PICHAR PURAP 2 - KHYINGEI PU'TLOU Bible (BSI)Israel Rapni Shun Ningmaknei Lhou 1 Heirouri Umpuei Thangring khatni Gilgal'rouwei Bochim'ra kathukbi kyun: “Keine naya Egyptrei ruithutloubini heitoubi Keine nai patar rapnungei piroume toubi kantompikur ramra naya Keine ruilhakpikur. Keine yunkhou, ‘Keiyei mardingpikur tlou heiri nairouwei tekkhi baiyermakrou. 2 Heitoubi naneri ram heirouwei yuldabi klei thimi rapleri ya'kril tlou mardingrilnungei yamakrou; heitoubi nani yaiyei khrahpal rapya thresundawurou da.’ Heiya naniri Keiyei shunya chanthungkhoumak. Naitoukur awari kouwo? 3 Heingammei Keine atoubikhi kyun: ‘Yayari Keine nai maibongrouwei hulthutpimakrou, heiya yarapri nanungei yeekna thimirap hoirouwa, heitoubi yaiyei thrai lharap heiri nanungei thikmathuikna chaang hoirouwa.’ ” 4 Heineri asitoubine thukkura, touri Umpuei Thangring heiwani tloulhangrap heiya Israellei chanaorap nammanung shunpikur heirouri thimi rapni yaiyei hou chouni ungraobini chapkur. 5 Heisi tounarouri yani bi heiwaya min Bochim toubine thulkur, heiwaya ‘chapkur’ toubine mu'kna; heitoubi yani bi heitamrou Umpunungei malanput makatkur. Joshua Hikur 6 Heirouri Joshua'ne Israel rapya shalkarkhaiyerkur hillouri, thimi rapni ai'aiyei yuldana ramra chawurbini yaiyaiyei ram kalrilkur. 7 Heisitoubi thimi rapni Joshua'ne hibongei chaan khatrek, heirou Joshua hihillei leithungkur, heirou Israel rapnungei toupiwurkhou Umpuei kngakei lhou rapya muthungkur yama upa rapni hibongei chaan khatrekrou Umpuya watlhouya toukur. 8 Heirouri Nunyei chanapawa, Umpuei shikrui Joshua'ne, ai'mshaei kum machale chip tlungei kalnung hikur. 9 Heitoubi ayari yani aiyei yuldakhouna ram rikarchunna rilla klei Ephraim'yei Lhungramra, Gaash lhunglimei khate lhangra klei Timnath-Serah toubikhi ung Timnath-Heres'ra phumkur. 10 Heitoubi chaan heiyei thimi rapkhi namma hiwurchiya, heirou yaihillei thimi chaan khatkhi katshunbi,* yarapni Umpuyakhi shak mumak, heirou Ane Israel rapnungei toupiwurkhou lhou rapyakhi mupimakur. Israel Rapni Baal Thrai Lhaya Khrumkur 11 Heirouri Israel rapbei chanao rapni Baal thrailha rapya khrumbini, Umpuei mit'thrilnara lhangaimak borh lhouya touwurla. 12 Heitoubi yani yai patar rapbei Dunpu, Umpu, yaya Egypt ramrei ruithutpikur Pu heiwaya khingurkhoubi, yaya karhilni paalbi klei Lim rapbei thrailha rapya hil chanthungurbi, yani heirapya khrumbini, Umpuya toumalungkhakur. 13 Heisitoubi yani Umpuya khingurkhou, heitoubi Baal thraile Ashtaroth thrailha rapya khrumbi watlhou touwurkhou. 14 Heisi tounarouri Umpune Israel rapbei doura meithukni malungkhakur. Heingamei yayari Ane lhangaimak yeekna thimi rapbei hutra dayerwurbi konmaangyerkur; heirou Umpune yaya karhilni klei yeekna thimi rapnungei yorlhakkur. Heingamei yaiyei yeekna thimi rapbei maibongra yani mayungchangmakur. 15 Heisitoubi Umpune yanungei kantombi yunkhou heinakrimni, Israel rapni raal chaleiyen, Umpuei hutni yaidoura karhani leibi yaya raalla klah dayerkur. Heisitoubi Israel rapni kheenserou klah-mrim douwurkhou. Umpu ne pichar purap khalthutpikur 16 Heirouri Umpune Picharpu'rap thukyerbi, heitoubi yarapni Israel rapbei doura klah-mrimni marhotpikur thimi rapbei hutrei kalthutpikur. 17 Heisiya hoiyanungkhi yani Picharpu rapbei kyunya ninglhakhoumak, heiya yani dei thrailha rapya khrumbini chorit naimakei lhou rapya toukhou. Heirou yaiyei nutar-patar rapniri Umpuei chaylam rapya baimakni ngakbini chakhou, heiya yaneri heinaksirouwei khrangni mai khreithutdurbi, heinaksi borh lhouya toukhoumak. 18 Heiya Umpune yanungei Picharpu'rap thukyerbi, heirou Umpune Picharpu rapya kalhonpikur, heitoubi Picharpu rapbei chaan khatrekrou yeekna thimi rapbei hutrouwei yaya kalthutpikur; kouweiyo toulanungri, Israel rapya marhotdurnei klah-mrimni ungraochanei houya mayeknarouri Umpune yaya kringpikur. 19 Heiya Picharpu rapni hikurle, yani dei thrailha rapya hil chanthungurbi, yaiyei nutar-patar rapbei touwurkhou lhou rapya duini thuithini lhangaimakur. Heisitoubi Israel rapni lhangaimak lhou rapya horkhounimakur. 20 Heitounei ngamrou Umpune Israel rapbei doura meithukni malungkhabi, heirou Ane kyun: “Ngamri Lim awane yaiyei nutar-patar rapnungei chay piwurkhou Keiyei Mardingrilnei Tlou rapya toubaiwurla, heirou yani Keiyakhi ninglhakpimakura.” 21 Heirouri Joshua'ne hiyei kheenrou lakkurkhou Lim rapya thimi hukhatyakhi yai maibongrouwei Keinekhi hulthutpimakni lakkurkhoubi, 22 heirou yaingamni Israel rapya yai pawa rapni chakhounakni Umpuei chaytlou rapya baimakni chanthungleiko toubi changh thibini martamthirou. 23 Heitounei ngamrou Umpune Limrap heiwaya yai maibongrouwei tallengni hulthutmakni horkhoukur; heitoubi yayari Umpune Joshua'yei hutrakhi pilhakmakni khoukur. |
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
Bible Society of India