PAOCHA 9 - KHYINGEI PU'TLOU Bible (BSI)

Saul'ne Ukninghung

¹ Kheen beicha Saul'ne Christaei hilthung thimi rapya marhotpi heiri dongkhaiwurbi,

² heirou ane Suipipu rapnung wabi, Damascus'ra kabi Pukhrumna Cheemra wachang yananungei lailik khat mayepinanungei buchakur; heirouri huhune Christaei lhouya hilthungbi louklei yaowanungri, ane yaya manbi, napuiya-napawa naimakne Jerusalem'ra yenruimallengnanung wairangkur.

³ Heitoubi Saul'ne Damascus khukarthil kakarnakkur heirouri, loumuthungmakne nungthou lhangrei kwaar khatne aya karhilne yuk'alkur.

⁴ Heirouri ane thleira kanellhakkur, heitoubi houkhatne aya, “Saul, Saul! Koutounei nangne keiya marhotkurawo?” toubi yukshunya ane loumayekkur.

⁵ “Nangya huweiyo, Dunpu?” toubi ane loukngai. “Keiri nangne marhotbi klei Jesume,” toubi hou heine yukshunkur.

⁶ “Heiya kanthoubi khukarthil heirou wachanga, heitoubi bi heirou nangne kouya tourouwo touri thimi napung-khatne neinungei loushunpirou.”

⁷ Heirou Saul'kou chamalna thimi rapkhi koutlou khatkhi yunchangmakne mayungbi leikur; yanekhi hou heiya loumayek, heiyanungkhi kyun heiri kouweiyo touri ya hukhatnekhi mumakkur.

⁸ Saul'ne thleirei kanthoubi, heirou ane mit mingbine thiyeinungri, koukhatkhi mumakura. Heisitoubi yane aya hutbangra churbi Damascus'ra ruilhakloukhei.

⁹ Tlaini khyumnibil ane mit mumakne leikur, heitoubi kheen heirouri ane koukhatkhi chamaimakne leiwurkhou.

¹⁰ Kheen heirou Damascus'ra min Ananeas toubi ung napawa khat louklei. Ane kar'anyeinung Dunpune anungei, “Ananeas!” toubi ungbi shun. Heirouri ane, “Keiri arou leileime, Dunpu,” toubi loumallangkur.

¹¹ Heirouri Dunpune anungei shun, “Nangne kanthoubi, ‘Lam maryeng’ toubi ungna khullamra wabine, Judas'yei cheemra wachangbi Tarsus'rei Saul toubi ung napawa heiya wangaiphalak. Ane bi heirou shunchabi louleirou,

¹² heirou ane kar'anyeinung, Ananeas toubi ung napawa khatne wachangbi aidoura hut lhangbi, aiyei mit hanui warnanungei shunchapikur heiri ane loumuwurla.”

¹³ Heirou Ananeas'ne loumallangkur, “Thimi kounakne napawa heiyei ngamrou, heitoubi ane Jerusalem'rei klei Neiyei thimi rapnung thuithine touwurbi marhotdurnei ngamroukhi keinungei yunpikur leiyura.

¹⁴ Heitoubi ane Suipipu raprouwei kya loubine Damascus'rakhi Neiya khrumbi klei thimi rapyakhi mannanungei kakurame.”

¹⁵ Heirouri Dunpune anungei shunkur, “Wawalo, ngamri Keine ayari Keiyei watlhou touyernanungei, heirou Keiminya Gentile rapnung, Krung rapnung, heirou Israellei thimirap namyernungkhi muyernanungei toubi Keine khalthutdurla.

¹⁶ Heirou Keihakni anungei mutpirou touri ane Keinung'tlim klah-knang douweirouhui.”

¹⁷ Heisi tounarouri Ananeas'ne wabi, Saul'ne louleina cheemra wachangkur, heitoubi aidoura hut lhangbi ane kyun, “Keiyei teinaowa Saul, nangne bi arounung wayeinung lamra neinungei muyerkur Pu Jesu Ahakpane - keiyakhi bi arounung heiyilpilei. Ane keiya heiyilpikur ari neiya hanuikhi neimit muyerpinanungei heirou Lhawai Khyingne neiya thimyerpinanungei toume.”

¹⁸ Heirouri tallengne Saul'lei mitlungrei thanga-lipnak kerchakhat khoksundakur, heirouri aiyei mit heiri hanuikhi mumanekur. Heirou ane kanthoubi, yui lupkur;

¹⁹ heitoubi ane chamaikur hillouri, ai'msha heiri hanui mantranglhakwurthu. Saul'ne Damascus'ra uklum thimi rapkou tlaini bei leimalnakur.

Saul'ne Damascus'ra Pao-laa Shunthutkur

²⁰ Heirou ane Pukhrumna Cheemra wachangbi, heitoubi Jesuri Dunpuei Chanapawame toubi shunthutpi youkur.

²¹ Aiyei heitoubi kyunya mayekkur thimirap namyerwane ngakurbi yadikni ngaikril, “Jerusalem Khukarthilla Jesuya khrum thimi rapya marhotbi hatkhou napawari heiwari nimakkeiko? Heirou ane bi aroukhi heinaksi lhounung'tlim thimi rapya manbine heitoubi yaya Suipipu rapbei leinara ruilouheinung wachangkur nimakko?”

²² Heiya Saul'lei Pao-laa shunthutkur heiri duine mantranglhakkur, heirou ane Jesuri Messiahme toubi chimya shunmatupikur heiwane thimi rapya chungne malhimlhakkur, heitoubi Damascus'rei klei Jehudi rapne aiyei kyun tlou heiya mallang manemakkur.

