PARMAL 8 - KHYINGEI PU'TLOU Bible (BSI)

Roushingya Kanyerkna

¹ Louninglak! Roushingne karyomne hut yaapbine unglei; heirou shingkhei ukningnekhi karyomne hut'tlangbi unglei.

² Roushing heini lampallei bungchounara mayungbine leilei, heitoubi ane lamsora mayungbine karyom ungbine leilei.

³ Khulilyei wachangna shumtrum-paalra mayungbine, heirou khukarthillei palshungra mayungbine karyomne ungbi leilei.

⁴ Ane atoubine yunlei: “O tlaipang thimirap, nanungei keine shunchalei, heirou tlaipangpallei thimi lim kantangnung keine muyerpilei.

⁵ Nari douwa hoileihuiko? Heiyanungri nane rongtlung thimi hoinanungei ninglhaklak; heirou nane yuntlungmak thimirap hoileihuiko? Heiyanungri nane mukhei thimi hoinanungei ninglhaklak.

⁶ Keiyei shunmatupikur manklu tlou rapya louninglak, keine nanungei shumpikur tlou rap namma ari chim tloudik.

⁷ Ngamri keimur awane chim tlouyadik yunlei, heirou mandallei tlou kyunri kaini yanimaklei.

⁸ Keimurrei yunthutkur tloulhang namyerwa ari tharmuchim tlouthil; yunthutkur tloulhangrap namyerwa heiri klal tlouri yaomak, heirou lam lehyerna tloukhi yaomaklei.

⁹ Mukhei thiminungeiri tlourap heiri kanre-kandanglei, heirou roushing klei thiminungeiri tlourap heiri chimdiklei.

¹⁰ Lapanung tlimri keiyei shunmatupi tlou rapya loulhaklak, heirou sinaya madunung tlimri roushingei chay rapya loulhaklak.

¹¹ Ngamri roushingo touri manklu sinayakhi duine lhangai, heitoubi neiyei madu manklu putchei nammaya marhilnabikhi roushingyari duimakrou.

¹² Roushingo touri keime, heitoubi sireikhei heikhi keinungei klei, Shingkheikhi keinungei klei heirou chimmei picharkhi keihutra klei.

¹³ Umpuya rikrai khrumknawo touri lhangaimakya machinya kyun, heitoubi ukningra tangchaei lhouya, napaltou, lhangaimak lam heirou mandallei tloulhang rapya keine machinlei.

¹⁴ Roushingya shunmatupinei lhouri keinungei klei, heitoubi keiyei lhou tounara mukheine heirou ukningra krakne toulei.

¹⁵ Krung rapne pu khoine thrungei kheenroukhi keine trungpi, heitoubi ram-kngaak pu rapbei urnungei chimmei picharya keine pilei.

¹⁶ Tlaipangpallei Krung rapkhi, heirou lhouwa rapkhi, heirou Picharpu rapnekhi keiyei trungpinei ngamrou yane paalmane.

¹⁷ Keiya malungshi thimi rapya keine malungshipilei, heitoubi keiya lhou khoine rapha thimi rapne keiya raphamurou.

¹⁸ Laldunkhi, rikrai-khrumknakhi keinung klei; heitoubi lalthum chunglhakneikhi, heirou chimmei lamra toumanekhi keiyei.

¹⁹ Nane keirouwei phaloukur hei heiwari meira iklhakbi alyerkur sinayakhi duine lhangailei; heirou lapa-thiryakhi duine lhangailei.

²⁰ Tharmuchim thimi rapbei chana lam heiwari keiyei, heirou keine tharmu chimmei lamra chalei.

²¹ Keiya malungshi thimi rapya keine laldun thimi hoiyerpilei, heingammei yane sina-lapa marthumni pharou.

²² Umpune tlaipangpalya sheemthutyeinung keiya lamkrine sheempikur, kheen kounakei maibongrei waiyoubi Aiyei hutsa rapbei hangra keine lamkri.

²³ Tlaipangpal sheemthutbongei waiyoubi Umpune keiya sheempikur, heirou shimlei-thangwan kanrebongei lamkrine keiya sheempikur.

²⁴ Samadruya sheembongei Ane keiya sheempikur, Kung rapya yui chanyerbongei Ane keiya sheempikur.

²⁵ Lhunglim kounakya sheemthutbongei, heirou yaya bi chane phunkhoubongei lamkrine Ane keiya sheempikur.

²⁶ Umpune tlaipangpalya heirou heiyei lhunglim phaikar kounakya sheemthutbongei, nimanung heiyei rilla ringbi klei chiwi rapya sheemthutbongei keiya lamkrine sheempikur.

²⁷ Umpune nungthouya sheembine heirou aiyei bira khoupiyei kheenroukhi kei kyao; heirou ani samadruya holmarkheyei kheenroukhi kei kyao.

²⁸ Umpune nungthoura ramei sheemyeinungkhi kei kyao; heirou Ane kung rapya yuina putthutyerreinung kei kyao.

²⁹ Samadruya Aiyei markhepinaya katmartlao duimaknungei chay piyeinungkhi, heirou tlaipangei cheemmun thulyeinung kei kyao.

³⁰ Heirouri keine cheemsa thimi khatnakne Umpuei pongra ombine heiklei, heirou keiya louthibi Aiyei haraonabom hoikhou; heitoubi keinekhi Umpuei pongra leinei ngamrou beimakne nungkngai.

³¹ Heirou tlaipangpalya thrilthibi Ane nungkngai, heitoubi tlaipang thimi rapya thibi Ane malungpilni haraokur.

³² Asinungri, douwarap keiyei kyunya louningpilak, heirou keiyei shunmatupiya hilthungbine lhou toulanungri nane nungkngai pharou.

³³ Nanungei shunmatupi tlou rapya nane ninglhaklak, heitoubi roushing kleini mukhei thimirap hoiyalo; roushingei tlouya lhou hoimakri toumaknea.

³⁴ Keiyei shunmatupiya hilthungne lhoutou thimirap heiri nungwairou- tlainiser keiyei lamsora heirou keicheemyei shumtrumra keiya karngeibi klei thimi rapri nungwairou.

³⁵ Heitoubi keiya phakur thimirap heiri khringei chaanya phakur thimime, heirou Umpune aidoura malung khrahpirou.

³⁶ Heiya keiya karhayei lhoutou thimirap heiri ai'msha-aitamya maangyerkna; heirou huhuni keiya madumanungri khiya rammei lamra chakur thimi.”