PHILIPPIA 4 - KHYINGEI PU'TLOU Bible (BSI)

Shunmatupi

¹ Heiyanungri, keiyei teinaorap, nari keiyei malungshidui, heirou kalthi murilknine kanrellei kngaak keiyei nungkngai heirou tangchana bom khoi thimi rapme! Heinakei rongchanya nane Dunpura kanthrambi mayungrou dalei, keiyei malungamkna teinaorap!

Ukning Thoubaangpi

² Keine Eu-odia heirou Syntyche nakhuntanung bucha'kniri, malungshipibi nane khatle-khat Dunpura ukning khatsi khoine charcha-teinao rapme toubi yarilbi loulhakrillak.

³ Heirou keiyei malungamkna lhou'urkanrum thimirap, nanekhi napuiya rapya churtrungpilak; ngamri yanekhi keile kalhonne lhangai Pao-laa shunthutnara Clement'le keiyei lhou toumalkna paluirap heitoubi Dunpuei thimirap namyerwale lhou kalni churtrungpikhou. Yai minrap heiri khringei lailikra mayelhakbi leiyura.

⁴ Dunpu'le kalhonnei ngamrou nane haraowalo. Keine hanuikhi yunthulei. haraowalo!

⁵ Thimi napung kantangni ukning khnimya mutrillak. Ngamri Christa'ri khrangni yongrouwa.

⁶ Nane kouniroukhi lhawai lahmakne leiyalo, heiya lhoubom kantangrou naiyei madu heiya hoiyernanungei Dunpunung shunchalak, heitoubi kheenserrou nai ukningra mathangle kalhonne buchalak.

⁷ Heirou tlaipang thimine laamphachangmak Dunpuei kying heine Christa'le kalhonnei ngamrou naidoura karyomni leibi nai ukning heirou solung damkyer hoiniyasu.

⁸ Luilhaknara, keiyei teinaorap, keiyei kyunri nai ukningra lhangaiyei lhouya heirou mathangknaei lhouya khoulak. lhourap heiri chim, lhangai, ukningtang, khying malungshi'kna heirou rikrai khrumna kya heirapri.

⁹ Nane keiyei shunmatupinarei mayekloukur tloulhangrap heirou keiyei matupinarei marnoloukur lhourap heiya lhoukhoine touthutlak. Heirou kanungei yingkyer Dunpune naya kalhonpirou.

Hutthulrap Heinung'tlim Mathangkur

¹⁰ Kluiphane nane keinung malungshine lhou toupiwurnei ngamrou keine Dunpura heinung'tlim beimak nungwailei. Heina'douroukhi nane keinung'tlim heinakne malungshipinei lhouya haalnung mutpikhoumanungkhi heiwane keiya malungshimakme touneikhi nimak.

¹¹ Heitoubi nane keiya lhou hoipimakme tounei kyunkhi nimak, ngamri keinungei klei heinekhi keiyei kropil hoilei.

¹² Keine kmu touri bi kourou changnabom leilei, heitoubi bi kourou duine kro hoirouwo toubine mulei, ngamri keine ramrammei, heirou kounaksi kheen-kheenyei hilthungni, klei heirouwei chungya hoiyasu, nimanung chungmakya hoiyasu, keinungei pha'kyer heichane keiyei kropil hoinanungei heinaksi mideine muphamak lhou rapya keine marnowurla.

¹³ Heinakei lhourap namyerya douchangna'nungei Christa'ne keinungei mantrang piwurla.

¹⁴ Heiya keine klah dayeinung nane keinungei trungpikur heiri beimakne lhangaiyura.

¹⁵ Philippirei thimirap nane lhangaine kmu touri, bongnung keine Macedonia ramya lakurkhoubi Lhangai Pao-laaya shunthutpibi yenchayeinung, keiyei klah-mrim knangya mupibi, heirou keiyei kmaang-tungcha namrou siruk yapibi trungpikur heiwari nai Church'tomngei.

¹⁶ Heirou keine Thessalonica'ra leiyeinungkhi naiyei trungpikur heiwari hanuitomcha nimakne, duine nai hutthul rapkhi keinung yenmalhetpikur.

¹⁷ Heiyari keine naiyei hutthulrap heiwaya phaninei ngammeikhi nimak; heinungchumri keine naiyei lalya duiyerninei lhoume.

¹⁸ Heitoubi keiyei louphakur nai manthunpithung hutthulrap heiri arou keine shinbi leilei-heitoubi namma heiwane keinungri duine kropil hoiyura! Keinungei heipithungkur naiyei hutthulrap namyerwa heiri Epaphroditus'ne keinungei yenpiwurla. Hutthulrap heiri Dunpunung makatnarei khrim muiknam malan putnak hoilei, heirapne Anungei loulhak kya heitoubi malung khrahyer khrumna putnakni hoilei.

¹⁹ Heirou Christaei ngamne naiyei phabomthuk namma heiya Aiyei marpeikhounarei nanungei shungthutpirou.

²⁰ Kaiyei Pawa heirou Dunpunung klui naimakne Aiyei thangya alduikur hoilakasu! Amen.

Luilhakna Tlou Karyemthung

²¹ Christa Jesura Dunpuei thimirap na namyerwanung karyemthunglei. Heirou keile leikalhon thimi rapnekhi yaiyei karyemnei tlou manthunthunglei.

²² Dunpuei thimi rapnekhi, touri Krungbomrei klei thimi namyernikhi nanungei karyemnei tlou manthunthunglei.

²³ Pu Jesu Christaei kringpikhei heiri na namyerrei doura leipiniyasu.