PICHAR PURAP 3 - KHYINGEI PU'TLOU Bible (BSI)

Thrailha Khrumnei Shok Hoinei Bomra Dakur

¹ Asinungri Lim rapya Umpune hulthutmakni lakkurkhou. Kouweiyo toulanungri, Canaan'ra raal tekkhi kardourilmak Israel rapya khril thinanungei toubi yarapya lakkurkhou.

² (Umpune Lim rapya lakurkhounei ngamri, haalnung raal tekkhi mukhoumak Israellei yu-cha rapya hanuidikanungkhi raal marnopina'nungei toubi yarapya horkhoupi).

³ Limrap heiri minkhoini lhanglanungri: Philistine rapbei Krungrap napung-phanga, heirou Canaania rap nammakhi heirou Sidonia'rap, heirou Lebanon Lhungramra Baal-Hermon Lhungdou'rouweini Lebo-hamath waphani paalbi klei Hivia rapkhi kyao.

⁴ Limrap heiri, Israel rapni yaiyei nutar-patar rapbei chaanrou Moses'ne shunmatupikhou Umpuei chaylam rapya baimakni chanthungleiko nimanung chanthungmako toubine marshakbi chaangh thinanungei toubi khaiwurkhou.

Pichar Purap Napung-phanga

⁵ Heisitoubi Israellei chanao rapni Canaania raple, Hittia raple, Amoria raple, Perizzia raple, Hivia raple heirou Jebusia rapbei hangra yuldabini palmalnakur.

⁶ Heirouri Israel rapni limrap heiyei cha nangaka rapya yaiyei nu khoini loubini heirou yaiyei cha nangaka rapyani lim deiyei chanapawa rapnungei pibini nu-cha lourilkur, heitoubi yaiyei thrailha rapyakhi khrumbini watlhou toupikur.

⁷ Heisitoubi Israellei chanao rapni Umpuei mit'thrilnara lhangaimak borh lhouya toubine, yaiyei Dunpu, Umpuya malumwurbi, heirou Baal'le Asheroth thrailha rapya khrumkur.

⁸ Heirouri Umpuei malungkha heiri Israel rapbei doura meithukkura, heitounei ngammei Umpune yayari Mesopotamia'yei* Cushan-Rishathaimyei hutra yorlhakpikur; heisitoubi Israellei chanao rapni Cushan-Rishathaim'ya kumchotbil shok khoini watlhou toubi leiwurkhou.

Lamkri Picharpu Othniel

⁹ Heiyanungkhi Israellei chanao rapni Umpunung chapni ungraochayei kheenrouri, Umpune Israellei chanao rapya kalthutpinanungei, Caleb'yei naowa Kenaz'yei chanapawa Othniel'ya lhukthutpi pu khoini khalthutpikur.

¹⁰ Umpuei Lhawaini aidoura yongchangpibi, heirou ani Israel rapya Picharpu khoini ruipikur. Heirou ani raal chayei kheenrou, Umpune Mesopotamia* Krung Cushan-Rishathaim'ya aihutra pilhakur. Heisitoubi Othniel'ne Cushan-Rishathaim'ya kulchalkur.

¹¹ Heisitoubi ram heiwari kum somli kyingni paalkur. Heihillouri Kenaz'yei chanapawa Othniel hikur.

Ehud Khintam Tlung Picharpu

¹² Heirouri hanuikhi Israellei chanao rapni Umpuei mit'thrilnara lhangaimak borh lhouya touwurthula; Heitounei ngammei Umpune Moabei Krung Eglon'ya Israel rapbei doura mantrangyerbi kulchalyerwurthu. Ngamri yani Umpuei mit'thrilnara lhangmak borh lhouya touwurla.

¹³ Heirouri Eglon'ne Ammonia raple, Amalekia rapya ungtilbi, heitoubi raal dawurbini Israel rapya raal manikur, heitoubi Kangwoiyao hangrei khukarthil Jericho'ya lukloukur.

¹⁴ Heisitoubi Israellei chanao rapni Moabei Krung Eglon'ya kum chiple chotbil shok khoini watlhou toukur.

Ehud'ne Israel Rapya Moab'rei Kalthutpikur

¹⁵ Heiya Israellei chanao rapni Umpunung chapni ungraochayei kheenrou, Umpune yaya kalthutpinanungei Benjamin cheemkhurrei, Gera'yei chanapawa, thyoirei hutkanchang thimi, Ehud'ya lhukthutpi pu khoini khalthutpikur. Heisitoubi Israellei chanao rapni Moabei Krung Eglon'yei bira Ehud'ya ruiput thulthimi khoini heimalhetkur.

