PARMAL 11 - KHYINGEI PU'TLOU Bible (BSI)

¹ Khalcha-khalthel knai thimi rapya Umpune machinpilei. Heitoubi khalcha-khalthel naimakne lingkhatra khalbine lhoutou thimiyari Ane malungshilei.

² Tangchabi napaltou thimiri khrangni rikrai pharou, heiya ukning khnimri roushing klei thimi!

³ Nane ukning khying thimirap hoiyanungri lhangai thimi, heiya malungamkna yamak thimi rapyari yaiyei ukningrei borh heine heishi ruimangrouwa.

⁴ Laldun heiwini neiyei hininang koukhi karsukna hoirou nimak; heiya ukning hyinganungri kalpi pharou.

⁵ Ukning khying heini lhangai thimiyari nungwaikyer, heiya khril- lhangaimak thimineri aitamtom rikrai dananungei lhouya toulei.

⁶ Tharmu chimmei lhoutou heiwane ukning khying thimi khatya kalpilkur mani; heiya malungamkna yamak thimiri aitamei yunthutkur tlou rapne chaang hoibine karha'kna.

⁷ Lhangaimak thimi khatne hiyeinung aitamei ningchakhou, heirou aiyei touwurkhou lhourap namyerwa heiri ale pulni mangmalnarou; heitoubi Dunpu yaomakne lalya malungambi klei heiri koukhatkhi karsukmakrou.

⁸ Tharmu chimmei lhoutou thimi rapya klah bom'rouwei kalpilei, heiya lhangaimak thimi rapbei dourari klah-knang dalei.

⁹ Umpuya uklummak thimi rapbei tloulhangni naya maangyerkur kya; heiya tharmu klei thimiyei shingkhei ngamni naya kalpirou.

¹⁰ Ukning khying thimi rapne laldun hoiyanungri, khukarthil heiyei thimirap nammane nungkngai; heitoubi lhangaimak Thimi rapne hiyanungri khukarthil heiyei thimi rapne nungkngaiyei houni ungraolei.

¹¹ Lhangai thimi rapbei ngamni khukarthil heini phor phalanungri tangbaang-choubaanglei; heiya lhangaimak thimi rapbei tlou rapne khukarthil heiri maangyerwurlei.

¹² Cheemlhunyei thimi rapya shambi kyun thimi heiri yuntlungmakei lhouso; heitoubi yane phabda thimi hoiyanungri kyingne leirou.

¹³ Miya yorchakal thimi rapnungri muei yulkhounung tlouya yunthutpi'nungei yamak, heiya malungamkna kya thimi rapnungri muei yulkhounung tlouya yunthutpibikhi koukhi uksanungbom maklei.

¹⁴ Shunmatupirou thimi maknara shuikngam thukterlei; heiya shunmatupi purap chungwani leina hangrari shuikngam thuktermaklei.

¹⁵ Shakrung mumanremak thimi khatdei laltulya shingnungei yalhakuro touri malungthramnabom nimak.

¹⁶ Ukning khnim napuiya heiyari rikrai khrumpibom thuklei, heiya heinaksi thang thukmak napuiyari rikraiknayei shakrung khoi. Yrathi thimiri kanringrou, heiya yrathimakne krakni lhoutou thimiri likarsui lhangairou.

¹⁷ Kringpikhei thimine lhangaiya toupinei ngamrou anungeikhi kringpikheini toupirou, heiya thuithi thimiri ai'msha-aitam klah phayerkna.

¹⁸ Khril lhangaimak thimine lhou tounara koukhatkhi karsukmakrou, heiya nane tharmu chimmei lhouya toulanungri, nanungei churneiman shuimakne phayerrou.

¹⁹ Tharmu chimmei lhouya tounungei ningcha thimi heiri ringrou, heiya lhangaimakei lhouya chancha thimi heiri heishi hunghiheirou.

²⁰ Umpune khril lhangaimakya machinlei, heitoubi tharmu chimmei lhoutou thimi rapya Ane malungshilei.

²¹ Lhangaimak lhoutou thimi rapri shuimakne tanti phaeiroume touri nane mulaklo; heiya tharmu chimmei lhoutou thimiri tantirei kartleithutrou.

²² Shakrungra karyuibi heirou chaning damak napuiyari hog napurra sina nabangpinaksi.

²³ Lhangai thimi rapne toukniyei ningchakur lhou kantangrou lhangaiyadik heishi touthutrou; heiya lhangaimak thimi rapbei toukni lhou rapya hungtouwei kheenrou miya malungkhayerna lhoudik hoirou.

²⁴ Thimi thaneri minungei manlhangni piwurbikhi yanungeiri heishi katduilhaklei; heitoubi thimi thaneri pibom thukyakhi pinimakne mallonglhaklei, heiya yari duiduine kanring thimirap hoiwurlei.

²⁵ Minung piyeinung manlhang thimirap hoiyalo, heiyanungri nanungei duine katduilhakrou; minungei churtrungpi heiyalo, heiyanungri nayakhi mine heitrungpirou.

²⁶ Trunwaiyei lung yoryeinung man katduiya ngaakbi yulkhou thimi rapya mine karhallei, heiya putchei heile kallorillei manra yorpi thimi heiyari mine malungshilei.

²⁷ Nane lhangaiyei lhoura donsolanungri, mine naya rikrai- khrumpirou; heitoubi lhangaimak lhoura chancha thiminungri lhangaimakya heishi hungtlungrou.

²⁸ Dun thimine aiyei lalya malungambi leiyanungri sowangei heengna marhuikur naksini kimmangeirou; heiya tharmuchim thimi rapne manthrallei heengnadou heimchitnakne heishi katduilhakrou.

²⁹ Aitamei bommaira klah da'kyer thimi heiri hungdongnara aiyeime touri koukhatkhi makrou; kheenserrou yuntlungmak thimi rapri roushing klei thimi rapbei shok hoilei.

³⁰ Tharmu chim heiri rongchanyei heengtrung, heiya ayil naimak thuithi thimi rapne rongchanya maangyerwurlei.

³¹ Lhangai thimi rapyari tlaipangra leiyeinung lhangaiyei lhou tounei klahmanya phayerlei; heiyanungri lhangaimak thimi rapkhi yaiyei lhangaimak lhoutounei klahman phaeiroume touri nane mulaklo.