PARMAL 29 - KHYINGEI PU'TLOU Bible (BSI)

¹ Kheenserrou klalya touchimpiyei kheenrou malungkha thimiri, nungkhatnuiri kanelwurbi kanthouchang'makne leiwurheirou.

² Tharmu chim thimine pu hoiyei kheenrouri thimi rapne nungkngai; heiya lhangaimak thimine pu hoiyei kheenrouri thimi rapne lhawai klahni kanrillei.

³ Roushingya malungshi thimiri aya yukpukpi pawaya haraokyer; heiya chorit naimak napuiyanung tuy leemni hormangkur thimiri karsuk thimi nimaklei.

⁴ Krung khatne tharmu chimni lhou toulanungri aiyei ram mantranglei; heitoubi krung heiwane tuiyadik maduphalanungri aiyei ram heiwari yenmangeirou.

⁵ Pluisopha rapbei maibongra mandallei tlouya kyun thimiri ai'msha-aitamya mannanungei chaang kamkna.

⁶ Lhangaimak thimiri yai touthutkur borh lhourap heini manphoprou; heiya ukning khying thimiri yai touthutkur lhangaiyei lhou rapne nungwaiyerlei.

⁷ Tharmu klei thimine kanring thimi rapbei phabomthuk sirukya ningmupilei; heiya lhangaimak thimi rapneri heinaksi koukhi muphachangmak.

⁸ Miya lhouhoipimak thimi rapne khukarthil khatya meiwaira khinglhakurbi klahra dayerwurlei; heiya roushing klei thimi rapneri yingyernanungei lhou toulei.

⁹ Mukhei thimi khatne yuntlungmak thimi khatdei doura tlou makatdei kheenrou, yuntlungmak thimi heini malungkhanarou kansobidik leirou.

¹⁰ Hut mraokur thimine tharmu chimmei lhoutou thimiyari machin; heiya tharmu chim thimineri heinaksi thimiyei lhangaina'nungtom ningchapilei.

¹¹ Yuntlungmak thimine malungkhawanungri yulkhouchangmakne ungraothutdurlei; heiya roushing klei thimine kanthram kheile kalhonne malungkhaya minungei muyernimakne yulkhoukur manilei.

¹² Lim khatdei doura pu khoi thimi khatne mandallei tlouya ninghaklanungri, aidaakrei klei lhou'ur purap namyerwakhi mandal thimirap hoiwurchirou.

¹³ Kanring thimi khatle heirou aidoura marhotpi thimiyei tlakra khatnakdik khoine hutthul khat leilei, touri Umpune kwaar heiri yakhuntayei mit'thrilnara khatnakdik khoine piwurla.

¹⁴ Kounakpi krung khatne kanring thimi rapya chimni pichar toupilanungri, aiyei krungbom heiwari pulchirou.

¹⁵ Shunmatupi heirou klal touchimpi tou heiri douwa rapnungri beimakne lhangai, heiya douwa rapbei toukniyadik touyerbi malhetdurlanungri yaya yukpukpikur puiwini rikrai phaeirou.

¹⁶ Khril-lhangaimak thimine pichar pu hoiyeinung kngaal'ok thuk, thimi hatkril katduirou; heiya chimmei lhoutou thimineri heinaksi thimi rapbei dalhakurya thibine leilei.

¹⁷ Neiyei chanapawa heiya shunmatupibi raakthunglanungri, neiyei tangchanabom hoirou; heitoubi anekhi neiya nungwaiyerbi rikrai phayerpimakrou.

¹⁸ Umpuei lam ruipiya yaomak lim rapri ayillei lhoulamra biso naimakrou; heirou Umpuei chay hilthung thimiri likarsui lhangairou.

¹⁹ Shok khatya murnitom shunmatubi chimyerchangmakrou; heirou ani kyunya louningbikhi kouniroukhi ukrei tlou khoine chanthungbi lhou toumakrou.

²⁰ Lhangai-lhangaimak toukhi khalthimakne tlou yunthutkur thimi heinung'tlimri, yuntlungmak thimine dui lhangai louhoikhi kya.

²¹ Shok khatya douwei youbi aiyei kningyadik thulbaangpilanungri, nungkhatnuiri shuimakne neiyei klei lal namyerwa lungloueirou.

²² Malungkhater thimine kngaal'ok thukyerlei heirou thuithiyei klah-knangei bomra dalhakurlei.

²³ Thimi napung khatne tangchanei ngamrou kmaangya nimakne deiri koukhatkhi phamakrou; heitoubi ukning khnim hoiyanungri mine rikrai-khrumpirou.

²⁴ Muchatang thimi khatle palui khoiri anakrimni mucha tangrou; heirou ani pichar maibongra chimmei tlouya yunthutlanungkhi tanti pharou, heitoubi yunthutmakanungkhi Dunpuei manchoya pharou.

²⁵ Tlaipang thimiyei kyunya ningmalungambi leiyanungri thuithinara dalhakurkhi mumanmak; heiya Umpuya malungkngam hoiyanungri shuikngam phamakrou.

²⁶ Thimi kantangni pu khatdei kringpi'kheiya phanithil; heiya thimi khatne tharmu chimmei lhouri Umpureitom phamanirou.

²⁷ Tharmu chim thimine lhangaimak thimi rapya machinlei; heitoubi lhangaimak thiminekhi tharmu chim thimi rapyari machinpilei.