PAOCHIL 7 - KHYINGEI PU'TLOU Bible (BSI)

Roushingle Yuntlungmak Lhoule Marhilkna.

¹ Lhangaiyei mincha heiwane khrim muiknam shirekya duine lhangai; napung khatya puknei tlainiyari hinei tlainine dui lhangai.

² Hakrao-nungkngaiyei chaak khaangna cheemra wachangnung'tlimri, kanrelne chapna cheemra wachangpini dui lhangai; ngamri khi heiwane tlaipang thimi khatdei hungdongna: awari ringbi klei thimirap nammani ningmubom thuk.

³ Langthoubi laonung tlimri lhawai klahne kanrilni lhangai; kouweiyo toulanungri, lhawai klahyei mairungni ukningra nungwaikyer.

⁴ Roushing klei thimiyei solungri kanrilna cheemra klei, heiya yuntlungmak thimi rapbei ukningri langthouna cheemra klei.

⁵ Yuntlungmak thimiyei shei sakya ningnung tlimri, roushing klei thimiyei samlhakwurbi shunmatukur tlouya ninglhakne dui lhangai.

⁶ Yuntlungmak thimi rapbei klaori anphu myurei thru khribdeekbi tomphopkur heinaksilei. Heirapkhi karshukmakei lhouthil.

⁷ Kouweiyo toulanungri, marhotpilanungri shingkhei thimikhi pongurlei; heirou tuy pichawurla'nungri ukningkhi lehni hollurlei.

⁸ Lhouthuk nammaei yenyounayari hungdongnarani dui lhangailei. Ukningra tangchanung tlimri ukning khnimni kanthram kheini dui lhangai.

⁹ Khrangni malungkhatermak; kouweiyo toulanungri malungkhaternei lhouri yuntlungmak thimi rapbei youkna lhou.

¹⁰ Nangni, ‘Angtu chaanyei tlaini rapyari youkur chaanyei tlaini rapne duine lhangairi koutouneiyo?’ toubine ngaithimaka. Kouweiyo toulanungri, nangne heinaksi tlouya ngaithikur heiwari roushing kleiyei tlouri nimak.

¹¹ Roushingo touri cheem-keiya duine lhangai; roushingri tlaipang kinniyei daakra ringbi klei thimirap nammanungei lhangai.

¹² Heirou roushingei karshuknari tuyyei karshuknaya duilei; heirou roushingei karshuknari roushingya loulhakur thimiyari heiwane aya kalpirou.

¹³ Dunpuei touwurkhou lhou rapya ningthutlak; heirou Ane karkutni sheemwurkhou heiwaya huni touyengchangrou?

¹⁴ Rongchanni lhangaiyei kalnungri nungwaiwurlak, heiya rongchanni klah-mrimyei kalnungri ningthutlak: Dunpune khintamrek heiwaya khatkhi-khatkhi sheemkhou. Heineri tlaipang thimine hiwurhillouri kou hungthuko touri ani mumaklei.

Tharmu Chim Thimikhi Karbilne Ringchangmaklei.

¹⁵ Keiyei karshukmakur rongchan arou keine khintamrek muwurkhoula: Tharmu chim thimikhi tharmu chimmei lhouya touthothone heisi maangurlei, heirou tharmu chimmak thimine tharmu chimmakei lhouya touthotho heisi pulchine paalbine leilei.

¹⁶ Tharmu chim duiyatchakhi toumak, heirou roushing shing'duiyachakhi toumak; kouya tounanungei neitamya toumangnarou?

¹⁷ Duiyei khril lhangaimakhi toumak, heirou duiyei yuntlungmakhi toumak; kouya tounanungei neiyei roshukne tlungbongnung hirouwo?

¹⁸ Nangni lhoukhat touyeinung deira lamchokmakne heiwarou heisi toukurni lhangai; kouweiyo toulanungri, Dunpuya chi-rikraine lhou toulanungri lhou khintamrek touthutchangrou.

¹⁹ Roushingni shingkhei thimi khatya khukarthil rillei klei mantrang yama-uparap napung chipyakhi duine mantrangyerlei.

²⁰ Tanghakneri, tlaipang doura borh tekkhi toumakne kheenser-lhaserrou lhangai-tharmu chimmei lhoutou thimiri hukhatkhi yaomaklei.

²¹ Miyei kyun tlouweimkhei louninglhakmak, nimanungri neiyei shokniya rampha neiya manchoni kyunkhi leirou.

²² Kouweiyo toulanungri, nangnekhi mideiya thuithine manchowurkhou leiyarou touri nangne ningmulei.

²³ Keine heirap nammaya keiyei roushingne martambine thiwurchila, heirou keine kyun: ‘Keikhi roushing klei thimi hoinilei,’ heiya roushing heiwari keirouwei tlatni leiyura.

²⁴ Koukouwei roushing hoi kya, heirapri tlatni leiyura; heirou khyukni leilei; heiwari hunikhi raphathutchangmaklei.

²⁵ Heisitoubi keiyei ukning-solung namma pilhakbi roushingya phananungei raphakhou, heirou tlaipangei putlim rapbei ngamya mulhaknanungei thiphabi martamchakhou; heirou yuntlungmaknei lhangaimak heirou pangnei kngao dawurnei ngam rapya raphathutnanungei thilhakbine raphakhou.

²⁶ Heiya keine raphaleiyen khiyakhi duiyei thuithikur napuiya rapya keine raphamulei, heirou yai ukning rapri chang kamyakhi duine thuithilei; heirou yaiyei hutkhi thirruiya duine mantranglei. Dunpuya chi-rikraine cha thimi rapri yaihutra dalhakmakrou.

²⁷ Paochil thimine yunlei: “Thilak, keine asitoubi raphathutdurla, putlim nammaya mulhaknanungei putlim khatdei doura putlim khatya lhakbangbine raphawurla.

²⁸ Keine heisi rapha-holphanarou dei koukhatkhi phamaklei; heiya keiyei rapha kmuri thimi lishing khatrou tharmu chim napawa khatchatom raphamulei, heiya heirapbei hangrari tharmu chim napuiyari napung khatchatomkhi raphamumaklei.

²⁹ Thilak, keine achatom raphamulei, touri Dunpune thimi rapya tharmu kyaoni kallengne sheemkhou, heiya yaneri lhangaimak lhou tounei lam rapya limlim raphathutbine leiyura.”