PARMAL 1 - KHYINGEI PU'TLOU Bible (BSI)

Parmallei Lilkhoi Karsuknabom

¹ David'yei Chanapawa, Israel rapbei Krung, Solomon'yei Parmalrap:

² Parmalrap heiya pabi ukningrei roushingkhi duilhakna hoirou, heirou lhangaiyei shunmatupi tlou rapkhi phachangrou; Parmalrap heirouwei chaan khatdeinung tloulilrap kounakhi mulhakchangrou.

³ Parmalrap heini trungpibi shingkheini, ukning khyingne, tharmu chimmei lhouya toubi, heirou lhangaimak choritya chamakne leiyernara trungpirou.

⁴ Muheimak thimi rapnekhi parmalrap heiya pamubi shingkhei duilhakrou, heitoubi douwa rapnungeikhi yunnungei makne karsukna shingkhei yenwaiyouna bal hoirou.

⁵ Heinaksi parmal rapne roushing klei thimi rapnungeiri duine shingkhei hoinanungei marnonei lammit katduiyerrou, heitoubi mheikhei thimi rapnungeikhi lhukni shingheina bom hoirou.

⁶ Heiyanungri Parmallei lilkhoi tloulung rapya heirou heirapbei karsukna rapya mulhakrou, heitoubi shingkhei thimi rapbei shunmatupikhou lilkhoi tlou rapkhi mulhakchangrou.

Douwa Rapnung Shunmatupi Tlourap

⁷ Umpuya chi-rikrai heini roushing yenwaiyouna, heitoubi yuntlungmak thimi rapri roushingei tlou shunmatupiya heirou lhangai marnopiya tlou khoine loulhakmaklei.

⁸ Keiyei chanapawa, neipawa keiyei shunmatupi tloulhang rapya ninglhaklak, heirou neipuiyei marnopikur tloulhang rapya loulhaklak.

⁹ Yai shunmatupikur tlourap heiri nane nai chorit lamya sheembangeinung murshum-lingkhangphi lhangainakne, heirou naiyei thang thuknanungei ngakrei nalhakkur muidoukhrul'naksini lhangairou.

¹⁰ Keiyei chanapawa, lhangaimak thimi rapne malhimbi chilpheinara chanthungurmak.

¹¹ Kounakpi neiya chilyeinung: “Wawalo, kaihilla chanthunga, thimi hatnungei raangase, hei nimanung ngam koukhatkhi makanungkhi lalmak thimi rapya kane manbi mareknawurase.

¹² Khiya ramni yaya madulkur heinakne, heitoubi ya nammane thleipurra dadumkur'naksini, kane yaya khringni madullurase!

¹³ Heirou kane miyei putcheiya muchabine manklu putcheirap kai cheemra thimni marpeilhakase.

¹⁴ Kaihangra wayaowalo, kai yenmulhakur putchei rapya kane meirui thirilbi yerrillase.” toubi yane yunheirou.

¹⁵ Keiyei chanapawa, heinaksi thimi rapkou chamalnamak; heinaksi thimi rapbei chana lam'rouwei neiyei hokar tlatni kartleiyuralo.

¹⁶ Ngamri lhangaimakei lhou tounara yai hokarri yanglei, heitoubi kheenserrou yane miya hatnungei raangbidik leilei.

¹⁷ Neiyei mankni ramwaani neiya mitthrilbi leiyeinung nangne yaya mannanungei waarui kambi kouya karsukrou.

¹⁸ Heiya heinaksi thimi rapneri yai'msha yaitamya manwurbi hina-kya chaang khat kambine khoulei.

¹⁹ Miyei putcheiya khramphabine mucharou ningcha thimirap nammane yaitamyei rongchanya hormangnungei wairangthil; heinaksi thimi rapbei chaanrou thuithikur klah-knangei bomra daheirouhui.

Roushingni Unglhakpi

²⁰ Ninglhakpilaklo! Roushingni lamtangra puichabi klei thimi rapya heirou keithil tlaira karwaichabi klei thimi rapya ungbi leilei.

²¹ Roushing heiwane hou chouni ungraobi Krungkullei shumtrumra heirou thimichung kartilna bira klei thimi rapya ungbi leilei:

²² “Yuntlungmak thimirap! Nari kounak tlani muheimakne leinileihuiyo? Nane roushingei tlouya kounak tlani lhouhoimakne leiheirouwo? Nane roushingya tekchakhi marnomakrouko?

²³ Keine nanungei shunmatupikur tlou rapya ninglhakpilaklo! Thilak, Keiyei ukningya nanungei shungthutpirou; heirou keiyei roushingei tlou rapya keine nanungei shunpiyeise.

²⁴ Keineri naya keinungei wachangna'nungei ungbi leilei, heiya naneri keiyei tlou rapya ninglhakpimaklei; Keine hutlhangbi naya unglei, heiya naneri huchakhatkhi louninglhakbi keinungei wachangmaklei.

²⁵ Keiyei nanungei shunmatupikur tlou rapya nane loulhakmaklei, heirou keine naya touchimpinanungei shunpikurkhi nane ninglhakpimaklei.

²⁶ Heingammei nane klahyei bomra dayei kheenrou Keine naya thibine yuklaorou, heirou chi'knane naidoura kuiphopbi leiyei kheenrou keine naya thibi laonapirou.

²⁷ Chi'knane lhimnung-marthee tangnakne naidoura shuikngam thukyerkur kheenrou, heirou nane klah-knangei bomra dayei kheenrou keine naya laonapirou.

²⁸ Kheen heirouri nane roushing keiya lou'ungpharou, heiya Keine kheen heirouri nanungei mallangpimakrou. Bi kantangrou nane keiya rapharou, heiya nane kouniroukhi keiya raphamumakrou.

²⁹ Ngamri nane roushingei karsuknaya mumak thimirap, heitoubi Umpuei shunmatupikur roushingei tlou rapya hilthungmak thimime.

³⁰ Keiyei shunmatupikur tlou rapya nane loulhakpimaklei, heitoubi keiyei naya chimyerpikur tloukhi ninglhakpimaklei.

³¹ Ngam heineri naiyei tounei klahman heiri nane phaeirou; heirou nai toukur lhourap heiwane naya nayerheirou.

³² Muheimak thimi rapne hiyeirou, ngamri yane roushingya lhouhoi'pimaklei. Yuntlungmak thimi rapri yai touthutkur lhou rapne yaya maangyerheirou.

³³ Heiya keiyei shunmatupikur tlou rapya loulhakbi hilthung thimi rapri shuikngam makrou. Heirou yaidoura chi'knakhi makrou.”