PHILEMON 1 - KHYINGEI PU'TLOU Bible (BSI)

¹ Christa Jesu'nungtlim kul chalphopbi klei Paul keile, heirou kai teinaowa Timothy'rei chethi aya mayebi- Kai palui, heirou lhou churmalnabi klei Philemon'nungle,

² heirou neicheemra kartilbi klei Khulbungei thimi rapnungkhi, heitoubi kaiyei charwi Apphia, heirou kaiyei lhou churmalnabi klei raalluiwa Archippus'nungkhi chethi aya mayepithunglei.

³ Kai Pawa Dunpu heirou Pu Jesu Christa'ne nanungei kringpibi kying hoiyerlaksu.

Philemon'yei Malungshi Heirou Uklum

⁴ Keiyei teinao Philemon, keine neinung'tlim karyomne mintlangbi Dunpuya mathangle kalhonne shunchabi leilei.

⁵ Ngamri Dunpuei thimirap namyerya neiyei malungshipi, heirou Pu Jesu'nung neiyei uklum klei heiri keinekhi mayeklei.

⁶ Keiyei bucha'kniri, kane uklum thimi khat khoine nangle kalhonne tilkril ari, kai chaan arou Christa'le kalhonne phor phabi klei heiya khyukne muduina'nungei hoiyasu.

⁷ Keiyei teinao, neiyei malungshipikur heiwane keiya beimakne nungkngai hoiyerlei, heitoubi keiyei ukningkhi thoulhakpilei! Heirou nangne Dunpuei thimirap namyeryakhi malung khrahyerlei.

Paulne Onesimus'nungtlim Philemonya Buchapikur

⁸ Ngam heine keiri Christara neiyei teinao khat khoine, neiyei toubomthuk rapya chaytloune shunmtupikurkhi kya.

⁹ Heiya keine neiya malungshinei ngamrou bucha'kniri, Christa Jesuei tlou shunthut thimi khat khoine, heirou asinungkhi Aiyei ngamrou kulla chalphopbi klei Paul keine,

¹⁰ Christara keiyei yukpuk chanapawahak khoine klei Onesimus'nungtlim neinung buchalei; ngamri keine kulla chalphopbi leiyeinung, keiri aiyei lhawaiyei Pa hoiyura.

¹¹ Bongnung kheen khatrou a heiri neinungei koukhatkhi karsukmak napawa khat louhoikhoukhi kya, heiya asinungri ari neinungkhi, heirou keinungeikhi beimak karsukni manril napawa khat hoiyura.

¹² Asinungri, keine aya neileinara yenyilmallenglei, heitoubi keiyei ukningkhi ale kalhonne hunglei.

¹³ Keine Lhangai Pao-laa'nungtlim kulla chalphopbi leiliyenri, ayari keipongra kalhonne khounilei, heisi toulanungri neiyei rungkhlangra ane keiya trungpirou.

¹⁴ Heisiya hoiyanungkhi neiyari keine taangkalne keiya trungpilak toubi yunnimak; heinungchumri, neiyei kning hilthungne keineri neiya touyerkni. Heisi toubine keine neiyei kning yaomakne koukhatkhi tounimaklei.

¹⁵ Onesimus'ne haalnungri neiyei bom'rouwei kheen beicha trukthutdurbi leiwurkhoularou, heiyanungkhi asinungri nangne aya kheenser'reinung loulhakpithulak.

¹⁶ Heirou asinungri ari shok khatnakni hoimakarou, heiya shokya duine malungamkna khat hoirouwa: heitoubi asinungri ari Christa'ra kringkna teinao khat hoiyura. Heirou a heiri keinungei kounakbil malungamkna hoilei! Heitoubi heiya duine neinungeiri shok khat, heirou Christara malungamkna teinaowa khatnak hoiyura!

¹⁷ Heisi toubi, nangne keiyari neiyei paluihakme toulanungri, nangne keiya louropi heinaksini ayakhi hanui kallengne loulhakpithulak.

¹⁸ Heitoubi kounaksi ane neinung klallei lhou touwurkhou leiyanungkhi, nimanung ane neinungei laltul tulwurkhou leiyanungkhi, namyerwa heiri keinungei sherbangpilak.

¹⁹ Arouri, keihut'hakne neinungei chethi aya mayepithunglei: Paul, keihakni neiyei laltulya mallengpirou. (Awari, nangne keinungei tulkurya klei nakrim ningthutyernei tloukhi nimak.)

²⁰ Heini keiteinao, Christaei minnung'tlim kringpibi Christara teinao'nakni keiyei buchakur awaya loulhakpilaklo!

²¹ Keiyei mayekur awaya nangne loulhakpibi, keiyei buchakur heiyakhi duine yulmakne loutoupiroume toubi tangne uklum leilei.

²² Heiyakhi duine hanuikhi bucha'kniri, keiyei wa'tlungna'nungei cheem khatkhi loumarshikniyalo, ngamri keiyei uklum leilei touri, Dunpune na namyerrei buchakur heiwaya rulpibine heirou keiyari naileinara hanui yenmalhetpithuweirou.

Kluiyei Karyemthung Tlou

²³ Keile Christa Jesu'nungtlim kulla chalphopbi leimalkna Epaphras'nekhi aiyei karyemthungnei tloukhi manthunthunglei,

²⁴ heitoubi keiyei palui Mark'nekhi, Aristarchus, Demas heirou Luke'nekhi naya karyemnei tlou shunthunglei.

²⁵ Pu Jesu Christaei kringpi heiwari na namyerwaei doura leipiniyasu!