PAOCHIL 9 - KHYINGEI PU'TLOU Bible (BSI)

Tlaipang Thimiri Dunpuei Hutra Klei

¹ Heiya heirap nammaya keiyei ukningra loulhakbi khalsundanarouri, tharmu chim thimi rapkhi, roushing klei shingkhei thimi rapkhi, heirou yai touthutkur lhourap namma heikhi Dunpuei hutra leichilei. Heiya yai maibongrei klei namyerwa karshukmakei karshukmakthil.

² Thimi namyerwari khatnakdik hungdongeirouhui; Tharmu chim thimikhi, chimmak thimikhi; lhangai thimikhi, lhangaimak thimikhi; khying thimikhi, hyingmak borh thimikhi; malan put makat thimikhi, makatmak thimikhi; ya nammari khatnakdik hungdongeirou. Lhangai thimikhi, lhangaimak thimikhi; tlou kantomkhou thimikhi, tlou kantomrou chi thimikhi, ya nammari khatnakdik hungdongeirou.

³ Tlaipangra kinniyei daakra touthutkur lhourap nam'rouwei klal khat leiyura, touri thimi napung khatnungei hungdongkur heinaksine thimirap nammanungkhi khatnakdik hungdongura.

⁴ Heisiya hoiyanungkhi huhuni khring thimi rapbei hangra mshing sherchokkur thimi heiwari malungamkna leileihui; kouweiyo toulanungri, khring uiri khi yangkongya duine lhangai!

⁵ Kouweiyo toulanungri, khring thimi rapne yari hiyeiroume touri kmu; heiya khi thimi rapri koukhatkhi ningmumaklei, heirou yanungeiri kou klahman khatkhi phanungei mak; kouweiyo toulanungri, yayari mine ningthutpimakne malumwurla.

⁶ Yanungeiri malungshi, machinkna heirou horthiril toukhi makura; heirou tlaipang kinniyei daakra toubi klei lhouthuk rapri yaiyei siruk touri koukhatkhi yaomakura.

Rongchanne Maneyeinung Nungwaiyalo

⁷ Heineri nangne hungbine neiyei chak-anya chamaibine nungwaiyalo, heirou neiyei tulya mongbine neimalung pilni haraowalo; kouweiyo toulanungri, Dunpune neiya yapiwurla.

⁸ Heitoubi kheenserrou khngouwei shambyadik bangbine, heitoubi neilura shirek karyomni teibine leiyalo.

⁹ Neiyei karshukmakur tlaipang rongchanni ringeinung, neiyei karyuiknaei malungshiwi neiyei nule kalhonni nungwaiyalo; kouweiyo toulanungri, tlaipang kinniyei daakra Dunpune heiwaya neiyei lhou churnei klahman khoine piwurkhou heiwariya.

Tlakcha Kheenrou Lhou Touthunglak

¹⁰ Koukou lhouya hoiyanungkhi churnungei neihutni phakur heiwari neiyei mantrang-roushing namma kyaoni touthunglaka; kouweiyo toulanungri, neiyei yongchangrou youna lhanrari lhou churtou naimakrou, lhou wairang toukhi makrou, heirou roushingei tloukhi makrou.

¹¹ Keine tlaipang kinniyei daakra awakhi mulhakurla: Chan shingnaleiser chan-khyang thimine duibidik klei nimak; mantrangdui lhouwani raalbom kantangra raal manitouri mak, heirou roushing klei thimine kheenserrou chamu-maimurou toukhi mak; heirou sireikhei dui thimine kheenserrou lal dunrou toukhi mak; toumane thimine kheenserrou mathangpi pharoume toukhi mak; heiya heirap namma heiri thimirap nammanungei chaan-chaanyei khoine heirou tlakchaei hilthungni yenmartlengbi heirou kheen lailini hungthukheirou.

¹² Heiyakhi duinara thangane lingra mankurnaksine, heirou ramwaa rapne chaangra manbi karpankur heinaksine, tlaipang thimine aiyei rongchanyei roshukri mumaklei. Heineri tlaipang thimiyei chanao rapne lhangaimak chaanyei chaangne yaidoura yongdayei kheenrouri chaangra namma manwurchilei.

Roushingle Yuntlungmakei Lhoule Marhilkna

¹³ Heitoubi awakhi tlaipang kinniyei daakra roushingei lhoukhi keine muwurla, heirou awane keiya maduyerwurla.

¹⁴ Bongnung khukarthil mandicha khatra thimi thacha paalbine leikhou, heirou toumane Krung khatne wachangbine raal dakur, heitoubi khukarthil heichaya kulchallurbi lukloukur heitoubi raalpalkhi karhilni saphopbine kuikoolkur.

¹⁵ Heiya khukarthil heiyei rilla kanring napawa khat paalkhou, heirou ani khukarthil heiya aiyei roushingne kalpikur. Heisiya hoiyanungkhi thimi hukhatnekhi ayari shak kmuni ningmukhoumak.

¹⁶ Heisi tounarouri keine kyun, “Roushingni mantrangyakhi duine lhangai.” Heiya kanring thimiyei roushing heiwari thimi rapne manthapimaklei, heirou aiyei tloukhi mine ninglhakpimaklei.

¹⁷ Yuntlungmak thimi rapbei hangra ungraochabi kyun Krungei tlouya ninglhaknung tlimri, roushingei tloulhang rapya kying-muidani ninglhakloukur heiwane dui lhangai.

¹⁸ Roushingni raallei hutshuya duine lhangai; heiya borh thimi napung-khatne lhangai thimi rulkhatya toumangurlei.