PAOCHIL 8 - KHYINGEI PU'TLOU Bible (BSI)

Yama Krungei Shunya Ninglak

¹ Roushing klei shingkhei thimi naksiri hu klei? Heirou tlaipangei putlim rapbei ngamrou kmu thimiri hu leilei? Thimi khatdei shingkhei roushingri aiyei solungya nungwaikyer, heirou aiyei mairungya thang alkyer.

² Keiyei kyunri, “Dunpuei maibongra neiyei tloukantomya kngaak khoine Krungei shunya hil-chanthunglak.

³ Heirou neiukningra Krungya khingurkhounungei khnotne ningchawurmak, heirou lhangaimakna lhoubira chutmakne mayungurmak; kouweiyo toulanungri, ari aiyei kning lhoura heisi touthutkur mane.

⁴ Krungei chayri hunekhi yitchangmak, heirou hunikhi aiyei tloura ‘Neitoukur heiwari kouwo?’ toubine loungainungei mak.”

⁵ Heineri huhune Krungei chaytlouya kngaakne cha thimiri kouniroukhi klah damakrou; kouweiyo toulanungri, ukningra roushing klei thimiri toubomthuk lhouya kheen chane touthungroume toubi ningmulei.

⁶ Kouweiyo toulanungri, thimi rapbei doura hillou kou thuithi hungthuknungei leibinekhi, kheen chane touthungnungei lhou rapbei lammit rapkhi klei.

⁷ Kounakpi thimi khatne kou thukrouwo toubine mumakanungri, hillou kou hungthukrouwo touri hune yunchangrou?

⁸ Thimi hukhatnekhi martheeya manphopbine khouchangmak; heirou hukhatnekhi khirouwei kartleichangmak; heirou hunikhi raalla loutrukthramak heinaksine, khril lhangaimak lhoutou thimi rapyari yaiyei lhangaimak lhourouwei kalthutchangmakrou.

⁹ Tlaipang Kinniyei daakra touthutbi klei lhouthuk nammaya keiyei ukning khinglhakbine thinarouri namma mulhakwurla. Kounaksi kheenrouri thimi napung khatne aiyei palui khatya kulchalbi marhotpiwurnei kheenkhi leikhou.

¹⁰ Heirouri khril lhangaimak thimi rapne khyingei bomra hungchang-wathuk toukhoubi, hiwurnarei khi krui heiwakhi keine mulhakwurla; yani heinaksi lhangaimak lhou touwurkhou heinung'tlim khukarthil heirouwei yayari chouni mathangrilkhou. Heiwakhi karshukmakei lhouthil.

¹¹ Ngamri lhangaimak lhou toukhounei tantiri khrangni hungmaklei. Heingammei heinaksi lhoutou thimi rapbei chanao rapbei solungri lhangaimakei lhouya tounanungei bilthimne rangbi leiwurchiya.

¹² Khril lhangaimak thimine borh lhouya machabuirek toukhoubine, heirou yai rongchan heiri tlani pulchibikhi, Dunpuya chi-rikraine khrumbi klei thimi rapbei rongchanni dui lhangaime touri keine mulei.

¹³ Heiya lhangaimak thimi rapnungeiri lhangai hoimakrou toukhi keine mulei; ngamri yani Dunpuya chi-rikraine khrumkhoumaklei; heingammei yari lhim kanchaikur naksine pulchimakrou.

¹⁴ Tlaipangra karshukmak lhourap thakhi thukbine leilei: lhangai-tharmu chim thimi rapne lhangaimak thimi rapbei phabomthuk tantiya phabine kleikhi yaolei; heirou lhangaimak thimi rapne lhangai-tharmu chim thimi rapbei phabomthuk klahmanya phakurkhi leilei. Keiyei kyunri, awakhi karshukmakei lhouthil.

¹⁵ Ngam heineri keiyei yunkniri, nungkngaine langthouwalo, kouweiyo toulanungri, thimi khatne tlaipangpalla chabi-maibi nungkngaine leikurya duiyei lhangairi dei koukhatkhi mak; ngamri heinaksi nungwaikur nimakne ani tlaipangra lepcha ringbi leikhoueinung Dunpune anungei piwurkhou hutthulri heiwariya.

Dunpuei Touwurkhou Rapya Kane Muphachangmak

¹⁶ Tlaipang kinniyei daakra thukbi klei lhouthukrap nammaya mulhaknanungei raphakhou; heirou tlaipang thimi rapne ip-neikhi naimakne lhou kalni churbi-pangbi kleiya munanungei thiphakhou.

¹⁷ Heirouri keine Dunpuei touthutkur lhourap nammakhi mulhakwurla. Heineri tlaipang kinniyei daakra kou touwurkhouwo touri tlaipang thimi hukhatnekhi muchangmaklei. Tlaipang thimi rapne ipkhi-neikhi naimakne kalthi thipha-holphabikhi, heirapya yani rapha'muchang'makrou; heirou roushing klei thimine, ‘Keine mulei’ toubi yunbinekhi, heirapya ane raphathut manemakrou.