PARMAL 12 - KHYINGEI PU'TLOU Bible (BSI)

¹ Roushingya madu thimi rapne lalkur kheenrou chimyerpini, heitoubi klalya touchimpiyei kheenrou malungkha thimi heiri muheimak thimi.

² Lhangai thimi rapya thibi Umpune malungkhrahlei, heiya lhangaimak thimi rapbei lhoutouya mulanungri Ane maangyerkni.

³ Lhangaimak lhouni thimi khatya sheembangnung tlimri maangyerwurlei; heiya lhangaiyei lhoutou thimi rapri kouniroukhi kanchekmakrou.

⁴ Lhangai napuiyari aishalyei tangchana bom khoi, heirou haraona bom lukhupnaksi, heiya rikrai pha'kyer napuiya heiri shalyei thruyakhi chulkyer kna'naksi.

⁵ Tharmu chim thimi rapri ukning lhangailei, heiya khril- lhangaimak thimi rapne naya maangyernanungei ningchabi klei.

⁶ Khril-lhangaimak thimi rapbei yunthutkur tlou rapri thimi hina'kya tloudiklei, heiya lhangai thimi rapbei yunthutkur tlou rapri tounaram mak thimi rapbei kallena bom hoilei.

⁷ Lhangaimak thimi rapri dongnara yu-chakhi raankhoumakne tlum'maangurlei; heiya tharmu chimmei lhoutou thimiyei bommairari, yu-cha rapkhi chungwani yenranbi pungyerlei.

⁸ Nane roushing klei thimirap hoiyanungri, mine naya mathangpirou; heiya nane muheimak thimirap hoiyanungri mine naya manthapimakrou.

⁹ Mini rikrai-khrumkna thimi khat khoine chamu-maimumakne msul doubi leinung'tlimri, koukhatkhi khoumanungkhi krakni lhou churbine chara tatmakei kleini lhangai.

¹⁰ Tharmu klei thimi khatne aicheemrei dunbi khou ui-waa rapyakhi lhangai-kluni toupilei, heiya khril-lhangaimak thimi rapne ui-waa rapyakhi kringpikhei mumakne thuithine toupilei.

¹¹ Yra theemakne loulhoura karyimmakne chur thimi khatne chaanung-mainungei watmaklei, heiya karsukmakei lhouya toubi kheen mangkyer heiri muheimak thiminetom toubi leilei.

¹² Khril-lhangaimak thimi rapbei maduri lhangaimakei lhou toukni heiwari, heirou tharmu chimmei lhoutou thimi rapbei ho trumnari chutmakrou.

¹³ Khril-lhangaimak thimi rapyari yaitamyei tloulhangni chang kamkna, heitoubi ukning khying thimiri klahyei bom'rouwei kartleiwurlei.

¹⁴ Thimi khatne aiyei yunthutkur lhangaiyei tloulhangrap hilthungne mhei pharou, heirou aiyei touthutkur lhourap hilthungne ani klahman phaeirou.

¹⁵ Yuntlungmak thimineri aiyei toubi klei lhourap heitomni chimme toubine heishi ningchalei; heitoubi roushing klei thimineri lhangai shunmatupi tlou rapya ninglhaklei.

¹⁶ Yuntlungmak thimine malungkhawanungri muei khou tlou rapyakhi tallengni yunthutdurlei; heitoubi mukhei thimineri rikrai phatermak.

¹⁷ Chim tlouya kyun thimiri tharmuei tlouya yunlei, heiya chimmak tlouya yunyei kheenrou tharmuei tlou touri yaomak.

¹⁸ Yuntlungmakei tlou kyun thimi rapbei tlouri miyei khril na'kyer, heiya roushing klei thimi rapbei tlouri miyei malung damkyer.

¹⁹ Minamnei tlou kyunri tlani pulchimaklei, heiya chimmei tlou kyunri hikur naimakrou.

²⁰ Ukningra lhangaimakya ningchabi lhoutou thimiri kngak khat khoine klah hungdaeirouhui, heitoubi lhangaiyei lhoutou thimi rapbei ukningri nungkngai heiwane yaiyei siruk hoiyeirou.

²¹ Tharmu chimmei lhoutou thimi rapnungeiri klah-knang damakrou; heiya lhangaimak thimi rapbeiri klah-knangra dakur nimakne deiri makrou.

²² Umpuneri mandal thimi rapya machinlei, heiya kantomkril tlouya baimakne khou thimi rapyari Ane malung'khrahpilei.

²³ Roushing klei thimineri yaikmu tlouya yunthutmakne munne khoumanilei; heitoubi yuntlungmak thimineri yaiyei muheimakya mutthutdurlei.

²⁴ Yra theemakne lhouchur krak thimi heini pu khoine thrungeirou, heiya yra thibi lhou churnimak thimi heiri shok hoirou tomngeiya.

²⁵ Lhawai heini ukningrei nungkngaiya kanthritkyer, heiya marnimyei kyun tlou rapya mayeklanungri ukningra rdamkyer.

²⁶ Tharmuchim thimi heiri aiyei paluiya lam ruipi thimi, heiya lhangaimak thimiyei lamri palui rapya ruikanwainalei.

²⁷ Yrathi thimine aiyei pha'kni putya kouniroukhi phachangmakrou, heiya karyimmakne lhouchur thimineri likarsuiyei lalya pharou.

²⁸ Tharmu chimmei lamra ringnanungei lam klei; heiya lhangaimakei lamri khiyei lamra ruilhaklei.