PARMAL 4 - KHYINGEI PU'TLOU Bible (BSI)

Roushing Kleiyei Lhangai

¹ Keiyei chanapawa, neipawaei shunmatupi tlou rapya ukningra lhou khoine ninglhaklak. Neiyei khnara ninglhaklak, heiyanungri nane mulhakchangrou.

² Keine nanungei shunmatupi tlourap awari lhangaiyei tloudik, ngam heini kheenserrou nane keiyei shunpikur tlou rapya malummakne ningthutlak.

³ Keiyei nuwi-pawaei khatchatom khoi chanapawa khat khoine, heirou nuwiyei malungamkna douwa khat khoine tangbangnung,

⁴ Kai pawane keinungei shunmatu-samatubi, heirou ani asitoubi shunpikhou: “Keiyei shunmatupikur tlou rapya ningthutlak; heitoubi kouniroukhi heirapya malummurbi lakurkhoumak. Keine neinungei shunmatupikur tlou rapya hilthungne lhou toulak, heitoubi pulchini ringnanungei lhouya toulak.

⁵ Roushingya phananungei heirou mukheiya hoinanungei toulak! heirou roushingya nane malungshilak, heiyanungri naya ani shuikngam leiyermakrou.

⁶ Roushingya horkhounak, kouweiyo toulanungri ani neiya loushoupirou; roushingya malungshilak, heirou ane naya ngaaksilpirou.”

⁷ “Roushingya raphalhakri lung khoiyei lhou; heitoubi neiyei raphalhakur lhourap nam'rouweikhi mukheine raphanungei toulak.

⁸ Roushingya malungshilak, heiyanungri ane neiya tangyerpirou, heirou roushingya rkolphopbine khoulak, heiyanungri ane neiya rikrai-khrumknaya phayerrou.

⁹ Roushingne neinungei parrui khoine, heirou neilura thang'allei lukhup khoine makhupbangpirou.”

¹⁰ Keiyei chanapawa, keiyei kyun tlou rapya loulhaklak, heiyanungri nane chaan tlani ringchangrou.

¹¹ Keine nanungei roushing touri kounako toukhi shunpiwurla, heini ringnanungei lamkhi shunmandopiwurla.

¹² Nane shingkheini chawanungri nai maibongra koukhi loumayungchangmakrou, heitoubi nane chanbikhi thikmathuibi kanelwurmakrou.

¹³ Naiyei marnoloukur tlourap namyerwa heiya kheenserrou malummakne ningthutlak; naiyei marnokur namyerwa heiri chut naimakrou lalthil, heineri heirapya hormangmakne chetni rkolphopbine khoulak.

¹⁴ Lhangaimak thimi rapbei karwaichana lamrakhi karlhakmak, heitoubi yaiyei lhangaimak lhou rapyakhi mulouheimak.

¹⁵ Heinaksi lhangaimak lhou rapya toumaknanungei kartleiwurlak, heirou lhangaimak lhouya toumak, heitoubi yane naya heilhangra chananungei chilbikhi chanthungmak, heinung'tlimri tlatni kartleinanungei marshiklak.

¹⁶ Lhangaimak thimi rapri klallei lhoukhat toubongyenri iplhakchangmak; yane thimi hukhatya thikmathuiyerbi kanelyer'bongyenri iplhakmakne karngeirou.

¹⁷ Lhangaimak lhou touya heirou klallei lhou touya yanungeiri chanung-mainung putnakne ukningra ningchabidik klei.

¹⁸ Tharmuchim thimi rapbei chana lamri kinniyei alnakrimni, tlaini khuwaarbongyen heishi albidik klei.

¹⁹ Lhangaimak thimi rapbei lamri masa kmehnakne mehbidik klei. Yane kanelwurbikhi, kouni yaya thikmathui'kyerro toukhi yane muchangmaklei.

²⁰ Keiyei chanapawa, keiyei shunmatupi tlou rapya ninglhaklak, heirou keiyei tlou rapya malumkur toumakne ningchalak.

²¹ Tlourap awari neiyei mit'thrilna'rouwei chutduryermak. Heirou kheenserrou ningthutbi neiyei ukningra khoulak.

²² Ngamri heirapya loulhakkur thimi rapne khringchaan pharou, heitoubi aiyei rongchankhi lhangai-nungkngai hoirou.

²³ Nai ukningrei ningchabi klei namyerwa heiri chim-chimmako toubi tirithilak, heitoubi muheiyalo; ngamri naiyei rongchan heiwari nai ukningrei ningchabi klei heirapne thuithi'kyer nimanung lhangaikyer.

²⁴ Kouniroukhi chimmakei tlou rapya neiyei murrouwei kathukyermak. Mandalbi minamnei tloukyun heirou klalya yunbine lam lehkyer thimiyari tlatni theiwurbi leiyalo.

²⁵ Ukning khyingne neiyei mitthril maibong lhangra khoulak, heitoubi rikraiwurbi lu-shikhuplhakbi leiwurmak.

²⁶ Neiyei lhoutouna kantangrou lhangaine ningmarshikbi mukheine toulak, heitoubi neiyei touthutkur lhou kantangrou lalmaknanungei toulak.

²⁷ Lhangaimak lhou rapya lakurkhoubine tharmu chimmei lamra wachangnanungei toulak. Heitoubi tharmu chimmei lam'rouwei neiyei hokar tatkartlikbi thyara nimanung thyoi lhangrakhi karlhakmaknungei muheiyalo.