PAOCHIL 10 - KHYINGEI PU'TLOU Bible (BSI)

Yuntlungmakne Lhoutounei Mhei

¹ Khrim muiknam mroh shirekra trankhi dalhakura'nungri shirek heiwari chulkhrim namwurlei; heinakrimne, yuntlungmakei lhou beichani roushingle rikrai khrumknaei lhouya kanthrityerwurlei.

² Roushing klei thimiyei solungri chimnara ruichingrou, heirou yuntlungmak thimiyei solungri chimmaknara ruichingrou.

³ Yuntlungmak thimine lamra ranchayei kheenroukhi aiyei khyal yaomaklei; heingammei aiyei rokril thimi kantangnung ari yuntlungmak thimime toubine mutlei.

⁴ Kounakpi Krungni neidoura malungkhame toubine neiyei lhoubomya lakkurkhoubi loudongurmak; ngamri kanthramkhei heiwane lhouthuk namma yentrimyerkur manirou.

⁵ Tlaipang kinniyei daakra Krung raprei youthutkur lhangaimak klal lhourap thakhi keine muwurla.

⁶ Yuntlungmak thimi rapyari chouni mathumbangurla, heiya rikrai khrumkna bomtang thimi rapyari nimnara tangsundawurla.

⁷ Shok rapne sapuk doura tungbine, heirou Krungcha rapneri thleira honi karwaichabi kleiya keine muwurla.

⁸ Huhuni khur utyuklanungri aiyei utyukna khurra dalhakrou; heirou huhuni rapthang phorputlanungri ayari frulni louchikrou.

⁹ Huhuni thlungya phanglanungri thlungtumni nanphopnarou; heirou huhuni heengtum danlanungri heengtumni kalletphopnarou.

¹⁰ Reiha raatmaka'nungri heeng sheyeinung mantrang duine changrou; heirou roushing leiyanungri lhou waichane paangchangrou.

¹¹ Frulya thuini toutebongnung frulni chiklanungri, frulyei thui-ur thimi leinei karshukna makrou.

¹² Roushing klei thimiyei murrei wathukkur tloulhang rapri manklu; heiya yuntlungmak thimiyei maleirei katyunthutkur tloulhang rapne ai'msha aitamya tlumyerrou.

¹³ Yuntlungmak thimiyei tlou rapri yunyounarari yuntlungmak tlou hoirou, heitoubi hungdongnarari khru lhangaimak kyao tloulhangya hungyunthutrou.

¹⁴ Yuntlungmak thimine tlou yunchungrou. Hillouri kou hungthukrouwo touri thimi hunikhi mumaklei; heirou thimi rapne yaihillari kou hungthukrouwo touri hukhatnekhi yunchangmaklei.

¹⁵ Yuntlungmak thimiyei lhoutouri ai'msha aitamya toulah'kna; heitoubi dongwairouri cheemra kallengna lamya ramphakhi tamungbine bibal naimakrou.

¹⁶ O khoram, neiyei ramra douwani krung hoiyanungri, heirou krungcha rapne ningshun manmani chamalip-maimalipbi leiyuranungri kounakei lah'kna!

¹⁷ O khoram, toumane cheemmairei pukkur thimine neiyei krung hoiyanungri, heirou krungcha rapne chalum-mailumnung kheen chani chamaibi, chamalip-mongmalip'nungei nimakne, sharung kallengne roushingei mantrang hoinanungei chamailanungri kounakei likarsui lhangai hoirou.

¹⁸ Yra tuymak thimiri cheem-chishar putkhi tholnimakne nungyui yukchurou; heirou lhou churnimak thimiri cheemni yendeekbi nanphopnarou.

¹⁹ Chaak khaangbi chaamalknari nungkngai, heirou tul mongmalknari ukning thoubaangkna, heiya tuiya leiyanungri lhou namma toukya.

²⁰ Heiyakhi duinara, neicheemra leibine Krungya manthamakne yorchabi yunmak; heirou neiyei rkhum bomtho rilla leibine laldun thimi rapyakhi thuithine yunmak; kouweiyo toulanungri, neiyei yunthutkur tloulhang rapya ramwaa rapne urlouheibi, heirou sha kyao chiwi rapne urlouheibi paotamkur kya.