PARMAL 31 - KHYINGEI PU'TLOU Bible (BSI)

Krung Khatnungei Shunmatupi Tlourap

¹ Krung Lemuel'nung aiyei puiwine shunmatupikur tlou rapya mayethutlei:

² “Nangri keiyei kringkna chanapawa; heini Dunpunung shunchabine neiya hungpuk; neinungei keine kouya shunpiserou?

³ Chorit naimak napuiyara neiyei sharungei mantrangya leemni dongyermak; heitoubi heinak napuiyakou kalhonbi neiyei lalya leemne maangyerwurmak; ngamri heinaksi napuiya rapne Krung rapya thang maangkyer.

⁴ Neiyei ukningra tlou khoine louninglhaklak Lemuel, kouweiyo toulanungri Krung rapne tul mongmalipbi leinungbom nimak; heitoubi tulya mongkniyei ukningkhi leinungei lhou nimak.

⁵ Yane tul mongmalipbi leiyei kheenrou pichar tounei ayilya malumkur; heirou kanring-kanwai thimi rapbei klahyakhi ningthutpimakne malumkur.

⁶ Maangurou kyou thimi rapne tul mongkurkhi kya; heitoubi beimakne lhawai lahkur thimi rapne tul mongkur kya.

⁷ Yane tulya mongmalipbi lhawai klahya malumkurkhi kya.

⁸ Tlou yunheimak thimi rapya yunkalpilak; heitoubi tounaram mak thimi rapya hirou younarei kalthutpilak.

⁹ Kanring thimi rapnung'tlim tlou yunpilak; heitoubi chimmei picharya toupilak. Heirou tounaram mak thimi rapbei, heirou mralmak thimi rapbei phabom thukya phayerpinanungei lhou toupilak.”

Manklu Napuiya

¹⁰ Manklu napuiya khatya nunungei loukmuri kounak kluni thuk? Heinaksi napuiyari manchung sina-khrulyakhi duine manklu.

¹¹ Aiyei shalne ukningra aya beimakne malungampi; heitoubi anungei koukhatkhi kwatsam makrou.

¹² Ane ringleiyenri aiyei shalya lhangaine watlhou toupi, heitoubi ani lhawai lahyerkhi maklei.

¹³ Aihutne yaa'khmulyei punshelle phaikhringei punshelkhi yekbine pi'uplei; heitoubi lhou churyeinungkhi yrathi naimak.

¹⁴ Lal'hol thimi rapbei malinakne, ani ram tlanarei cheemra chaanung-mainung yentheimallongpilei.

¹⁵ Ane tlaini khuwaar-bongnung kanthoubi chanao rapbei chaanung- mainungei chaak-anya thungmarshikpi; heirou shok-napuiya heiwiya koukouya churnung-paangnungei watlhou rapkhi shunmandopi.

¹⁶ Ane ram biya thimallobi lou trunnanungei bomkhi lolhaklei, heirou aiyei raphalhak tuyni darkha yekulkhi lolhaklei.

¹⁷ Ai'mshane sirei kheiya marnobi karyimmakne lhouchur- lhoupanglei.

¹⁸ Aiyei lal holbine yenlhakkur putcheirap namyerwa heiri man kluthilme touri ane mulei; ane masa yantrim-ramphane karyimtou naimakne ipbongnung lhou pangkhou.

¹⁹ Ane muiphai shinbine phi'up-phirulkhi yeklhaklei.

²⁰ Kanring-kanwai heirou tounaram makne klah thimi rapya ari kringpikhei.

²¹ Phalbi thur dayei kheenroukhi ani lhawai lahpimaklei; ngamri aiyei bommaira yaa-khmulyei punshel marthumni klei.

²² Ane khumdou-philhamkhi heirou upnungei khumdou-phitho rapkhi phaikhringei punshelyadik yeklhaklei.

²³ Aiyei ngamrou aiyei shalyakhi khulbungni shak mupilei; heirou yama-krung rapbei hangra omthungbikhi mine rikrai- khrumkna.

²⁴ Ane yayekbi heirou phai'khringei kungoirei yekbine lal'hol thimi rapnungei louyorpi.

²⁵ Ari yra thimaklei, minekhi rikrai-khrumkna, heirou hillei hungrou kyou chaan heinung'tlim koukhi lhawai lahpimaklei.

²⁶ Aiyei murni shingkheiyei tlouya yunthutlei; heirou aiyei maleira kringpi kheiyei tloulhang urchalei.

²⁷ Ari kheen'serrou lhouchil napuiya khat khoi; heirou aiyei bommaiya kwatsam maknungeitom thikulbi klei.

²⁸ Aiyei chanao rapne aya kluni toupilei; heitoubi aiyei shalnekhi aya chouni mathangbangpilei.

²⁹ Aishalne kyun, “Napuiya kounak chungni cheemrei lhangai nu louleikhi kya, heiya yanaksi nam'rouwei nangne dui lhangailei.”

³⁰ Tlaipangei shakrung lhangai heirou karyuiknayei mairungri maangurheirou, heiya Umpuya chi-rikraiyei lhoutou napuiya khatyari mathangpibom thuk.

³¹ Heinaksi napuiya khatdei churpaangnei klah-manya ningmupiri lhangai, heirou thimi kantangne aiyei lhou rapya kanthangpibi rikrai-khrumpibom thuk.