PARMAL 14 - KHYINGEI PU'TLOU Bible (BSI)

¹ Roushingne cheem sabaanglei; heiya yuntlungmak napuiyari bommai konchek.

² Neiukning khyingne leiyalo, heitoubi Umpuya chi-rikraiyalo; heiya nai ukning hyingmakne lhou toulanungri Umpuya hil chanthungmakme toubi mulak.

³ Yuntlungmak thimine tlouchui kyunri aiyei namkalra chei darou, heiya roushing klei thimiyei kyun tlouri rilchanglei.

⁴ Lou khuina'nungei halpa khouma'nungri, chakeira thimyer'nungei trunthutchang younamak; heiya halpa leiyanungri chakei thimni shunglhak'nungei trunthutchangrou.

⁵ Malungamna kyaei tloumayung thimine chimtlouya yunlei, heiya malungamna yamak tloumayungpi thimine mandallei tlou nimakne chimtlouri kouniroukhi yunmakrou.

⁶ Ukning hyingmak thimineri roushing raphabikhi phachangmak, heiya mukhei thimi'nungeiri klaini phachanglei.

⁷ Yuntlungmak thimi'rouwei kantlatdurlak, ngamri yairouwei mulounungei lhangaiyo touri koukhi maklei.

⁸ Koutounei roushing klei thimi rapne mukheiyo? Ngamri yane yai tounungei lhouya mulei. Koungamei yuntlungmak thimi rapne muheimako? ngamri yaitamtomne shingkheime toubi yane ningchalei.

⁹ Yuntlungmak thimineri klallei lhouya touwurbikhi koukhatkhi lhou hoimaklei; heiya chim lhoutou thimineri lallurbikhi kukpinanungei rochalei.

¹⁰ Ukningrei nungkngai heiri neitamyei hoirou, heitoubi neiukningrei khabi klei heikhi neitamtomni mulei; thimi hukhatnekhi heirapya siruk dongrilnungei maklei.

¹¹ Tharmu yaomakei lhoutou thimi rapbei cheemri mangeirou; heiya lhangaiyei lhoutou thimi rapbei cheemri mangmakne katduilhakrou.

¹² Tlaipang thimiyei mit'thrilnara chim kmal lamkhi klei, heiya heirapbei wadongnari khi klei.

¹³ Laobine lhawai klah'ya yulkhoukur manilei, heiya hakraoya luikurle lhawai klahni thimthurou.

¹⁴ Lhangaimak thimi rapne yai phabomthuk klahmanya heishi phaeirou, heitoubi lhangai thimi'nungeikhi yai lhou-lhangai touwurkhou hilthungne klahmanri heishi piheirou.

¹⁵ Yuntlungmak thimi rapneri miyei yunpi tlouya tallengni malungamurbi chanthungrou, heiya roushing klei thimineri hokar kantangrou mukheine thimallorou.

¹⁶ Mukhei thimine klahra damak'nungei kartleikur, heirou yuntlungmak thimineri koukhi ningthutmakne heishi lahnara dalhakrou.

¹⁷ Malungkhater thimi rapne yuntlungmakei lhouya touterlei, heitoubi mukhei thimi rapri ukning khneemne leilei.

¹⁸ Muheimak thimi rapne yai touthutkur lhou rapbei hilthungne phabom thukya phalei; heiya roushing klei thimi rapne yai mukheine lhoutounei phabomthukya heishi phalei.

¹⁹ Lhangaimak thimi rapne tharmuchim thimi rapbei maibongra kanelhakbi yaya kringpina'nungei ukning khneemne buchaeirou.

²⁰ Kanring thimiyari hukhatnekhi thinimaklei, heirou aiyei cheemlhunyei thimi rapneakhi malungshipimaklei; heiya dun thimi rapbei paluiri chungwani leilei.

²¹ Thimi khatne aiyei cheemlhunyei thimi rapya thuithine mareknapikur touri lhangaiyei lhou nimak; heiya kanring thimi rapya lhangaiyei toupi thimi heiri nungkngai hoirou.

²² Lhangaimakei lhouwai raangthimi heiri chimmaknara chawurame toubi mulaklo, heiya lhangaiyei lhou wairaang thimiri mine rikrai-khrumkna heirou malungamkna khat hoirou.

²³ Karyimmakne lhou krakni chur thimiri tungcha pharou, heiya churnimakne tlouchuiya yunbine karwaichabi klei thimi heiri kanring thimi yenhoiyeirou.

²⁴ Roushing klei thimi rapri laldunya yaiyei lukhup khoine klei, heiya yuntlungmak thimineri yai touthutkur lhou rapne yaiyei yuntlungmakya mutyerwurlei.

²⁵ Tlou mayungpi thimine chimtlouya yunlanungri miyei lhawaiya kalpi mani, heiya tlou mayungpi thimi heini chimmakne yunlanungri thimi rapya lalyerwurlei.

²⁶ Umpuya chi-rikraine chabi klei napawa heiri koukhi chinungbom makrou, heitoubi aiyei bommai'yei chanaorap nammanekhi Aya malungambi kallena bom khoine leirou.

²⁷ Umpuya chi-rikrai heiri rongchanyei ringna yuiphum, heiwane khi'rouwei naya tlatrilkyer.

²⁸ Krung khatdei thangri aiyei thrungpibi klei thimichung heirouei klei, heiya thimichung makanungri Krung heiri paalchangmakrou.

²⁹ Malungkhatermak thimi heiri khyal da thimi, heiya malungkhater thimi heiri aitamei muheimakya mutkna.

³⁰ Ukningra mui dani leiyanungri sharungrakhi nungkngai, heiya horthitangtou heiri thruyakhi chulyerkur kna naksi.

³¹ Kanring thimi rapya thuithine mareknapibi rikrai phayerlanungri, Sheempi Puya lhou hoimaknei lhoume, heiya kanring thimi rapya kringpikheini toupilanungri Umpuya rikrai-chiyei lhoutoume.

³² Lhangaimak thimi rapbei lhoutouri yaitamei lhanpur sheemkna, heiya lhangai thimi rapri yai lhouni yaya kalpirou.

³³ Shingkhei thimi rapbei ukningra roushingle mukheiyei tlouya ningchabine klei, heiya yuntlungmak thimi rapbei ukningrari heinaksi roushingei tlouri yaomaklei.

³⁴ Tharmu chimmei lhouya toulanungri lim khatya tangbangyer mani, heiya klalyei lhouya toulanungri lim khatya rikrai phayerlei.

³⁵ Shingkhei shok khatne krungya pilyerchanglei, heitoubi rikrai mumakei lhoutou shok heineri Krungei malungkha tantiya phalei.