PARMAL 3 - KHYINGEI PU'TLOU Bible (BSI)

Douwa Rapya Shunmatupinei Tlourap

¹ Keiyei chanapawa, keiyei shunmatupi tlou rapya malummak. Heiya keine naiyei tounungei shunmatupikur tlou rapya kheenserrou nai ukningra ningchabidik leiyalo.

² Ngamri keiyei shunmatupikur tlou rapne nai rongchanya pulchiyerrou heirou nungwaiyerrou.

³ Kringpi kheile malungamknaei lhou heiri kouniroukhi nairouwei lakhouyermakrou. Heirapya mayethutbine naiyei ngakhungra manyarchalak, heitoubi heirapya nai solungra mayelhakbi khoulak.

⁴ Nane heirapya toulanungri, Dunpunekhi heirou thimi rapnekhi naya malung khrahpirou.

⁵ Neiyei ukning-lhawai khintamrekni Umpuya malungamlak. Heitoubi neitammei ukningrei shingkheiyatom malungambi nanchawurmak.

⁶ Heiya neiyei lhoutouna kantangrou Umpuya malungambi lhou toulak, heiyanungri Ane neinungei tharmu chimmei lamya shunmutpirou.

⁷ Neitamtomni shingkheime toubi ningchawurmak, heiya Umpuya rikrai-chiyalo, heirou lhangaimak lhourouwei trukthutlak.

⁸ Heiwani nanungei sharung kna damnarou, heirou neiyei thru rapra kna raikyer nakrim hoirou.

⁹ Umpunung neiyei lal namyerwa heirou neiyei ramrei thukbi klei trunwairap nam'rouwei hutlha hei rapya makatbine Aya rikrai-khrumkna mutbine malung-khrahyerlak.

¹⁰ Heiyanungri neiyei chapong kanthrityermakrou, heitoubi neiyei mongnungei darkha yuikhi watyermakrou.

¹¹ Keiyei chanapawa, Umpune naya chimyerpiyei kheenrou nane lhawai-kyaoni ninglhaklak, heitoubi heinaksi tlou rapri mukheine leinanungei shunpikur tloume toubi ningchalak.

¹² Pawaei tangchana bomkhoi chanapawaya raakpinakne, Umpune Aiyei kringpi thimi rapya raakpilei.

¹³ Roushing klei thimi heirou mukhei thimi heiri nungwailei.

¹⁴ Roushingya leiyanungri lapayakhi duine lhangai, heirou anungei sinayakhi duine manklu hoilei.

¹⁵ Roushingni manklu thlungyakhi duilei, heitoubi neiyei madu manklu putchei nammaya marhilnabikhi roushingya duirouri koukhatkhi maklei.

¹⁶ Roushingni neiya pulchiyerrou, heitoubi roushingle kalhonne lalkhi heirou rikrai-khrumknakhi pharou.

¹⁷ Roushingni naiyei rongchanrou nungkngaiyei lamra ruipilei, heitoubi naya koukhatkhi shuikngam makne ane ruipilei.

¹⁸ Roushingya rkolbi klei thimiri khringei heengtrungya phakurnaksi, heitoubi roushing klei thimi rapri nungwairou.

¹⁹ Umpune tlaipangpalya roushing kleini sheemthutpikur, heitoubi Ane mukheine thangwanya bi chutyermakne khoupikur.

²⁰ Aiyei roushingne kungra yuikhi kungkyer, heitoubi thleira nung rosundanungei nungthoura rameikhi sheempikur.

²¹ Keiyei chanapawa, roushingya nairouwei thukkuryermak, heitoubi nanungei klei shingkhei heiwaya khingurkhoumak. Heirap namyerwa heiri nairouwei lakurkhouyermak.

²² Heirapne nanungei khringchaan hoiyerrou, heirou naiyei ngakhungrei nacha khrulnakne shuikngam koukhatkhi makne nungkngaiyei chaan hoirou.

²³ Heiyanungri naiyei chaanlamra koukhi shuikngam makrou, heirou naiyei hokarnara kouniroukhi thikmathuinungbom makrou.

²⁴ Nane omyei kheenroukhi koukhi chinungeibom makrou, heirou masantan nungkngaine ipchimkur manirou.

²⁵ Khril lhangaimak thimi rapne loumuthungmakne noryeinung, nimanung lhimnung- nimanung naya maangyeryei kheenrou, heirou klah-knang hunganung chiwurmak.

²⁶ Ngamri Umpune naya silpirou. Heitoubi Ane naya changra manwurnungei ho karlhakyermakrou.

²⁷ Nane maniyei kheenrou, kanring-kanwai thimi rapne tounaram makyeinung churtrungpirou yra thimak.

²⁸ Kounaksi nane angtuhak churtrungpi manirou lhou leiyanungri neiyei cheemlhun thiminung ningahil trungpiyeise toubi loukarlhaheimakne wattoupilak.

²⁹ Neiyei cheemlhun thimi rapbei khril nananungei lhou toumak. Yari naya ningmalungambi naipongra klei.

³⁰ Naya mangnanungei lhou koukhi toukhoumak thimi rapyari, koungamkhi maknarou tlou rkalrilmak.

³¹ Lhangaimak thuithiyei lhouya toubi klei thimi rapya horthimak, heitoubi yai toubi klei lhangaimakei lhou rapya nanekhi touweise toubikhi ningchamak.

³² Ngamri Umpuri lhangaimak lhoutou thimi rapya machinlei, heitoubi tharmu chimmei lhoutou thimi rapyari Umpune Aiyei pongra ruilhakpi.

³³ Umpune lhangaimak thimi rapbei bommaira klah-knang dananungei manchopi, heiya tharmu klei thimi rapbei cheemmaiyari Ane phor pilei.

³⁴ Khril-lhangaimak thimi rapyari Umpune karhallei, heiya ukning khying thimi rapyari Ane kringpilei.

³⁵ Shingkhei thimi rapne rikrai-khrumknaei minthulya pharou, heiya muheimak thimineri yentouheina lhou kantangrou rikraiknaei bomyadik pharou.