PAOCHA 5 - KHYINGEI PU'TLOU Bible (BSI)

Ananeas'le Saffira Yakhunta Shangram

¹ Heitoubi kheen heiyei kalnung Ananeas toubi ung napawa khatkhi aiyei nu Saffira yakhu shangramnikhi yaiyei klei putchei rapya yorkur.

² Heiya yakhu shangramni munne yarilbi putchei yornei tuy heiri tha martleiwurbi heirou deiri paocha rapbei hutra heipilhakur.

³ Heitounei ngamrou Peter'ne kyun, “Ananeas, nangne Satanya naidoura maneyerbi heirou naiyei putchei yornarei phakur tuy heiwaya martleiwurbi Lhawai Khyingei bomra nane mandalkur heiri kousiyabiyo?

⁴ Nane putchei heiya yorbongnungri naiyei hoikhou; heirou nane heirapya yorkur hillouri, tuy heikhi naiyei hoileihuino! Heiyanungri, kousitounei nangne heinaksi mandallei lhouya tounanungei ningchakurawo? Heiwari nangne thimi rapnung mandalpi nimakme - heiya nangne Dunpunung mandalkurme!”

⁵ Heirouri Ananeas'ne kyun heiya mayekle tallengne kanellhakurbi hikur; heirouri pao heiya mayekkur thimirap nammane beimakne chirilkur.

⁶ Heirou kartlanga rapne hungchangbi, aiyei sharung heiya yumphopbi, heitoubi aya khangthutloubi phumkur.

⁷ Heirou pung khyumyei mal hillouri aiyei nu heiwikhi thukkur lhou heiwaya mumakne cheemwaira hungchangnarou,

⁸ Peter'ne anungei, “Keinungei chimni yunpilak, tanghakpane nakhu shangramei putchei yornei man tuy heiri achatomngeiko?” toubi loukngai. Heirouri, “Moi, achatomngei,” toubi ane loumallangkur.

⁹ Heirouri Peter'ne anung shunkur, “Kouya tounei nakhu shangramni Dunpuei Lhawaiya malhimnara dayernanungei ningchakurawo? Neishalya khi-krui kartlanga rapri shumtrumra mayungbi leileihui, heirou yane neiyakhi heinakrimne urthutlourou.”

¹⁰ Heisi tounarouri tallengne akhi Peter'rei ho pongra kanellhakbine hikur. Heirou kartlanga rapne hungchangei'nungri a hei louhiyura, heitoubi yane ayakhi khangthutloubine ai'shalwaei pongra phumkur.

¹¹ Pao heiwaya mayekkur Church nammane heirou thimi deinekhi beimakne chirilwurbi leikur.

Mideine Toumanemak Heirou Kngakkei Lhourap

¹² Paocha thimi rapne thimi deine toumanemak lhourap, heirou kngakei lhourap kounakya thimi rapbei maibongra touwurkhou. Kheen heirouri uklum thimirap nammane Solomonyei yuntlangmaira kartilbine murilkur.

¹³ Heirou yaihangra yaothungmak thimi rapne yayari beimak choune mathangpikur, heisiya hoiyanungkhi yai hangrari ya hukhatkhi wayaothungammak.

¹⁴ Heiya Dunpuya uklumkur thimi rapne - napuiya rapne heirou napawa rapnekhi wachangbi thang'thangni thimi mshing chungduilhakur.

¹⁵ Paocha thimi rapbei lhou touthutkur heiyei ngamrou, kna thimirap kounakyakhi yaiyaiyei ipna khumdoura neiyerbi, lamruira phneibi, Peter'ne yenralyeinung yaidoura aiyei lhimthilla'nungkhi dayernanungei toubi loumathrumkhou.

¹⁶ Heirou Jerusalem khukarthil karhillei klei yulthung rapbei thimi rapnekhi kna thimi kounakya, heirou yairilla lhangaimak lhawai klei thimirap kounakyakhi heiruilhakbine, ya namyerwaya kna raiyerkur.

