PARMAL 10 - KHYINGEI PU'TLOU Bible (BSI)

Solomonyei Parmalrap

¹ Awari Solomon'yei parmalrap: Roushing klei chanapawane aiyei pawaya ukningra malungamkyer; heiya yuntlungmak chanapawa heiri puiwiyei lhawai toulah'kna.

² Ukning hyingmakei yentaallhak lalri koukhatkhi karsukmakrou; heiya ukning khyingei tharmu chimmei lhoutou heini neiyei rongchanya kalpirou.

³ Umpune tharmu chim thimirap hukhatyakhi msul-yuikhat phayerpimak, heiya ukning lhangaimak thimi rapyari yai madurap koukhatyakhi phayerpimakne thingurpilei.

⁴ Yra thibi churnimak thimi rapri heishi kanringrou, heiya karyimmakei lhouchur heiwane naya laldun thimi hoiyerrou.

⁵ Roushing klei thimine trunwai hei minyeinang kheen'chani luklhakthunglei, heiya trun khumlumyei ipbi klei chanapawa heiri rikraiknayei shakrungme.

⁶ Tharmu chim thimiri phor phaeirou; heiya lhangaimak thimi rapbei murri hina kya khrune thimlei.

⁷ Lhangai thimiyari phor phakur'nakne thimi nammane karyom ningthutpilei, heiya lhangaimak thimiyari tallengni malumkur.

⁸ Mukhei thimi rapne lhangai shunmatupiya loulhaklei, heiya yuntlungmakei yunmarek thimi heiri khinaksilei.

⁹ Ukning khyingei lhoutou thimi heiri bi kantangrou shuikngam phamakrou, heiya ukning borhni lhoutou thimi heiri aiyei lhoutouna kantangrou mine chanmanrou.

¹⁰ Chimyei tlouya munne yulkhou thimi heiri klah-knang thukyer, heiya klalya phongni touchimpi thimi heiri yingnanungei lhoutou thimi.

¹¹ Tharmuchim thimiyei murrei yunthutkur tloulhangrap heiri khring chaanyei yuisho, heiya lhangaimak thimi rapbei yunthutkur tloulhang rapri khi-kya khru kyao.

¹² Machinkril heiwane malungshirilyermak, heiya malungshi heini klal nammaya khubphopkur manilei.

¹³ Mukhei thimiyei murni roushingei tlouya yunthutlei, heiya yuntlungmak thimiyari namkalra shungkrokni umbi tanti pibomthuk.

¹⁴ Shingkhei thimi rapneri roushingya mallonglhaklei, heiya yuntlungmak thimi rapne tlou yunthutyeinang tallengni klah daroukleiya.

¹⁵ Laldun thimiyari aiyei lal heiwane kalpirou, heiya kanringei lhou heini kanring thimi heiwaya mangkyer.

¹⁶ Tharmu chimmei lhoutounei klahman heine ringna lamra ruipi, heiya lhangaimakei lhoutou heiwane borhyei lamra heishi ruilhakpirou.

¹⁷ Klalya touchimpiyei kheenrou ninglhakur thimi heiri khring pharou, heiya yai'msha-yaitamne lallame toubi yunthutnimak thimirap heiri klah darou.

¹⁸ Machin'knayei tlouya yulkhou thimi heiri mandal thimiso, heitoubi miya yorchakal thimiri yuntlungmak thimi.

¹⁹ Tlou yunchunglanungri klal heishi chungduirou, heiya shingkhei thimi hoiyanungri tlou yunchungmakne mulleirou.

²⁰ Tharmu chim thimiyei maleirei kathuk tlou rapri lapa-thirnaksi, heiya lhangaimak thimiyei ukningri koukhatkhi karsukmaklei.

²¹ Lhangai thimiyei yunthutkur tloulhang rapne thimiya pilkyer, heiya yuntlungmak thimi rapri roushing yaomaknei yaitamya hiyerkna.

²² Umpuei phornitom laldun thimi khat hoikyer, heiya lhou karyimmakne churbinekhi heiwini laldun hoiyerrou nimaklei.

²³ Klalyei lhoutou heiri yuntlungmakei lhou, heiya shingkhei thimine roushingya raphalhaklei.

²⁴ Tharmu chimmei lhoutou thimine yaiyei pha'kniya phamanilei, heiya lhangaimak thiminungeiri yane duiyei chibi klei put rapya yane hutthul khoine phaeirouhui.

²⁵ Thuithiyei nungmarthee kayeinung lhangaimak thimi rapya mtrailoukur, heiya ukning khying thimi rapneri kheenserrou shuikngam makrou.

²⁶ Yrathi thimiya neinungchum lhou touyermak, ngamri aiyei lhoutou heiwari hei'khyur chalouheibi ha'mseikurnaksi, nimanung mitlungra meikhu chiploukurnakne hoirou.

²⁷ Umpuei chaytlouya hilthungne lhou toulanungri pulchirou, heitoubi lhangaimak thimiri roshuk tlungbongnung hiwurlei.

²⁸ tharmuchim thimi rapne ukningra malungambi ningchakur heini nungwaiyerlei, heiya lhangaimak thimi rapneri kouya thimalungambi haraoheirou!

²⁹ Ukning khying thimi rapyari Umpune ngaaksilpilei, heiya lhangaimak lhoutou thimi rapyari Ane maangyerwurlei.

³⁰ Tharmuchim thimi rapne kheenserrou shuikngam makrou, heiya lhangaimak thimi rapri tlaipangra ringchangmakrou.

³¹ Tharmuchim thimi rapne roushingei tlouya kyun, heiya lhangaimak tlouya kyun thimi rapbei murri tipburheirou.

³² Tharmuchim thimi rapne kringpi'kheiyei tlouya yunlei, heiya lhangaimak thimineri kheenserrou miyei khril nananungei tlouyadik kyun.