²³ Tlaini kounak yenralkur heirouri, Jehudi rapne pulne kartilbine, heitoubi yane Saul'ya hatnanungei raangkur,

²⁴ heiya yai waikrang heiwari anungei shunpikur. Masa-nunghang naimakne yane aya hatnanungei toubi khukarthillei palthungra chakngaakkur.

²⁵ Heiya masa khatnung Saul'lei hilthung thimi rapne aya ruithutloubine, heirou bungkara lhaakbi heitoubi raalpal pura ruifretne manyarsundabi malhetkur.

Saul'ne Jerusalem'ra Hungchang

²⁶ Ane Jerusalem'ra hungchangbi, heirou ruishik rapbei hangra yaonanungei marshikkur. Heiya ya hukhatnekhi ayari ruishik khat hoiyurame touri malungampimak, heirou ya nammane ayari chiwurbi leikur.

²⁷ Heitounarou Barnabas'ne hungbi aya ruilouheibi Paocha thimi rapbei bira ruilhakpikur. Saul'ne kousitoubi lamra chayei kaalnung Upawaya mukurro, heirou koutoubi Upawane anungei shunpikurro tounei ngamrou Barnabas'ne yanung waiknaini yunthutpikur. Saul'ne Damascus'rakhi Jesuei minra krakne Pao-laaya shunthutdurnei ngamroukhi Barnabas'ne yanungei lhangaine yunpikur.

²⁸ Heisitoubi Saul'ne yakou leimalnakur, heitoubi Jerusalem'yei ram karyoune karwaichabi krakne Christaei minra Pao-laa shunthutpikur.

²⁹ Ane Greek tlou kyun Jehudia rapkoukhi tlou yeetrilkur, heitounei ngamrou yane aya hatnanungei wairaangkur.

³⁰ Uklum thimi rapne tlou heiya muwurnarouri, yane Saulya Caesarea'ra ruithutloubine heitoubi aya Tarsusranung malhetkur.

³¹ Heirou asitoubi, Judea'ra, Galilee'ra heirou Samaria'rakhi kheen heiyei kaalnungri Churchrap heiri kyingne leikhou. Heitoubi Lhawai Khyingne trungpinei ngamrou Churchrap heiri duine mantranglhakkur, heirou uklum thimi rapkhi mshing chungduikur, heitoubi Dunpu'yakhi duine rikrai khrumknakhi hoikur.

Peter'ne Lydda'rakhi Heirou Joppa'rakhi Wachangkur

³² Peter'ne ram bi kantangra yenpuichakhoubi, heirou lhoubom khatnungei'tlim ane Lyddarei klei Dunpuei thimi rapyakhi wamurilkur.

³³ Heitoubi bi heirou ane Aeneas toubi ung napawa khatya murilkur, a heiri mnak pangkhat hisundakur thimi hoinei ngamrou kum-chotbil ipna dourouwei chutchangmakne leikhou.

³⁴ Heirou Peter'ne anung shun, “Aeneas, Jesu Christane neiya lhangaiyerpiwurla. Nangne kanthoubi neiyei ipna heiwaya marpillaka.” Heisi tounarouri tallengne Aeneas'ne loukanthoukur.

³⁵ Heirouri Lydda'rei klei thimi raple Sharon'rei klei thimirap nammane aya muwurbi, heirou yane Christaei lhangra kalleklhakbi uklumkur.

³⁶ Joppa'rakhi Tabitha toubi ung napuiya khat louklei, a heiri uklum napuiya khat (Aiyei min heiri Greek tloura Dorcus, touri ‘rchaoshun’ toubi mu'kna). Aichaan heirou lhangaiyei lhouyathil toubi leikhou, heitoubi kanring thimi rapya trungpibithil leikhou.

³⁷ Heirou kheen heinungri a hei nawurbi beicha leikhoubi hikur. Heitoubi aiyei khi'lhung heiri rsilbine cheem shangkai dourei bomthora phneibi loukhoukur.

³⁸ Joppa'yei yulthung heiri Lydda'rouwei heinakbilri tlatrilmak, heirou Joppa'rei klei uklum thimi rapne Peterri Lyddara leileime toubi pao mayeknarouri, yane napawa napung-khniya heimalhetbi, “Kringpibi kaileinara waneyasu” toubi pao shunbi wa'ungyerkur.

³⁹ Heitounei Peter'ne marshikloubine yakou pulne wakur. Heitoubi ane bi heirou wa'tlungkur heirouri, aya cheem shangkaiyei bomthora ruibangloubine, heirou trulmeiwi rapne aya loukar'umphopkur, heitoubi Dorcusni ringei kaalnung yanungei pikhou linglikrap heirou phirul-phishamb rap namyerwa heiya anungei loumutpithotho chapkarhungkur.

⁴⁰ Peter'ne ya namya hilthutdurbi, heirou ane khuklu karthrunchabi shunchakur; heitoubi ane khilhung lhangra kallekbi kyun, “Tabitha, kanthouwalo!” Heirouri Tabitha mit loumingbi, ane Peter'ya munarou kanthoubi ka'omkur.

⁴¹ Heirou Peter'ne aya hutbangra churbine taangkanthoupikur. Heitoubi ane uklum thimi raple trulmeiwikhi kyaone shangkairei bomthora ungbaangbi, yanungei aya khringni shilnakur.

⁴² Pao heiri Joppayei yultlai karyoune mayekyerkur, heisi tounarou thimi chungne Dunpuya uklumkur.

⁴³ Peter'ne Joppa yultlaira an'un thruinei lhouchur napawa Simonle kalhonne aicheemra tlaini kounak leiwurkhou.