PARMAL 19 - KHYINGEI PU'TLOU Bible (BSI)

¹ Mandal tlouya yunbine yuntlungmaknak leinung'tlimri, kanringne ukning khyingei kleini dui lhangai.

² Heiknime toubine ukrei tlou khoine mareknabikhi roushing yaomakanungri koukhi karsukmaklei, heitoubi ukningra kanthramkhei kleini lhou toumakanungri klahra darou.

³ Thimi thane roushing yaomakne lhou tounarou shuiyanungri, dongnara Umpuya malungkhapilei.

⁴ Dun thimi rapbeiri paluikhi ranran sachanglei, heiya kanring thimi rapyari palui rapne lakurkhoulei.

⁵ Picharyei maibongra klallei tlouya yunlanungri phabomthuk tantiya pimakri dongmakrou; heitoubi mandallei tlouya kyun thimiri pichar maibongra kartleikur manimakrou.

⁶ Thimi rapne bomtang thimi rapbei ukningya pilyerbine yaiyei trungpikurya phananungeidik raphalei, heitoubi thimi kantangni hutthul tangwani pimani thimiyei palui rapme toubine yunkanthangbidik klei.

⁷ Kanring thimi khatdei teinaorap nammane aya machinlanungri, aiyei palui rapneri airouwei kounak tlatni trukrou!

⁸ Roushingya phakur thimine aitamei lhawaiya malungshilei; heitoubi khyaldani marnolhakur thimi heiri aiyei rongchan katduilhakrou.

⁹ Pichar maibongra klallei tlou kyun thimiri phabomthuk tantiya pimakri dongmakrou; heirou mandallei tlouya kyun thimi heiri hirou da.

¹⁰ Yuntlungmak thiminungri maleheibi kleiri kallonamaklei; heinakrimni shok rapne cheempuyei doura pu khoine paalbom thukmakrou.

¹¹ Khyalda thimiri malungkhatermak; heitoubi hukounak khatne anungei klal touwurbikhi ani kukpichang, heiwari aiyei yerrouwei duiyei lhangai thang.

¹² Krung khatdei malungkhakuro touri yangkongei ungraokur heinaksi, heitoubi aniya malungshipikur hoiyanungri, manthrallei nung kronaksi.

¹³ Yuntlungmak chanapawa khatne pawaya maangyernanungei lhou yentouheilei; heitoubi murkal napuiyari pekpek kanchirsunda tuysonaksi.

¹⁴ Napawa khatne aiyei pui-parei cheem-kei heirou lal phathungrou; heiya lhangai khyal da napuiya heiri Umpune pha'kyer.

¹⁵ Thimi khatne yrathibi ipbidik leikur kya; heiya heinaksi thimiri msul douroutomngei.

¹⁶ Umpuei chaytlou rapya ngaakbi chawanungri roshuk pulchirou; kounakpi heirapya hil-chanthungmaka'nungri hirou.

¹⁷ Kanring thimi rapnung kringpibi putchei malankur heiri Umpunungei malankurnaksi; heitoubi pithutkur putchei rapya Umpune neinungei mallengpithurou.

¹⁸ Chanao rapya dounang kheen leiyeinung shunmatubi raakthunglak; heinimanungri nanekhi yaya maangyernanungei shilpinaksi hoirou.

¹⁹ Malungkhater thimiri klahyei tanti phaterrou; kounakpi ani klahra dayeinung hanuitom kalthutpilanungri, hanuikhi kallengni kalpithurou da.

²⁰ Shunmatupiya ninglhakbi heirou lhangaiya marno'kni thimiri, hillouri shingkhei thimi khat hunghoiyeirou.

²¹ Thimi khatdei ukningra lhouram chungni ningmarshikbi wairangrou, heiya Umpuei kningratom lhou touthutchangrou.

²² Khramtang thimi heiri rikraiknaei shakrung; heitoubi mandallei lhouya tounung'tlimri kanringei kleini lhangai.

²³ Umpuya chi-rikraiei klei heini roshuk pulchirou; heitoubi shuikngam, klah-knang heirou kwatsamkhi makrou.

²⁴ Thimi thari chaklukra hut khruplhakbine yai murra katborlhakbi charouyakhi manimakne yrathilei.

²⁵ Khril-thuithi thimi rapyari tanti pibine lahyerrou da; heiyanungri muheimak thimi rapkhi mulouheibi shinglhakrou; heitoubi mukhei thimi rapyari klalya touchimpiyei kheenrou duine muheilhakrou.

²⁶ Pui-paya thuithine mareknabi, yaya cheemra leiyermakne hulthutpikur chanapawa heiri rikrai mumak thimi, heirou mine malungshimak thimi.

²⁷ Chanaorap, nane shunmatupikur lhangaiyei tlouya ningnimakne donganungri, nai haallei mulhakur roushingei tlou rapyakhi namma malummurheirou.

²⁸ Tlou mayungpi thimine thimi khatya lalyerna'nungei ningchalanungri, chimmei pichar urthutchangmakrou; heirou lhangaimak thimine lhangaimakei lhouyatom heishi martamkni.

²⁹ Yuntlungmakne minamnei lhoutou thimi heiri pichar bira umyernanungei namkal loukunlhakbi klei heinaksi.