PHILIPPIA 1 - KHYINGEI PU'TLOU Bible (BSI)

¹ Christa Jesuei shikrap, Paul heirou Timothy'rei chethi aya mayebine- Philippira klei Christa Jesu'ya uklumkur Dunpuei thimirap heitoubi Church'yei lhou'urpu, laa'urpu raple Deacon rapnungkhi manthunthunglei.

² Kaiyei Pawa Dunpu heirou Pu Jesu Christaei kringpile heirou kying heikhi naidoura leiniyasu.

Paul'ne Dunpunung Bucha Heirou Chethi Loupa Thimi Rapya Mathangpi

³ Keine naya karyomni mayekthutlei, heinung'tlim Dunpuya mathanglei;

⁴ heitoubi kheenserrou keine na nammanung'tlim hakraole kalhonne buchapilei,

⁵ ngamri keine Dunpuei lhou churyoutirrei waiyoubine angtu ramphane, keine Lhangai Pao-laaya shunthutnara nane keinungei trungpikur heinungei'tlim mathanglei.

⁶ Heitoubi keine tanghakni kmu leilei touri, Dunpune heinakei lhangai lhouya naihangra youthutpiwurla, heitoubi Christa Jesuei tlaini phane luibongyen nane heinakei lhangai lhouya churkaryomlak.

⁷ Nayari keiyei ukningra karyomni mayekthutlei! Heitoubi anakei lhouri nanung'tlim keiyei ningthutbom thuk lhouhaklei. Ngamri na nammari keine Dunpuei lhounung'tlim hoiyanungkhi, heitoubi klah dawanungkhi heirou kulla chalphopbi leiyanungkhi Dunpuei phor phamalnakur thimirap hoilei.

⁸ Keiyei ukningra Christaei minra nanung'tlim khyukni ningchaleime toubi kyun ari Dunpune tloumayungpi hoiniyasu.

⁹ Keine shunchapilei touri, naiyei malungshi heiri duiduine katduiyerbi nane mukheine leinanungei toulaklo,

¹⁰ heiyanungri naiyei chaanrou lhangaiya khalthutkur manerou. Heisi toulanungri nane hyingmak lhoubom'rouwei heirou Christaei pichar tounei tlainirou klal theibaangnarei kartleikur manerou.

¹¹ Heirouri naichaan heiri Jesu Christa'rei phakur lhangaiyei thang rapya mupharou, ngamri heirapne Dunpuya mathangna hoirou.

Christa'ra Ringbi Klei

¹² Keine nayakhi muyerkniri kouweiyo toulanungri, keinungei thukkur lhourap namma heiri Lhangai Pao-laaya shunthutnara tanghakni trungpilei.

¹³ Heitoubi keine kulrilla klah-knang doubi klei awari keine Christaei shik hoinei ngamrou nanungei'tlim kleime touri Krungkul kngaak thimi rapnekhi heirou thimi dei nammanekhi muwurchila.

¹⁴ Heirou keiyei kulla leikur awane Dunpura keiyei teinao rapya malungamkyer, heineri yane kheenserrou Lhangai Pao-laaya shunthut'yeinung chinaimakne ukningra thoubaangyerlei.

¹⁵ Thimi thaneri karhouril leinei ngamrou Christaei Pao-laaya shunthut, heirou thaneri kngaal leinei ngamrou shunthutkur, heiya thimi deiniri ukningra shunthutkni leinei ngamrou chimya shunthutpilei.

¹⁶ Lhourap heiri malungshiyei ukning leinei ngammei toupilei, ngamri Dunpune keiya Lhangai Pao-laa heinungei'tlim mayungyerme touri yane kmu.

¹⁷ Heitoubi deiniri Christaei tlouya ukningra hyingmakne shunthutpi, ngamri, yaiyei ukningra nalnai heirou khramtangei lhouya ningchabi, keine kulla leiyei kheenrou duine klah dayernanungei khalbine toukur lhoume.

¹⁸ Heinakri koukhi nimak! Heiya lhou kantangrou heirou bom kantangrou Christa'ya shunthutkur heiwane chimmakna lhangrei hoiyasu, heirou chimna lhangrei hoiyasu, heinungtlim keiri kallengne haraorou.

¹⁹ Ngamri keiyei kmu leilei touri, koukouya hoiyanungkhi, na namyerwaei shunchapinei ngamrou heitoubi Jesu Christaei Lhawairei kyong trungpikur heiyei ngamne keiyari yulmakne kulrouwei malhetthutpirou.

²⁰ Keiyei kning heitoubi maduri keine keiyei lhourouwei yulmakne touchangnanung, kheenserrou, heiya duine asinunghak, keine krakne lhou churbine, keine hiya-ringa'nungkhi, keiyei chaan arou Christaya thang alyernanungei lhou tourou.

²¹ Rongchan touri kouwo toulanungri, keinungeiri Christa'ne khring chaan khoi, heirou khiyo touri duine tungchanabom khoi.

²² Heiya keiyei sharung awane ringleiyenri, Anung'tlim duine lhouchur manerou. Heisiya hoiyanungkhi keine kouya khalserouwo toulanungri, keiri mumanemaklei!

²³ Keiyari khintam thukni lunrilwura. Keine angtu ringbi klei chaan awaya lakurkhoubine, awaya duiyei lhangai chaanya phaneyura,

²⁴ heiya nanung tlimri keiyei ringbi klei awane duine lhangai hoilei.

²⁵ Keine tanghakni mulei touri, yulmakne keiyei rongchan awari tlane ringeirou, heitoubi nai uklumnei lhouya duine maibong lhangra tonlhakyerrou.

²⁶ Heineri keine nale hanui pulni leimalnayeinung, naiyei rongchanrou Christa Jesule pulni leinei tangchanungei bom hoirou.

²⁷ Asinung, keine lungkhoiyei yunkniri, naiyei rongchan heiri Christaei Lhangai Pao-laa hilthungni lhou toubi klei hoirouso, heiyanungri keine naya muphakhi kya muphamakhi kya, heirou nane pulni Pao lhangai heiwaya uklumnei ngamrou na namyerwane ukningra khatsi hoibine pulne mayungbi lhoubom khatnung nane kardourilbi leileime toubi keine mayekpharou.

²⁸ Nane naiyei yeekna thimi rapya chimakne leiyalo; heinung tlimri kheenserrou krakne lhou toulak, heiyanungri yari manemakrou, heiya nane manerouwa toubine yanekhi murou, ngamri Dunpune naya maneyerrou.

²⁹ Kouweiyo toulanungri, nayari Christaya uklumkyer tomni nimakne, Anungei'tlim klah-knang doubine Christaei watlhou churyerlei.

³⁰ Asinungri nane keile kalhonne raalbomra kardourilnung siruk louyalak. Raalbom heihakri yenyoukur kheenrou keine kardourilkur nane kmu, heirou mayekkhi mayekla, heine keiri asinung ramphane kardourilbine leileihui.