PICHAR PURAP 4 - KHYINGEI PU'TLOU Bible (BSI)

Deborahle Barak'ne Canaania Rapbei Hutrei Lhukthutpi

¹ Heirouri Ehud hiwurhillou hanuikhi Israellei chanao rapni Umpuei mit'thrilnara lhangaimak borh lhouya touwurthula.

² Heingamei yayari Umpune Hazor'ra Krung khoini paalkhou Canaan'yei Krung Jabin'yei hutra yorlhakpikur. Heitoubi aiyei raalluipu upawaei minri Harosheth-Hagoiim'ra paalkhou napawa Sisera toubi ung.

³ Heirou Israellei chanao rapni Umpunung chapni ungraochakur; ngamri Jabin'yei sapuk thir-kaari macha-tako leikhou, heingammei kum somnibil ani Israellei chanao rapya thuithini hotpiwurkhou.

⁴ Kheen heirouri, Lapidoth'yei nu, thimkhuiwi Deborah'ne Israel rapya Picharpu khoini paalpikhou.

⁵ Heirouri ani Ephraim Lhungramei Ramah'le Bethel'yei tlakra klei Deborah'ne kangwoitrung daikalim daakra Pichar bom khat sheembini omkhou. Heitoubi Israellei chanao rapni bi'heirou aya Pichar touyernanungei kachangbi kartilkur.

⁶ Heirouri Deborah'ne thimi malhetbi, Naphtali'yei ram Kedesh'ra klei Abino-am'yei chanapawa Barak'ya wa'ungyerkur heitoubi anungei shun, “Israellei Dunpu, Umpune neinungei atoubi chay pibine shunlei, ‘Naphtali'le Zebulun'yei chanao raprei raallui lishingchip markumbine Tabor Lhungdoura chalakalo.

⁷ Heitoubi keine Jabin krungei raallui upa Sisera'ya, aiyei sapuk kaari raple aiyei raalluirap nammaya neileinara, Kishon kungra heimalhimthutrou, heitoubi ayari keine neihutra pilhakrouwa.’ ”

⁸ Heirouri Barak'ne Deborah'nung loukyun, “Kounakpi nangni keikou kalhonni chawanungri, kei charou, heiya kounakpi nangni keikou chamakanungri, keikhi chamakrou.”

⁹ Heirouri Deborah'ne loushun, “Heiyanungri keikhi suimakni nangkou kalhonni charou; heiya charou kyou lamtla heiyei raal manenei thang-al heiwari neiyei hoimakrou; ngamri Umpune Sisera'ya napuiya khatyei hutra yorlhakrouwa.” Heisitoubine Deborah'ne kanthoubi Barak'le kalhonni Kedesh'ra chakur.

¹⁰ Heirou Barak'ne Naphtali'le Zebulun'ya Kedesh'ra ungkartilkur, heitoubi ani raalluirap lishingchip ruibini raal chakur; heirou Deborah'khi akou kalhonni chakur.

¹¹ Asinungri Moses'yei puwa Hobab'yei cheemkhurrei Kenia bommairei napawa Heber'ne aiyei cheemkhur teinaorei tlatni karkhaiwurbi, heitoubi Kedesh'yei pongra Za-anannim bok'heengyao hangra ani khuiluphiyei cheem sabaangbini leikur.

Sisera'ya Raal Maniwurbi Hatkur

¹² Heirouri yani Sisera'nungei paotambi, ‘Abino-am'yei chanapawa Barak'ne Tabor Lhungdoura raalluirap khumtilbi kakawurame’ toubi shunpikur.

¹³ Heisi tounarouri Sisera'ne aiyei sapuk thir-kaarirap macha-tako'le, aiyei raalluirap nammaya khumtilbini, heitoubi ale kalhonni Harosheth-Hagoiim'rouweini Kishon kungra kakartilkur.

¹⁴ Heirouri Deborah'ne Barak'nung shun, “Kanthoubi chalakalo! Kouweiyo toulanungri Umpune Sisera'ya neihutra pilhaknei tlaini heiwari angtu awariya. Umpune neimaibongra loulamrikur nimakeiko?” Heisi toubine Barak'ne raallui lishing chiple kalhonni Tabor Lhungdourei yuchumkur.

¹⁵ Heisitoubi Barak'ne raalsobi tonlhakyei kheenrouri, Umpune Sisera'le aiyei sapuk kaarirap heirou aiyei raalluirap namyerwayakhi tamungyerwurbi Barak'yei raalshonra hiyerkur; heiya Sisera'ri aiyei sapuk kaari dourei chunsundawurbi honi trukkur.

¹⁶ Heiya Barak'ne sapuk kaari raple raallui rapya Harosheth-Ha-Goiim waphani hulbine chanthungkur; heitoubi Sisera'yei raalluirap nammaya, hathakhi kartleiyermakni Barak'yei raalshonra hiyerkur.

¹⁷ Heiya Sisera'ri honi trukwurbi, Kenia'yei napawa Heber'yei nu Jael'yei khuiluphi cheemwaira loutruklhakur; kouweiyo toulanungri, kheen heirouri Hazor'yei Krung Jabin'le, Kenia cheemkhurrei Heber'le yakantlangrilbi kyingni leimalnakhou.

¹⁸ Heirouri Jael'ne wathukbini heitoubi Sisera'ya louchanrobine aya loushun, “Wachangpiyalo, keiyei upawa; keicheemra wachangbi yullakalo! Koukhi chimaklo” toubi lou'unglhakpikur. Heisi tounarouri Sisera'ne aiyei cheemra wachangkur, heirouri Jael'ne aya pungpun khatni taanghuphopbi khoupikur.

¹⁹ Heirou Sisera'ne Jael'nung shun, “Keinungei yui mongnung bei shorpilak, ngamri keiri beimakni yui hatdura.” Heisi tounarouri ane nushungyui an'unbon khat laatbini, anungei pimongkur; heitoubi aya hubphopbi yulkhoupikur.

²⁰ Heirouri Sisera'ne Jael'nung shun, “Shumtrumra bei mayungpilaklo, kounakpi thimi hukounak khatni wabi, ‘Ara thimi dei wachangkurko?’ toubine neinung wangailanungri, ‘Hukhatkhi wachangmakme’ toubine louyunlaklo.”

²¹ Heiya Heber'yei nu Jael'neri aihutra chuk khatle, shek khat shinloubini, heitoubi muni hungchangbi aiyei machal tlaitamhakra hemkalleipikur, heisitoubi chuk heiwari thleira hemkalleikur; kouweiyo toulanungri, a'heiri lah'atchaknei ngamrou chetni ipchimbi louklei. Heisitoubi Sisera hikur.

²² Heirouri thilak, Barak'ne Sisera'ya hulbi chanthungei kheenrouri, Jael'ne louchanthutbine aya murilbi loushun, “Ara wachangalo, neiyei rapha thimi heiwaya keine neinungei shunmutpiyeise.” Heisitoubi ani aiyei cheemwaira wachangei kheenrouri, thilak, Sisera'ri machalla chuk hemkalleibi hibini louklei ani wamukur.

²³ Heisitoubi heiyei tlainirou Dunpune Canaan'yei Krung Jabin'ya Israel chanao rapbei maibongra raalla maitheeyerbi namsundakur.

²⁴ Heitoubi Canaan'yei krung Jabin'ya tumni maangyerchibongyen, Israel thimi rapbei mantrangri Jabin'yei doura duiduini katduikur.