PHILIPPIA 2 - KHYINGEI PU'TLOU Bible (BSI)

Christaei Rongchanya Muloukhei

¹ Naiyei rongchanya Christa'ne mantrangyerlei, heirou Aiyei malungshi heiwane naya malung damyerlei. Ngamri nane Lhawaile kalhonbi heirou na khatle-khat kringrilbi klah urkanrumrilbine leilei.

² Heiyanungri keine nanungei bucha'kniri, nai ukningra heirou lhawairakhi khatsi khoine malungshirilbi keiya nungwaiyerlak.

³ Heitoubi nai sharung nalnaiyei kning nimanung tangchaei ukningni koulhou khatkhi toumak, heiya naiyei ukningra khatya khatne duime toubi ningcharilbi ukning khnimni watlhouya toupirillak.

⁴ Heirou nane naitamei kningyatom chancha nimakne, mideiyei kningyakhi touyerlak.

⁵ Heirou nane Christa Jesunung klei youkna ukning heinaksini leiyalo.

⁶ Anungei Dunpuei youkna shakrung heihak klei, heiya Ane Dunpule malkname toubi muni lhou toukhoumak.

⁷ Heinung tlimri, Anungei klei namma heiwaya lakkurkhoubi, Ane shok khatdei toubomthuk lhouya toukhou. Ane tlaipang thimiyei rungkhlang khoine holbi, heitoubi tlaipang thimi'nakrimni paalkhou.

⁸ Ane ukning khnimni heitoubi khi phane kyun hilthungnei lamra chakhoubi heirou Ane Cross doura hipikur.

⁹ Heiyei ngamne Dunpune Aya chouduiyei bomra khaangbaangpikhou, heirou minlam namyerrouwei tangdui minya thulkhoupi.

¹⁰ Heiyanungri, thangwan-shimlei, heirou thleiril tlungni ringbi klei namyerwane, Jesuei min heiwarou khuklu kanthrunchabi khrummeirou.

¹¹ Heirou thimi nammane Jesu Christa'ri Pume toubi ai'aiyei murne yunthutdeirou, heirouri Pawa Dunpuei thangri duine alheirou.

Tlaipangra Kwaar'naksi Alyerlak

¹² Heiyanungri, keiyei malungshi'kna paluirap, keine nale kalhonne leiyeinung keishunya chanthungkhou heinakne, asinung keine nai hangrouwei tlatne leiwurbikhi nane keiyei kyunya chanthungpiyanungri duine lhangai hoirou. Heini nane naiyei kalpiya phawurnei lhouya pumpha heirou rongtlung hoiyernanungei lhou kalni toulak,

¹³ ngamri Dunpune naya Aiyei kningya touyernanungei kheenserrou nai hangra lhou toubine leilei.

¹⁴ Nane lhou kantangrou kansomakne, heirou rkalrilmakne toulak,

¹⁵ heiyanungri, nane borhyei tlaipang heirou lalcha tlaipangpal arou leiyeinungkhi, Dunpuei khying thimirap heirou rongtlung chanaorap hoirou. Heitoubi nari yaihangra leiyeinung sorwane nungthourei alkyer'nakni yayakhi waaryerlak.

¹⁶ Heinakni nane yanung khring chaanyei pao lhangaiya shunthutpilak. Nane heinakya toupilanungri, Christaei Tlaini hungeinung nanung'tlim keiyei tangchanungbom hoirou; ngamri heiwane keiyei lhoutoukur namma heiri leemne dongurmakme toubi mutrou.

¹⁷ Heineri, keiyei hee awari naiyei uklum heiya Dunpunung makatdeinung khrumna putnak makatnungei shungthutpiwurla. Heiwane heisi hoiyanungri, keiyei hakrao heitoubi nungkngai heiri na nammale pulni leirou.

¹⁸ Heinakrimni, nanekhi keile pulni hakrao heirou nungkngai hoiniyalo.

Timothy'le Epaphroditus

¹⁹ Dunpuei kning hoiyanungri, keine Timothya nai leinara khrangni heimalhet manerou toubine ningchalei, heiyanungri naingammei pao heiwane keiya ukning thoubaangyerrou.

²⁰ Keile klah doumalnabi klei, heirou ukning thoubaangbi klei, heitoubi naya kringpibi thikulpibi kleiri aitam'tomngei.

²¹ Heitoubi deideiri Jesu Christaei ngamrou nimakne, ai'aiyei karsuknanungtom ningchabi lhoutou thimithil.

²² Heirou nanekhi kmu touri, ari kounakbil karsuklei, heirou keile aleri lhou tounarakhi, Dunpuei paolhangai heinungei'tlim, pale chanakni kalhonne lhou toulei.

²³ Heini, keine keiyei lhouchil awaya thibine ayari nai leinara khrangni heimalhetna'nungei ningchalei.

²⁴ Heitoubi keikhi nai leinara khrangni wamanena'nungei toubi Dunpuya uklumni ningchabi leilei.

²⁵ Keine nanung'tlim lhou touyeinung pao-ur thimi khat khoine keiya trungpikhou, heirou klah-knang doubi lhou toumalnakhou, heitoubi kardoumalkna keipalui-raallui heirou keiteinao Epaphroditus'khi naileinara heiyilleise toubine ningchakhou.

²⁶ Anekhi na namyerya beimakne murilknine leilei heirou ane nawurnei pao heiwaya nanekhi loumayekurnei ngamrou ari beimakne nungwaimakne leiyura, heirou aiyei ukningra plangura.

²⁷ Touyari ari khi-khlangni nawurkhou. Heiya Dunpune aya kringpikur, heitoubi ayatom kringpikur nimakne keiyakhi duine kringpilei, heirou keinungei klahyei doura duine klah hoiyerkur.

²⁸ Heiyanungri, keine dui aya nai leinara khrangni heimalhetniyura, heisi toulanungri nane aya loumubi nai ukningra hanuikhi duine hakrao hoirou, heirou keiyei klahkhi kanchairou.

²⁹ Heiyanung, ayari Dunpuei minra hakraoni louropilak. Heitoubi thimi deiyakhi aya'nakrim rikrai khrumpilak,

³⁰ ngamri ane Christaei lhou tounarou, nane keiya trungpi manemakna lhou rapya ane churtrungnarou, aiyei chaanya hormaangkur kyane keiya trungpikur.