PARMAL 16 - KHYINGEI PU'TLOU Bible (BSI)1 Thimi khatne tounungei lhouya ukningra ningmarshikbi lei kya, heiya aiyei yunthut'nungei tlouri Umpuei kningle kartlikril. 2 Thimi khatne lhoutouna kantangrou aitamei mit'thrilnara chimkhi kya, heiya Umpuneri ukningya chaangh thibine leilei. 3 Naiyei lhoubom kantang Umpunung pilhaklak; heiyanungri nane phor phabi lhou kantangwa toumanerou. 4 Umpune put nammaya ai'aiyei lhoubom knaini sheemthutbine, hungdongnakhi naiyerpilei; heirou lhangaimak thimi rapbeikhi hungdongnari khi nimakne deiri koukhi maklei. 5 Ukningra tangchabi thuithi thimi rapyari Umpune machinpilei; heitoubi heinaksi thimi rapyari Umpune klahyei bomra dayermakneri dongmakrou. 6 Kyunya chanthungbi heirou malungamkna khat hoiyanungri Umpune naiyei borhya kukpirou; heirou Umpuei chaytlouya hil thunganungri shuikngamkhi thukmakrou. 7 Thimi khatne aiyei choritni Umpuya malungpilyerlanungri, yeekna thimi rapyakhi palui hoiyerwurbi kyingne leimalkna manirou. 8 Ukning hyingmakne lal chungni phalhaknung'tlimri, ukning khyingne lal thacha phalhakurni dui lhangai. 9 Thimi khatdei ukningra lhouwai tangwani ningmarshikrou, heiya Umpune aiyei hokarna kantang shunmandopilei. 10 Krungei murrei kathukur chay rapri khyingdiklei; heitoubi ani minambi chimmakne pichar tounungeiri yamakrou. 11 Umpuneri lal holnarakhi heirou putchei yornarakhi lingkhat khoine ukning khyingne heirou chimni touyerkni. 12 Krung rapne lhangaimakei lhoutou heiri machinknayei lhou; ngamri yai Krungbomrap heiri chimmei lhoutou heinitom yrung chetni phunbangkur manilei. 13 Krung khatne chimmei tlou kyunyatom mayekni, heitoubi chim tlouya kyun thimi heiyari Krungni malungkhrahpilei. 14 Krungni khipao tamya mayeklanungri malungkha, heiya shingkhei thimineri Krungei malungkhaya toudongchang. 15 Krungei kringpikhei heiri manthrallei nung-ur rameinaksi, heinaksiya phakuro touri khringei chaanya phakurnaksi. 16 Sinaya marpeilhaknung'tlimri roushingya raphalhakni dui lhangai, heitoubi lapaya raphalhaknung'tlimri mukheiyei ukningya phakurnidui lhangai. 17 Tharmu chim thimi rapne kanelmak'nungei lamra chalei, ngam heineri nane kounaksi lamrei hokarra chaleiyo toubine ningmubi chani lhangairou, heiyanungri nai rongchanrou thikmathuibi kanelmakrou. 18 Ukningra tangchaei lhoutou heiri mangcha'kna, heirou thuithiyei lhangaimak heiri aitamya kanelyerkna. 19 Muchabi yerkhairil putchei rapya phabi nungwainung'tlimri, ukning khyingne kanring thimi rapkou kleinidui lhangai. 20 Shunmatupikur tlouya ninglhakur thimi heiri katduilhakrou, heitoubi Umpuya uklum thimi heiri likarsui lhangai hoirou. 21 Ukningra roushing klei thimiyari khyalda thimime toubine kanyerkna; heitoubi aiyei yunthutkur tloulhang rapkhi ningrerikhi malungpil naimakne ningkni. 22 Mukhei thimi rapnungri roushingri rongchanyei tuyso; heiya yuntlungmak thimi rapya roushing leiyernanungei marnopi heiri karsukmakei lhou. 23 Roushing klei thimiri tlou yunbongnung khalthibine kyun; heitoubi yai yunthutkur tlou rapri mine ninglhakni. 24 Khuiningya mtuplanung sim'naksini, heirou sharungrakhi lhangaikna khoinakne, kringpi kheiyei tloulhangri ningbikhi ukningra malungamkna. 25 Thimi khatne aiyei chana lam heiwari chimleime toubi ningchabikhi, wadongnara khiyei lamkhi klei. 26 Lhouchur thimine msullanungri duiduine lhou churkni, kouweiyo toulanungri aiyei maduri lhou churbi pha manime toubi kning. 27 Khril-lhangaimak thimi rapri miya hiyernanungei raanglei, heirou yai katyunthut tloulhang rapkhi khru kyao tloudiklei. 28 Lhangaimak thimi rapne miya yorchabi ngaalkyer, heitoubi chetkril palui rapyakhi karhourilyerbi karbaiyerwurlei. 29 Khril thuithi thimi rapne yai palui rapyakhi minampi, heitoubi yaya maangnanungei lamra ruilhakpiwurlei. 30 Naya munne thirochabi klei thimi rapya nane mukheine thimallolak; ngamri yai ukningra lhangaimakya ningchabine naya klah dayerna'nungei raanglei. 31 Tharmu chim thimi rapbei phabomthuk heiri pulchiyei roshukya phakur heiwari; heitoubi truk pukkur heiri tara rapbei thang hoiknayei lukhup. 32 Malung-khatermakne kanthramkal thimi heiri mantrang thimiyakhi duine lhangai; heitoubi khukarthil khatya raal maniwurbi kulchalphopbi khounung'tlimri neimsha-neitamya kulchalphopbi khoukurnidui lhangai. 33 Thimi rapne Dunpuei kningya munanungei thim rapnung tuy khingbine meirui thiyerlei, heiya Umpuei kningri tlaipangei thimi rapne shunthut manemaklei. |
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
Bible Society of India