PARMAL 21 - KHYINGEI PU'TLOU Bible (BSI)

¹ Umpune kungrei yui rapya Aiyei chanyerkni tuyshun lhangra klaini chanyerlei, Krungei ukningkhi Ane kulchalphopbi ruichingpilei.

² Thimi khatne aiyei toubi klei lhouram namyerwa heiri aitamei mit'thrilnarari chimdikleime toubine ningcharou, heiya Umpune ukning kantangya yukthrilbi kleime touri ningmulak.

³ Chim lhoule heirou lhangaiyei lhoutou heitomni Umpuyei bomrari khrumna putya duine loulhak kya watlhou.

⁴ Horthitang mit'thril, ukningra tangcha thimi, heirou khril- lhangaimakei lhoutou heiri borhyei lhouthil.

⁵ Karbilni wairangbi lhou toulak, heiyanungri leraorou; heiya khnotni lhou toulanungri leraoni lhou touchangmakrou.

⁶ Mandalbi marpeilhakkur tuy heiri yrengchana bi naimakne dongmangeirou, heirou heirapne naya khiya ramra ruilhakna lam hoiheirou.

⁷ Khril-thuithi thimi rapri yai touthutkur lhangaimak lhou rapne yaya klah dayerheirou; ngamri yane chimmei lhouya tounimak.

⁸ Mral klei thimi rapbei lamri karkitlei, heiya ukning khying thimi rapne chim lhouya toulei.

⁹ Cheemmaira murkal napuiyakou kalhonbi leinung'tlimri, cheembungra kakabi leikurni duine lhangairou.

¹⁰ Khril-thuithi thimine kheenserrou lhangaimakei lhouyadik tounanungei ningchalei; heitoubi yane thimi hukhatnungeikhi kringpi kheini lhou toupimaklei.

¹¹ Minamyei lhoutou thimi hukhatne tanti phayei kheenrou muheimak thimi khatdeiri roushing hoikna; heitoubi mukhei thimiya shunmatupiyei kheenrou roushing duilhakyerlei.

¹² Khying Dunpune lhangaimak thimi rapbei cheemrei toubi klei lhou rapya kanre-kandangni yukthrilbi leilei; heitoubi lhangaimak thimi rapyari Ane maangyerheirou.

¹³ Kanring thimi rapne trungpinanungei ungphakur houya ninglhakmak thimi rapyari, yanungeikhi trungpinaungei ungphayei kheenrou loumayekpimakrou.

¹⁴ Thimi hukhatne beimakne malungkhabikhi malungkhapi thimine anungei munne hutthulput malanlhakbi rochawurlanungri malungkha dongurlei.

¹⁵ Chimyei lhouya touthutkur kheenrou lhangai thimi rapne nungwailei; heiya lhangaimak thimi rapnungeiri lhawai lahkna.

¹⁶ Roushingei lam'rouwei trukthutkur thimiri khiya ramrei khulbung hangra yongkartillou heithilngeiya.

¹⁷ Maleheikni thimiri kanringrou; heitoubi tulmalip thimi heirou kraothukni chamai thimiri kouniroukhi laldun hoichangmakrou.

¹⁸ Tharmu chim thimiya klahra dayernanungei wairang thimiri yaidoura heishi klah yongdarou; heitoubi yaidoura malungamkna makrou.

¹⁹ Murkal napuiya heirou marbuphakal napuiyakou leimalnanung tlimri, ramthingra puichakurni dui lhangairou.

²⁰ Roushing klei thimi rapbei cheemrari lal leraoni marpeikhoulei heiya muheimak thimiri aiyei lalthum rapya waiknaini kontlummurbi khrangni luilhakurlei.

²¹ Tharmu chimni heirou ukning khyingei lhou toukni thimiyari mine malungshi, heirou rikraikhi khrumpilei.

²² Roushing klei thimine mantrangkur raalluirapne raal-chakngaakbi klei khukarthilyakhi lukloukur manilei; heitoubi yane malungambi leikhou raalpalyakhi nangbaikur manilei.

²³ Aitamei maleiya kulchalphopbi heirou tlou yunyeinung mukhei thimi heiri klahra damakrou.

²⁴ ‘Miya laoknawo’ touri tangcha thimi heirou minamtang thimiyei minthul; heitoubi ani lhou touna kantangrou ukningra tangchalei.

²⁵ Yrathi thimiri ai'msha-aitamya hiyerkna; ngamri aihutne lhou churnimaklei.

²⁶ Lhangaimak thimine lhou touna kantangrou khramtangni chanchalei; heiya tharmu chim thimine ukning tangni kringpi kheile kalhonne pithutkur manilei.

²⁷ Khril-thuithi thimiyei khrumna put makatkur heiri Umpune machinpilei; heiyanungri aiyei ukning hyingmakei makat putrap heiri kounakne machinkna hoirou!

²⁸ Chimmakne tlou mayungpi thimiyei tlouri hunikhi loupimakne mangeirou; heiya ukningra muidaei lhoutou thimiyei kyun tlouri mine ninglhaknilei.

²⁹ Lhangaimak thimineri aiyei toubi klei lhou heitomni chimdikme toubi ningcha; heiya khyalda thimineri aiyei toubi klei lhou heirouwei karbilni toulei.

³⁰ Umpuya karhayei lhoutou thimiri tlaipangei roushing, mukhei heirou khyal touri koukhi karsuknamaklei.

³¹ Raalbomra raalsobi kardounanungei sapuk chungwani marshikbi khoukurkhi kya; heiya raal mane heiri Umpuei hutra klei.