PARMAL 22 - KHYINGEI PU'TLOU Bible (BSI)

¹ Tlaipangpallei laldunya phanung'tlimri lhangaiyei minthulya phananungei raphalak. Miyei kringpi kheiya phakurotou heiri sina-lapa phakuryakhi duine lhangai.

² Laldun thimi rapyakhi heirou kanring thimi rapyakhi Umpune khatnakdik khoine sheempikur, heirou ya heiri koukhi kartlikril maklei.

³ Khyal klei thimine hillei hunglarou heiwaya mubi kartleinanungei marshiklei, heiya khyal yaomak thimineri heiwaya mumakne lhou toubi hillouri lahnara heishi hungdalhakurlei.

⁴ Umpuei kyunya chanthunganung, heirou ukning khneemne heirou Aya chi-rikraine lhou toulanungri, laldun pharou; minekhi rikrai-khrumpirou, heitoubi pulchinekhi paalpharou.

⁵ Lhangaimak thimi rapbei chana lamri lhangaimakei chaangni thim, heiya rongchanyei hokarya mukheine karthimi heiri heinakrouwei tlatne trukkurlei.

⁶ Douwa khatya aiyei chabomthuk lhangaiyei chaanlamya marnopilanungri, ani upa kahoiya'nungkhi heirapya aiyei chaanrou malumkhoumakrou.

⁷ Dun thimi rapri kanring thimi rapbei doura pu hoilei; tuy puklanungri tuypu heiyei shok hoikurnaksi.

⁸ Khril-lhangaimakei lungya tuklhakur thimine klahyei hei hunglukheirou; heitoubi miya marhotnei lhoukhi heirouwei hungdongeirou.

⁹ Ukning khyingne minungei picha-pimainara mansermak thimiri likarsui lhangai, ngamri kanring thimi rapya ani kringpikheini picha-pimailei.

¹⁰ Tlou rkalrilbi ngaalnanungei daiphakal thimiyei pongra leimak, heiyanungri ngaal'ok thukrilmakrou, heitoubi mine neiya mintlangbi samkurkhi makrou.

¹¹ Ukning khyingya hoikni thimiri heirou kyingne tlou yunkhei thimi heiyari Krungni palui hoipirou.

¹² Umpune chimmei roushing doura mit'thrilpilei, heitoubi malungamkna mak thimiyei tlouri loulhakpimaklei.

¹³ Yrathi thimine cheemra wathuknimakne ombi kyun, “Keine pothutdanungri keiya yangkongni loumairou.”

¹⁴ Mishal klal napuiyaei murrei yunthutkur tlouri komra dananungei chaang kamnei tloudiklei, heitoubi Umpuei malungkhana daakra klei thimi rapne heinaksi chaangra dalhakheirou.

¹⁵ Douwacha rapne lhou touyeinung muheimaklei, heirou lhou khoinekhi toumaklei, heiya lhangaine shunmatupilanungri koutoubi charouwo touri mulhakchanglei.

¹⁶ Kanring thimi rapya marhotbi laldun hoinanungei lhoutou thimi, heirou dun thimi'nungei hutthul pilhakbi lal phana'nungei lhoutou thimiri heishi kanringrou.

Roushingei Tloubomrap

¹⁷ Roushing klei thimi rapbei shunmatupikhou tloubom rapya nanungei yunpiyeise, louninglak; heitoubi yai shunmatupi tlouya ukrei tlou khoine marnolak.

¹⁸ Ngamri tloubomrap heiya nai ukningra malummakne ningthutbi leiyanungri, heirou heirapya naimurni yunlanungri nanungei nungkngai hoirou.

¹⁹ Naiyei uklumya Umpura leinanungei keine nanungei yunkni, heingammei tloubomrap heiya keine nanung lamkrinekhi yunpiwurla heirou asinungkhi yunpilei.

²⁰ Keine nanungei shunmatupinei tloubom rapya somthum mayethutbi khouwurla; tloubomrap heiri roushingle lhangaiya shunmatupina tloubomdik:

²¹ Tloubomrap heini nanungei chimya kounakko toubi muyerpirou; heitoubi heinak tloubom rapya munanungei naya watyilyei kheenrou, nane chimmei mallangya phachangrou.

-(1)-

²² Nane manileime toubine kanring thimi rapya thuithine mareknapimak, heitoubi pichar bomra tounaram makne mayungkur thimi rapya thi'msitpimak.

²³ Ngamri Umpune yanung'tlim tlouthuk heiya luilhakna'nungei trungpirou, heitoubi yaya marhotkur thimi rapya Umpune tanti pirou.

-(2)-

²⁴ Malungkhater thimikou heirou khril-thuithi thimi rapkou palui hoimak.

²⁵ Heinimanungri nakhi yai malungkhaterya mulouheibi horkhoukur manemakne naitam klahyei chaangra dalhakrou.

-(3)-

²⁶ Kouniroukhi miyei laltulya shingna'nungei yalhakloumak.

²⁷ Kounakpi nane yalhakloubi shingchangma'nungri, naiyei ipna khumdouya ramphane lunglouheirou.

-(4)-

²⁸ Kouniroukhi nai nutar-patar rapbei bunkhou ramkhaina ri'thlungya phuichutdurmak.

-(5)-

²⁹ Keinungei nane lhangaiyei lhoutou thimi khat mutpichanganungri, ayadui lhangai Krungyakhi palui hoichangrou thimi khat keine nanungei muyerpirou.