PARMAL 15 - KHYINGEI PU'TLOU Bible (BSI)

¹ Tlou marnimni mallangpi heiri malungkhaya toudongchang, heiya tlou thuithiyei mallangpi heiri duine malungkhayerlei.

² Roushing klei thimiyei maleiri shingkheiyei tlouya yunthutlei, heiya muheimak thimineri yuntlungmakei tlouya yunthutlei.

³ Bi kantangrou kou thukleiyo toubi Umpuei mitne thrilmubi leilei, kane lhangaiyei lhouya nimanung lhangaimak lhouya touleiko toubi Ane mit'thrilbi leilei.

⁴ Marnimni kyun tlou heiri malung damkyer, heiya thuithiyei kyun tlou rapne miyei khril nayerlei.

⁵ Aiyei pawaei shunmatupi tlou rapya loulhakmak thimiri muheimak thimi, heiya pawaei shunmatupikur tlou rapya ninglhakur thimiri mukhei thimi.

⁶ Tharmuchim thimi rapne yai cheemra lalya mangmak'nungei marpeilhak, heiya khril-lhangaimak thimineri klahyei trum hungeinung lalya kontummurlei.

⁷ Roushingei tlouri shingkhei thimiyei maleirei kathuklei, heiya muheimak thimineri heinaksi tlouri yunthutmaklei.

⁸ Ukning khying thimi rapne Dunpunung shunchayei kheenrou Ane malungkhrahpilei; heiya khril-lhangaimak thimi rapbei Umpuya khrumnaput makatpi heiri Aiyei mit'thrilnara machinkna khat khoi.

⁹ Ukning hyingmak thimi rapbei chabi klei lhoulamya Umpune machin; heiya chimmei lhoutou thimi rapya Umpune kluni toupilei.

¹⁰ Chimyei lamya lakurkhou thimiyari khrit tanti piheirou; heitoubi klalya touchimpinara chanthungmak thimiri hirou da.

¹¹ Khiya ramra kou thukleiyo toubi heiramphane Dunpune munne yulkhouchanglei; heiyanungri Aiyei maibongrari tlaipang thimi rapbei ukningni kouya yulkhouchangrou?

¹² Minam thimine klalya touchimpila'nungkhi yanimaklei; heitoubi muheidui thimi rapya koukhi ngailounimaklei.

¹³ Thimi rapne ukningra nungwaiyeinung laolei, heiya lhawai lahyeinungri solung baikurnakne mulei.

¹⁴ Roushing klei thimi rapneri muduinungei marnonilei; heiya muheimak thimineri yuntlungmakei tlouya yunbine nungkngai hoinalei.

¹⁵ Kanring thimi rapbei mayungri chaan-khatrek lahbidik klei; heiya ukningra nungwaithutkur mani thimiri kheenserrou haraobi leiwurlei.

¹⁶ Laldunbi klah-knangei doura leinung'tlimri, kanringne Umpuya chi-rikraiyei kleinidui lhangai.

¹⁷ Karhoukril thimi rapbei hangra anchum tuini maibi yaothungnung'tlimri, nai malungshiril thimi rapbei hangra anna-lounaya chamaibine kringrilbi kleinidui lhangai.

¹⁸ Malungkhater thimiri tlou yitrilkal; heiya ukning khnim thimine miyei ukningya nimyerchanglei.

¹⁹ Yrathiya hoiyanungri bi kantangrou thikmathuina bomdik; heiya nane ukning hyinganungri shuikngam thuknungei bom makrou.

²⁰ Roushing klei chanapawane aiyei paya nungwaikyer, heitoubi yuntlungmak chanapawa'tomni puiwiya lhawai lahkyer.

²¹ Yuntlungmak thimi rapne yai yuntlungmaknei lhou rapra haraolei, heiya shingkhei thimineri chim lhouyadik toulei.

²² Shunmatupi tlou rapya ninglhakleiyenri leemni dongurmakrou; heirapne lhou tounara shuiyermakrou, heitoubi tlou sempiya yaomakanungri lhou tounara klah darou.

²³ Lhoubomyei hilthungne tlakchani chimni tlou mallangkurya phakur thimi heiri kounak lhangaiyei hakrao hoirou.

²⁴ Roushing klei thimiri rongchanyei chim lamra chalei; heitoubi yari khiya ramra ruilhakna lamrari chamaklei.

²⁵ Umpune thuithiyei lhangaimak thimi rapbei bommai'ya kontlumrou; heitoubi trulmeiwi rapbei bommai rapya Ane namma kalpieirou.

²⁶ Khril-lhangaimak thimi rapbei ukningya Umpune machinlei; heiya ukning khying thimi rapbei tlouya Ane malungshilei.

²⁷ Thimi khatne ukning hyingmakne lal-holbine tungchanungei ningchalanungri, aiyei bommai nammane klahra darou; heiya minungei tuy chaya machin thimiri rongchan pulchirou.

²⁸ Ukning'yeng thimiri miyei tlouya mallangbongnung loukhalthi; heiya khril-lhangaimak thimineri tallengni tlou mallangrilbi, heiwini kngaal'ok thukyer.

²⁹ Ukning khying thimi rapbei shunchari Umpune mayekpi, heiya ukning lhangaimak thimi'nungeiri tlatne leiwurlei.

³⁰ Laoyetyet mit'thrilpi heine ukningra nungwaikyer; heitoubi lhangaiyei paoni ukningra haraokyer.

³¹ Mini naya klal touchimpiyei kheenrou nane ninglhaklanungri, nakhi roushing klei thimi rapbei hangra palthungchangrou.

³² Lhangaiya marnonimak thimi heiri ai'msha-aitamya maangyerkna; heirou mine klalya touchimpiyei kheenrou nane ninglhaklanungri nakhi shingkhei thimi khat hoirou.

³³ Umpuya chi-rikraine cha thimi heiri roushingya marnokur thimi, heitoubi mine naya rikrai-khrumnabongnung nane ukning khnim marnorirou da.