoth'rei thimi rapnung shun, “Kringpibini, keihilla chanthung thimi rapnungei mumtol tha pishailaklo, kouweiyo toulanungri, yari msulwurbi lahwurchiyame; heirou keiri Midian'yei Krungrap Zebah'le Zalmunna'ya hulmanna'nungei chanthungkurame.”

⁶ Heiya Succoth'yei lhou'urpu upa rapni loushun, “Kayari neiyei raallui rapnungei mumtol pishailaklo toubi kyun heiwaya Zebah'le Zalmunna yakhuntaya asinung naihutra manbini khouwurlako?”

⁷ Heitounei Gideon'ne kyun, “Heiyanungri lhangaiya, Umpune Zebah'le Zalmunna yakhuntaya keihutra pilhakla'nungri, heirou keine naiyei namkalla ramthingrei thru'le, ruiyam thruni umrou.”

⁸ Heirouri ani bi heirouwei Penuel'ra wawurthubi, heirou yanungkhi heinakrimni wayunthu, heiya Penuel'yei thimi rapnikhi Succoth'yei thimi rapbei loukyun heinakrimni louyunthu.

⁹ Heisi tounarouri ani Penuel'yei thimi rapnungkhi yunkhou, “Keine raal maniwurbi suikngam yaomakni hanui yenkallengei kheenrouri, keine naiyei shangkai cheemchouya thresundawurou.”

¹⁰ Kheen heirouri Zebah'le Zalmunna'ne kulkung lhangrei raalluirap lakh khatle lishing somni hiwurnarei maleithungkur raalluirap lishing chiple phangale kalhonni Karkor khukarthilla kan'nganbi louklei.

¹¹ Heirouri Gideon'ne Nobah'le Jogbehah'yei kulkung lhangra Ut tungbini lal'hol thimi rapbei ranchana lamra, khuilupun cheem sabi leina lhangra kabini, yeekna thimi rapbei doura hunikhi loumuthung'makni raal dakur, kheen heirouri raal kngaak thimiri hukhatkhi louleimak.

¹² Heiya Midian'yei Krung napung'khni touri Zebah'le Zalmun'na yakhuntari loutrukur, heitounei ani yaya chanthungbini hulmankur; heitoubi yaiyei raallui rapyari lam tatkhalwurbi yaiyei rungbomra marubphopkur.

¹³ Heirouri Joash'yei chanapawa Gideon'ne raalbom'rouwei Heres lhungdouei lamthung yenkallengkur.

¹⁴ Heitoubi ani Succoth'rei kartlang douwa khatya manbini tloudarbi kngai; heirouri kartlang douwa heiwani anungei namma louyunthutbini, Succothyei yama krungrap, lhou'urpu upa rapbei min, napung somretle eniyei minya mayethutkur.

¹⁵ Heirouri Gideon'ne Succoth'rei thimi rapnungei hungbini, “Thilak, nani keiya khremnabi, ‘Neiyei chak msulkur raallui rapya mumtol pishailaklo toubi bukurya, Zebah'le Zalmunna yakhuntaya neihutra manbini leiyako?’ toubi yunkhouso ariyame.”

¹⁶ Heisitoubi Gideon'ne khukarthillei lhou'urpu upa rapya touri yama krung rapya manloubi, heitoubi ramthingrei thru'le, ruiyam'thruya loubini, Succothrei thimi rapya heirapni umbini tanti pikur.

¹⁷ Heitoubi Penuel'rei shangkai cheemchou heiwakhi tangdeekbi thresundakur, heirou khukarthil heiyei thimi rapyakhi hatkur.

¹⁸ Heitoubi Gideon'ne Zebah'le Zalmun'na yakhuntaya tlou darbini, “Nane Tabor lhungdoura hatdurkhou thimirap heiri kounaksi thimi?” toubine kngai. Heitounei yani mallangbi louyunthut, “Yarap heiri nanaksithil, naiyei shakrung kmaldik; yarap heiri thiyeinungri Krungei chanao naksikhi kmal.”

¹⁹ Heirouri Gideon'ne kyun, “Yarap heiri keile puikhatdei pukmalkna keiyei teinaodikme. Ringbi klei Umpunekhi mulaksu, kounakpi nani yaya hatpimakni kalpilanungri, nayari keinekhi hatpimakrou.”

²⁰ Heisitoubi Gideon'ne aiyei chanapawa samranwa, Jetherya shun, “Kanthoubi yarukhniya hatlaka!” Heiya kartlang douwa heiwaneri aiyei shon phuithutbini shat'hatkur manimakura, koungameiyo toulanungri, a heiwari douwa hoiyabiri, chiwurbi hatngammakur.

