PAOCHIL 1 - KHYINGEI PU'TLOU Bible (BSI)

Mhei Chanamak Tlaipangei Rongchan

¹ Arapri David'yei chanapawa, Jerusalemei Krung, Paochil napawaei paothutkhou tloulhangrap:

² “Karshukmakei karshukmakthil!” Paochil thimine yunlei. “Namyerwa karshukmakthil! Heirou namyerwa kmangei-kmangthil!”

³ “Tlaipang thimine nungshanapalla klahni thlan ferfer lhou churbineya kouya tungchabi karshukrouwo?”

⁴ Tlaipang chaankhat hungthukbi paalkhourou, heitoubi chaan khatri chawurthurou. Heiya tlaipang thleiri chutnaimakne leithungrou.

⁵ Heirou kinnikhi kulkungrei kathuklei, hanui kulrella yongchipburlei. Aiyei bira khnotni yongchipburbi, hanui karholni kathukthulei.

⁶ Martheene khate lhangrei yukthilei, heitoubi khalu lhangra hanui katmletbi thithulei; heisitoubi martheeni kalleng-kalleng thifletchabi karhilchani aiyei bira hanui yenkallengthulei.

⁷ Kungrap nammani Samadrura yenkunglhaklei, heisiyanungkhi Samadruri kathimkur toukhi naimaklei. Kung rapbei yuine aiyei yenwaiyouna tuynara hanui kallengne youloubi yenkungthulei.

⁸ Tlaipangei lhoulamrap namma heiri lah'knaei lhouthil, heirou tlaipang thimi rapne heiwaya yunthutchangmaklei. Tlaipangei mitlungni thrilthibikhi piltou naimaklei, heirou khnane ninglhakbikhi khnari thimkur toukhi naimaklei.

⁹ Haallei louleikur put rapri hanuikhi heileithueirou, touthutkur lhou rapri hanui kallengne touthudthueirou. Heineri tlaipang Kinniyei daakra put ran touri koukhatkhi maklei.

¹⁰ Thimi hukounak khatne, ‘Thilak, awari ranme!’ toubine yunnungei leileiko? Heiwari bongei youbi bi heirou louleikura.

¹¹ Bongei yenyoukur thukkurkhou lhouthuk rapya ningthutrilmakura; heirou hillei yenchanthungrou kyou thimichaan rapnekhi hungthukrou kyou lhouthuk rapya ningthutkhoumarou.

Khyal-roushingkhi karshukmak

¹² Paochilpu keiri, Jerusalem'ra Israellei Krung hoikhou.

¹³ Heirou keine khyal-roushingya urthutbi tlaipangpal nungthou daakra touthutdurkhou lhouthuk rapya waiknaine raphathutna'nungei holphakhou. Dunpune tlaipang thimiyei chanao rapnungei piwurkhou watlhourap heiri kounakei putkhrit khat hoiyura; heirapne yaya markholkna hoiyura.

¹⁴ Tlaipangpal Kinniyei daakra touthutkur lhourap namma heiri keine muwurchila; thilak, heirap namyerwa heiri karshukmakei karshukmak lhouthillei, martheeya hulbine chanthungcha naksilei.

¹⁵ Karkutkur heiwari touyengchangmakrou; heirou karkulthungkur heiwari kouniroukhi kansherchok yamakrou.

¹⁶ Keitammei solungra ningchabine yunkhou, “Thilak, keimaibongei Jerusalem'ra Krung khoine thrungkhou thimirap namyerouwei keine khyal-roushingra duichilei; heirou keiyei khyal-roushingri chouwura touri keine mulei.”

¹⁷ “Heirou keine roushingei ngamroukhi heirou yuntlungmakei ngamrapkhi rapha-thiphakhou, heirap namma heikhi karshukmakei lhoudiklei, martheeya churmannungei hulchakurnaksilei.

¹⁸ Koungameiyo toulanungri khyal-roushingne katduileiyenri klah-mrimkhi heisi katduirou; heirou shingkhei katduiliyenri lhawai klahkhi katduilhakrou.”