¹⁶ Heirouri Ehud'ne aitam muni, shonha thyoi-thya ra-thukni, thongkhat shaangni shonlusui khat sheem'marshikbi, heitoubi aiyei pheikhnang thyarei phitho rilla yepbini urloukur.

¹⁷ Heisitoubi ani Moabei Krung Eglon'nung ruiputya heithulpirou wakur. (Kheen heirouri Eglon'ri beimakni marnambi klei.)

¹⁸ Heitoubi ani Ehud'nungei ruiput heithulbi makatpikur hillouri, ruiput heithulpi thimi rapya ani hilmallengbi loushalyerkur.

¹⁹ Heiya ari aitamtom Gilgal'yei thlungei thrailharap leina birouweini hanui heikallengurthubi atoubi wakyun: “Krungwa, Keiri neinungei muni pao khat shunpinungei leiyurame.” Heisi tounarouri ani loukyun: “Mulleiya, mideini mayeklhakrou!” Heisitoubi Krungei aiyei wattouwa rapya namma airouwei wathukkur.

²⁰ Heirou Krungni aiyei shangkai dourei kying bomthora aitamtomcha ombini leiyeinung Ehudni kakakur, heitoubi Ehudni kyun: “Keine neinungei Dunpuei paokhat shunpinungei leilei.” Heisi tounarouri Krungni aiyei omnarei loukanthoubi mayungkur.

²¹ Heirouri Ehudni aiyei thyoirei hutni, thyarei pheikhnangrei shonya yukphuithutbini, aiyei uk tungnara thundumlhakur.

²² Heirouri shon heiwari shon phukhi-tangkhi kyaoni thundumlhakur, heitoubi ani phuithutmakni heisi lakurkhounarouri, shon heiwari uklhoprei yaoni dumphopkur; heirouri deekhi heiyanthutkur.

²³ Heitoubi Ehud'ne shangkai dourei cheemkhar'rap heiri rillakhi, purakhi hang rotphopburkhoubi, khamputra ranthutdurbi trukkur.

²⁴ Heitoubi ani trukthutkur hillouri, Krungei shok rapni shangkai doura kakabini kathikhou, thilak, kngak khatri, cheemkhar rap heiri namyerwa hang rotphopbini louklei. Heitounarouri yani yunkril, “Ari aitamtom daina bomthora kyingni klah mathrilbi leikuralei!”

²⁵ Heisitoubi yani koukhi bisokhi naimakni nunghangfchip mayungaakbi leinaroukhi, ani cheemkhar heilaatmakura. Heitounei ngamrou yani cheemkhar hangchei loubini laatthikur; heirouri thilak, yaiyei Krung heiwari thleira kanel'lhakbi hibini louklei.

²⁶ Heiya Ehud'ri, yani tlani mayungakbi leiyeinung, muni trukkartleiwurbi, thlungei thrai lharap leina lhangra shaalkur heitoubi Seirah'ra trukyulkur.

²⁷ Heirouri asitoubi hungthukkura touri, Ehud'ne hungtlungkur kheen heirouri, Ephraim'yei Lhungdou ramra ani raallei paochilnei pengkul shakhungkur; heirouri Israellei thimi rapni Lhungdou ramrouwei yuchumkur, heitoubi ani yai maibongra ruibini raal chakur.

²⁸ Heirouri ani yanungei chay pibini shun: “Keihilla chanthungbi, yaya hulthunglaka; kouweiyo toulanungri, Umpune naiyei yeekna Moabei thimi rapya naihutra pilhakurlame.” Heisitoubi yani Ehud'yei hilla chanthungbini yuchumbi, Moabei maibongra louklei Jordan'yei raalpalya kulchalkur, heitoubi thimi hukhatyakhi Jordan kungya heiralthutyermakni khoukur.

²⁹ Heisitoubi kheen heirouri yani Moabei raalluirap tang-mantrang, heirou raalla sireikhei thimirap lishing'chipmalya hukhatkhi kartleiyermakni namma hatkur.

³⁰ Heisi toubine heiyei tlainirouei waiyoubini Moab rapya Israellei daakra kulchalbini khoukur; heitoubi ram heiwari kum somretbil kyingni paalkur.

Shamgarni Israel rapya Philistine rapbei hutrei kalthutkur

³¹ Heisitoubi aihilla Anath'yei chanapawa Shamgar'ne hungthukbi, halput thouna thirmsui khatni Philistine napawa macha'thrukya hatdurbi Israel rapya lhukthutpikur.