²¹ Heisi tounarouri Zebah'le heirou Zalmunna'ne kyun, “Nei'mshani kanthoubi kaya hatlakalo, kouweiyo toulanungri, napawa khatdei toumani thang'al heile aiyei mantrangle malungkhring heiri khatnakdik hoiyerrou da.” Heisi tounarouri Gideon'ne kanthoubi, Zebah'le Zalmunna'ya shat'hatkur. Heitoubi yaiyei Ut ngakhungrei mansambangbi lhe hoikna tangla heidetir lhaei khrulrui rapya lhukloukur.

Gideon'ne Kum Somlibil Kyingni Ruipibi Paalkhou

²² Heirouri Israellei thimi rapni Gideon'ya shun, “Nangni kaidoura Picharpu khoini palpilaklo, heitoubi Nangle neiyei chanapawale, heirou neiyei yu-cha rapnikhi kaidoura Picharpu khoini paalpilaklo. Ngamri Nangni kayari Midian rapbei hutrouwei kalthutpikhoume.”

²³ Heiya Gideon'ne yanung loumallang, “Keineri naidoura Picharpu khoini paalpi manimakrou, heirou Keiyei chanapawa heinekhi Picharpu khoini paalpi manimakrou; heiya Umpune naidoura Picharpu khoini paalpiheiroume.”

²⁴ Heitoubi Gideon'ne yanungei kyun, “Keine nanung buchanungei khat leiyurame, touri na thimi kantangni keinungei nai raallei yenlukhei sinayei khnabilpar khatsol pilaklo.” (Koungameiyo toulanungri, ya Ishmael cheemkhurrei thimi rapri sinayei khnabilpar bil-thimni naachakhou.)

²⁵ Heirouri yani loumallangkur, “Neiyei bukur heiri kani suimakni piroume.” Heisitoubi yani phiyeng khat khingmyerbi, heitoubi ya thimi napung kantangni, ai'aiyei raalla yenkhumheikur sinapar rapya khingmallongpikur.

²⁶ Heisitoubi aiyei bumallongkur sinayei khnabilpar heiri shekel lishing khatle macha enibil phalei. Heitoubi heiyakhi duinara, Midian Krung rapbei tangla heidetirrei lha kmal kulshan khrulkhi, shinmin, hutrum-shin, khrul ruirap, heirou Krungei shangthingrei khmongdup rapkhi, heirou yaiyei Ut rapbei ngakrei lhe hoiknani mansambaangkur khrul rapkhi kyao.

²⁷ Heitoubi Gideon'ne heirapya Ephod khat khoini sheemthutbi, heitoubi aiyei khukarthil Ophrah'yei rilla khoukur. Heirouri Israelrap nammani bi heirou wachangbi thrai khoini khrumrilkur. Heitounei ngammei heiwani Gideon'le aiyei bommai'nungeiri tappankna bom hoinakur.

Kum Somli Kyingni Paalkur

²⁸ Heisitoubine Midian rapya Israel rapbei daakra kulchalbi khoukur; heitounei ngamrou hanui kallengni yaiyei lu mangalthut'changmakkur. Heisitoubi ram heiwari Gideon'ne hibongyen kum somlibil kyingni paalwurkhou.

²⁹ Heirouri Joash'yei chanapawa Jerubbaal'ne kallengurbi aicheemra leikur.

³⁰ Heirou Gideon'yei yukpuk'hak chanapawa napung somret leikhou, ngamri aiyei nu chungni leikhou.

³¹ Heitoubi Shechem'ra klei aiyei nukhuwi heinekhi anungei chanapawa khat pukkhou, heirou Gideon'ne aiyei min Abimelech' toubine thulpikur.

³² Heirou Gideon, Joash'yei chanapawa heiri kum beimak tlani leikhoubi hikur; heitoubi Abi-ezeria'ra klei Ophrah'ra aiyei pawa Joash'yei lhanra phumkur.

³³ Heisitoubi Gideon hikurle tallengni, Israellei chanao rapni hanui kallengni Baal thrailha rapya khrumbi chorit naimakei lhouya touwurthula; heitoubi Baal-Berith'ra ai'aiyei thrailha rapya sheemthutbini khouwurla.

³⁴ Heirouri Israellei chanao rapni yaiyei Dunpu, Umpune yaya yeekna thimi rapbei hutrouwei kalthutpikhou heiwayakhi malumwurbi ningthutmakura.

³⁵ Heitoubi Jerubbaal touri Gideon'ne Israel rapnungei lhangai lhou toupikhounei ngamrakhi aiyei bommairei yu-cha rapnungei kringpi'kheiya mutpikur toukhi makkura.