PICHAR PURAP 13 - KHYINGEI PU'TLOU Bible (BSI)

Samsonya Puknei

¹ Heirou Israellei chanao rapne hanuikhi Umpuei mit'thrilnara lhangaimak borh lhouya touwurthula; heitounei ngammei Umpune yayari Philistine rapbei hutra pilhakurbi kum somlibil shok khoini kulchalbi khoukur.

² Kheen heirouri Zorah khukarthilla Dan cheemkhurrei Manoah toubi ung napawa khat leikhou, heirou aiyei nu heiwiri khungurbi chanao pukmakni klei.

³ Heirouri Umpuei Thangring khatni napuiya heinungei mukanreyerbini heitoubi anungei loushun, “Thilak, asinung nangri khungurbi chanaokhi pukmakkura, heiya nangni nao-urbini chanapawa khat pukheiroume.

⁴ Ngam heineri, asinungri nangni darkha yuikhi, heirou tulkhi mongnungei yamakrou, heirou an-borhkhi chamainungei yamakrou.

⁵ Kouweiyo toulanungri, thilak, nangni nao urbine chanapawa khat pukrou. Heitoubi aiyei lurei sham ngouwurnungei yamakrou; ngamri nao heiri ukwairouwei youbini Dunpunungei Nazirite hoirouda; heitoubi ani Israel rapya Philistine rapbei hutrouwei kalthutpi waiyourou.”

⁶ Heirouri napuiya heine hungbini aiyei shalwanungei atoubi hungshun, “Dunpuei thimi khatni keileinara wachangkhoume, heirou aiyei shakrungri Dunpuei Thangring naksine, beimak kngak khat khoini chi'kname. Heirou keineri a heiri koulhangreiyo toubikhi loungaithimak, heirou anikhi keinungei aiyei minkhi yunkhoupimak.

⁷ Heiya aniri keinungei atoubine, ‘Thilak, nangni nao urbini, chanapawa khat pukrou, heirou asinungri nangni darkha yuikhi mongnung yamakrou, heirou tulkhi mongnung yamakrou, heirou borh ankhi mainung yamakrou. Kouweiyo toulanungri, nao heiri aiyei puiwiyei ukwai'rouweini hibongyen Dunpunungei Nazirite khat khoini leirou,’ toubine yunpikhou.”

Manoahni Dunpunung Shunchakur

⁸ Heirouri Manoah'ne Dunpu'nung shunchabini kyun, “O Keiyei Pu, Dunpu! Keiyei shuncha'kniri, kringpibi Neiyei yenmalhetkur Dunpuei thimi heiwaya hanuikhi kanungei bei yenmalhetpithulak, heitoubi keinungei pukrou kyou nao heinungei kane kou toupirouwo toubi ani kanungei bei shunmatupilaksu.”

⁹ Heirou Manoahyei shunchawurnei houya Dunpune ninglhakpiwurla, heirouri Dunpuei Thangring heiwani napuiya heiwinung, ane phailoura ombi leiyeinung hanuikhi yongbine mukanreyerpithu; heiya kheen heirouri aiyei shal Manoah'ri akou kalhonni louleimak.

¹⁰ Heisi tounarouri napuiya heiwini khnotni wathukbi aiyei shalwanung washunpikur, “Thilak, anguiyei nikhatrou keinungei wamurilkur napawa heiwari hanuikhi wathulei.”

¹¹ Heirouri Manoah'ne kanthoubi aiyei nuyei hilla louchanthungkur, heitoubi ane hungtlungbi napawa heinungei hungkngai, “Napuiya awinungei tlou shunkhoukur napawa heiri nang nimakeiko?” Heirou ane loumallangkur: “Moi, heiwari Keime!”

¹² Heirou Manoah'ne hanuikhi loukngai, “Asinungri neiyei shunkhou tlou heine chimni hungthukanungri, nao heiyei rongchanri kounaksi hoirou? Heirou ani kounaksi lhouya tourou da?”

¹³ Heisi tounarouri Umpuei Thangring'ne Manoah'nung shun, “Napuiya heine Keiyei shunpikur tlourap namyerya lhangaini heirou mukheine chanthungbi lhou toulaksu.

¹⁴ Heitoubi ani darkha heirei sheemthutkur putcheiri koukhatkhi chamainungei yamakrou, heirou darkha yuikhi heirou tulkhi mongnungei yamakrou. Heirou hyingmak ankhi mainungei yamakrou. Keine anungei chay pibini shunpikur lhourap namma heiya baimakni chanthunglaksu.”

¹⁵ Heirouri Manoah'ne Umpuei Thangring'nung shunthu, “Kringpibi lepcha kan'ngankhourilaklo, kani neinungei tlangshuncha khat hatbini marshikthutdeise.”

¹⁶ Heirouri Umpuei Thangringne Manoah'nung loushun, “Nangne Keiya mankanthungbikhi, neiyei thungmarshik chak-anri chamaimakrou, heiya kounakpi nangne meira hongbini makatnungei putya marshikthutkur hoiyanungri, putchei heiwaya Umpunungei makatlaka.” (Kouweiyo toulanungri, thimi heiwari Umpuei Thangringme touri Manoah'ne ningmukhoumak.)

¹⁷ Heirouri Manoahni Umpuei Thangringnung kngai, “Neiminri kousi ungo? Keinungei bei shunpilaklo! Heiyanungri neishun tloulhang rapne chimni hungthukanungri, kane neiya rikrai khrumkna mutpirou.”

¹⁸ Heiya Umpuei Thangring'ne anungei loushun, “Nangni kngakei lhou rapya muwurna dourakhi, kounungei Keiyei minya ngaiphakurawo?”

¹⁹ Heisi tounarouri Manoah'ne tlangshun heichaya trunwaiyei lung makat putle kalhonni louheibine, heitoubi heirapya thlungdoura Umpunungei makatkur; heisitoubi Manoahle aiyei nune thibi leiyeinung, Thangring'ne kngakei lhou touthutkur.

²⁰ Heirouri asitoubine thukkura, khrahpal heirouwei meithlan heiwani nungthou lhangra kakur heirouri, Umpuei Thangring heiwakhi khrahpallei meithlanle kalhonni kanthumbangkur. Heisitoubi Manoah'le aiyei nuni heiwaya mukur heirouri, yane thleira yaimai shikhuplhakbini khrumkur.

²¹ Asinungri Umpuei Thangring'ne Manoah'le aiyei nu heinungei hanui kallengni muyermakura. Heirouri Manoah'ne napawa heiwari Umpuei Thangringme toubi ningmuwurla.

²² Heisi tounarouri Manoahni aiyei nuya shun, “Kakhu-shangramri shuimakni hirou leiyame, kouweiyo toulanungri, kane Dunpuya muwurlame.”

²³ Heiya aiyei nune anungei loushun, “Kounakpi Umpune kakhu-shangramya hiyerkni hoiyanungri, kaiyei meira hongbi makatkur anchumle trunwaiyei lung heiwari Ane loulhakpimakrou, heirou lhourap namma heikhi kanungei mutpimakrou; heirou kanungei asinungkhi anaksi lhou rapya shunpimakroume.”

²⁴ Heirouri napuiya heiwine chanapawa khat pukkurla, heitoubi aiyei min Samson toubine thulkur; heitoubi nao heine tangbaangkur heirouri Umpune aya kringpibi phor pikur.

²⁵ Heitoubi Zorah'le Eshta-ol tlakra klei Mahaneh-Dan ramra leiyeinung ayari Umpuei Lhawaini yukshuibini ukning thoubaangpikur.