PARMAL 13 - KHYINGEI PU'TLOU Bible (BSI)

¹ Roushing klei chanapawari pawani shunmatuyeinung lhoukhoine ninglhaklei; heiya yuntlungmak thimineri ai'mshani laallurame toubi kouniroukhi yunthutnimaklei.

² Lhangai thimiri yaiyei yunthutkur chimtlou heirouwei lhangaiyei hei pharou; heiya minamnei tloukyun thimiri thuithiya thukyerknine ningchabi tlou yunthutlei.

³ Roushing kleini tlou yunthutkur thimiyei murri aiyei mayungya hormangmakrou; heiya pangsaei kyun thimiri aiyei murrei chaangra mankna.

⁴ Yrathi thimine kounakbil madubikhi aiyei maduput heiri kouniroukhi phachangmakrou; heiya krakni lhouchurbi rapha thimi heiri aiyei maduya phachanglei.

⁵ Ukning khying thimi rapne mandal tlou kyunya machinlei; heitoubi lhangaimak thimi rapri yaiyei yunthutkur tlou rapne yaya rikrai phayerwurlei.

⁶ Lalmak thimiyari chim heiwane lousoupilei; heiya klal thimiyari lhangaimak mral heiwane heishi namsundawurlei.

⁷ Thimi hukounak khatne hutra koukhatkhi khoumakbikhi laldun thimi kansalei; heiya hukounak khatneri kanring thimi kansabikhi rilla munne lal dunkhi leilei.

⁸ Thimi khatdei rongchanyei rungkhlangri aiyei lalni silchanglei, heiya kanring thimiri lalni rungkhlang silchangmaklei.

⁹ Tharmu chimmei lhoutou thimi rapne albi warkyer meishar naksilei; heiya lhangaimak thimi rapri yenmitkur meisharnaksi.

¹⁰ Thuithiyei malungkha heini klah-knang nimakne deiri koukhi thukyermaklei, heitoubi lhangaiya shunmatupinei tlouya ngailoukurya duiyei shingkheiri maklei.

¹¹ Leemmei phalhak lal heiri yrengna bi naimakne dongmaangurlei; heitoubi klahne taallhakkur lal heiwari katduilhakrou.

¹² Kning tlungmaka'nungri solungra kanwangnalei; heitoubi ukningrei kningya hungtlungei'nung hakrao yunnung maklei.

¹³ Shunmatupi tlou rapya ninglhakma'nungri klahra darouri yulmakura; heiya shunmatupiya ninglhakla'nungri klah damakrou.

¹⁴ Roushing klei thimiyei shunmatupi tlouri rongchanyei cheemmun; heirapne naiyei rongchanya klah darou younarei kalthutpirou.

¹⁵ Roushing klei thimiyari mine rikrai-khrumkna; heitoubi malungamkna yamak thimi rapri mangna lamra ho karlhaklei.

¹⁶ Roushing klei thimine lhou kantangrou churbongnung khalthibi lhou toulei; heiya yuntlungmak thimineri yaiyei yuntlungmakya mutlei.

¹⁷ Lhangaimak pao-ur thimi rapne hou lungkyer; heiya malungam kya thimi rapne kying yenlhakchanglei.

¹⁸ Shunmatuya loulhaknimak thimiri karsukmakrou; heitoubi rikraikhi pharou; heirou klalya touchimpiyei kheenrou hakraoni loulhakur thimi heiri mine rikrai- khrumkna.

¹⁹ Ukningrei madu putya phayei kheenrou kounakei nungkngai, heiya yuntlungmak thimineri lhangaimak lhou rapya lakurkhoulaklo touri yamaklei.

²⁰ Roushing klei thimi raple palui hoilanungri roushing katduilhakrou; heiya yuntlungmak thimi rapkou palui hoilanungri, na nammakhi mangeirou.

²¹ Klal thimi rapri kheenserrou klah-knangne hilthungbi leilei, heiya tharmuchim thimi rapri lhangaiyei lhouni klahman khoine phaeirou.

²² Tharmu chim thimine hillei yu-cha rap'nungeikhi lal horkhouchangrou; heiya klal thimi rapbei lalri tharmuchim thimi rapbei hutra hungdongeirou.

²³ Thleiphu marngirna ramra lou trunlanungri kanring thimi rapkhi trunwai lung chungne luklhakrou; heitoubi tharmu chimmei lhoura chamak thimi rapne loubom chungwani leibikhi thimi hukhatyakhi trunchayermakrou.

²⁴ Nangne neiyei chanapawaya tanti pibine raakmakanungri aya kringpi kheiyei lhoutoupi nimaklei; kounakpi nangne aya malungshime toulanungri, shunmatupibi touchimpirou da.

²⁵ Chimyei lhoutou thimiri kropilni chamainungei pharou; heiya klalyei lhoutou thimi rapri karyomne msul dourou da.