PARMAL 23 - KHYINGEI PU'TLOU Bible (BSI)

-(6)-

¹ Nangne bomtang thimikou chaak-chaamalna'nungei om'kanthrinyei kheenrou, nei maibongrei om thimi heiri kounaksi touri khminne shak murou da.

² Kounakpi nangne beimakne msulbikhi, loudourirou da;

³ heitoubi neimaibongrei tuirouroro dunthutpikur chakluk-anluk heiwirou kraothukni madumakrou da; ngamri ani neiyei ukningya martambi thinanungei marshikthutpikhi kya.

-(7)-

⁴ Laldun thimi kansabi malleni kansambi heirou tuiyadik chamaibi yuntlungmakna chaangra manwurmak'nungei muheiyalo.

⁵ Malaangne sha yaapbi nungthou lhangra traibaangkur'naksine naiyei lalthumrap heiri lepcharou luilhakkur kya.

-(8)-

⁶ Manser thimi rapbei chaak-ungnara chanthungurmak, heitoubi yai marshikthutpi chaak-an mnik rapya maduwurmak.

⁷ Aiyei murneri, “Ukthoni yukcharilaklo, nimanung lhakpithueise,” toubi neinungei heiyun karsarou, heiya aiyei ukningrari neiya ningmupimakrou.

⁸ Heiya hillouri neiyei chalhakloukur heiyakhi pathutniheirou; heirou neiyei anungei mathangpikur tlourap heiri koukhi karsukmakrou.

-(9)-

⁹ Yuntlungmak thiminungeiri roushingei tlou kluya yunpimak, ngamri heinaksi tlou rapya ani mulhakchangmakrou.

-(10)-

¹⁰ Bongei tara rapbei bunkhou ram karchunna ri'thlungya phuichutdurmak, nimanung pui-pa mak saracha rapbei ramyaa lungloupimak.

¹¹ Ngamri Umpune yayari lhangaine ngaaksilpilei; heitoubi yanungei'tlim Umpune kalhopbi neiya karhane lhou toupirou.

-(11)-

¹² Marnopi pu rapbei shunmatupi tlou rapya ukrei tlou khoine ninglhaklak, heitoubi manileiyen lhangaiya marnonanungei toulak.

-(12)-

¹³ Douwa rapya shunmatupiyei kheenrou chi-khyamak, douwa rapya bikbaini umbi shunmatupikur heiwini hinanungei umkur nimak.

¹⁴ Heinung'tlimri bikbaini umbi shunmatupikur heini yaiyei rongchanya kalpirou.

-(13)-

¹⁵ Keiyei chanaorap, nane shingkhei thimirap hoiyeinung keikhi ukningra nungwairou.

¹⁶ Heitoubi naiyei murni roushingei tlouya yunyeinung, keiyei hakraori shunnungei makrou.

-(14)-

¹⁷ Borhyei lhoutou thimi rapya madubi horthiwurmak, heinung'tlimri kheenserrou ukningra Umpuya chi-rikraine lhou toulaklo.

¹⁸ Heinakya toumaneyanungri hillou neiyei rongchan hungnungwainei malungamkna leiheirou.

-(15)-

¹⁹ Keiyei chanaorap, kyunya ninglhaklak, heitoubi naiyei ringbi klei rongchanyei ngamrou khminni ningchabi shingkheini leiyalo.

²⁰ Tul malipkal thimi rapkou karnakrilmakne leiyalo, heitoubi chamainara chorit naimak thimi rapkou palui hoimak.

²¹ Ngamri tul malipkal thimi rapri, heirou chatek-maitekkal thimi rapri shuimakne kanringeirou; heitoubi nane chamalip- mongmalipbi ipbidik leiyanungri hillouri phichun upbine hungdongeirou.

-(16)-

²² Naya yukpukpikur pawaei tlouya ninglhaklak, ngamri naiyei pawa louleikhoumanungri naya loupuk'khoumakrou. Nai nuwini yentarranungri aya khingurkhoumak, heiya aya kluni toupilak.

²³ Chimya, roushingya heirou mukheiyei marnopinei tlou rapya loulhaklak, heitoubi heirapya yorwurmak. Ngamri heirapya yorwurlanungri yunnungei makne kmang hoirou.

²⁴ Chimyei lhoutou chanao rapbei pari nungwaimakrouri koukhi maklei, shingkhei chanaoya pukthutkur pa heiri tangchanabom.

²⁵ Naya thiyerbine naiyei pui-pa rapya haraoyerlak; heirou naya yukpukpikur nuwiya nungwaiyerlak.

-(17)-

²⁶ Keiyei chanaorap, naiyei ukningya keinungei pilhaklak, heitoubi nane ukrei lhou khoine thibi keiyei rongchanya naiyei mulouheinabom hoiyerlak.

²⁷ Ngamri chorit naimak napuiya rapri khru-kyak frulnaksi, heirou shal-naimakne kyor napuiya rapri khur utyukkhounaksi.

²⁸ Mucha thimine miyei putchei muchanungei mrimnaksi yane naya karngeibine leilei; heitoubi yaihutra napawa kounak chungwakhi maangyerkur manilei.

-(18)-

²⁹ Tul malipkal thimi rapri, heirou tul ranyadik chancha thimi rapri, ukningra hakrao makrou; lhawai klahkhi raikur makrou; heirou yai sharung rapkhi koukhi karsukmakne mangrou;

³⁰ heitoubi tlou kyunkhi bichip naimakne yunchungrou; heirou kheenserrou yaiyei mitlungri mraobidik leirou.

³¹ Tulne naya kulchalyermak; tul heiri kepra fleithutbi thiyei kaalnung kimkhi mraone murou, lhangaikhi lhangairou; heiya monglhakei kaalnungkhi mnikrou.

³² Heiya thangei ningshun heirouri naya frulne chikkurnakne nai sharungra yertomne naheirou.

³³ Heitoubi nai mitlungkhi dolde thukbi mit mingnimakrou; heirou nai ukningrakhi biso-bibal naimakrou; heitoubi nai tlou kyunkhi purpar naimakrou.

³⁴ Heirou nai sharungri samadru dourei mali tungbi kanhaichakur heinakne ningmurou.

³⁵ Heirouri naiyei murne yunrou, “Keiyari mine ummurla, heiya keiri koukhatkhi mayekthungmak. Keiri koungamei kanthou manimako; kanthoubi hanuikhi tul mongthurouwa.”