Paocha Thimi Rapya Klah-knang Pikur

¹⁷ Heitounei ngamrou Suipi pule heirou aiyei palui raple, heitoubi yulyullei Sadducee rapne, Paocha thimi rapbei doura beimakne horthikur; heitoubi yane paocha thimi rapya manbi chuiyernanungei tlou darilkur.

¹⁸ Heisitoubi yaya manbi kulrilla chalphopkur.

¹⁹ Heiya heineyei masanungri Dunpuei Thangringne kullei cheemkhar rapya latpiwurbi, paocha thimi rapya pura ruithutpikur, heitoubi yanungei shun,

²⁰ “Nane Pukhrumna Cheemwaira wamayungbi, heitoubi thimi rapnung khring chaanyei ngamrou marnopilak.”

²¹ Paocha thimi rapne kyun heiwaya chanthungkur, heitoubi ningshun kulkayei kheen heirou yane Pukhrumna Cheemra wachangbine marnopikur. Heirou Suipi pune aiyei palui raple pulne murilbi Jehudiyei uparap nammaya ungbi Yama-krung kartukkur; heitoubi yane chay piwurbi, Paocha thimi rapya kullouwei urthutbi yai maibongra yenlhaknanungei thimi malhetbi wa'ungyerkur.

²² Heiya ungrou kwa thimi rapne kulla wa'tlungei'nungri, yane paocha thimi rapya kulrilra wamumakkur, heitounei ngamrou yane yenkallengbi Yama-krung rapnung hungshunpikur,

²³ “Kane kulla wa'tlungei'nung kullei cheemkhar rap heiri hang rotbi, heitoubi heiya kngaak thimi rapkhi namyerwa louklei kane wa'kmu; heiya kane cheemkhar latbi thiyeinungri, rilwairari thimirap hukhatkhi louklei mumak!”

²⁴ Heirou Suipipu raple Pukhrumna cheem kngaak rapbei upa rapne pao heiya loumayeknarouri, Paocha rapbei doura thukkur lhou heiyei ngamrou yane beimakne ngakkur.

²⁵ Heirouri napawa napung khatne wachangbi yanungei washun, “Thilak! Nane kulrilla chalphopkhou thimirap heiri Pukhrumna Cheemra thimi rapnung marnopibi leileime!”

²⁶ Heitounei ruipipu heiwane aiyei thimi rapkou wawurbi heitoubi paocha thimi rapya yenruimallengkur. Heiyanungkhi yane nambiri ruimak, ngamri thimi rapne yaidoura thlung khingrou marbubine ningchikur.

²⁷ Heitoubi yane paocha rapya rilwaira urlhakbi, heirou yaya Yama-krungei maibongra mayungyerkur, heitoubi Suipipu Upawane yanungei tlou kngai,

²⁸ “Kaneri naya napawa heiyei minra thimi rapnung marnopimak'nungei tlousher piwurkhou nimaka?” toubi ane kyun, “Heiya nane koutoukurawo thilak! Jerusalem karyoune tlou heiwaya nane marnopiwurbi, heirou napawa heiyei ngamrou nane kai doura klal dayernikurrako?”

²⁹ Heirou Peter'le paocha thimi deirapne loumallangkur, “Kari thimi rapbei kyunya nimakne Dunpuei kyunya chanthungrou.

³⁰ Naneri Jesu'ya heeng karbakra thirmsuini hemphopbi hatkur hillouri, kaiyei nutar-patar rapbei Dunpune Ayari khirouwei ringthutyerkur.

³¹ Israel thimi rapya ukning hungyerbi, heirou yaiyaiyei borhya kukpi phayernanungei toubi, Dunpune Aya ringthutyerbi yaiyei Kalpipu heirou Ruipipu hoiyerwurla.

³² Heirou kari lhou heinung'tlim - Dunpune kanungeile heirou Aiyei shunya kning thimi rapnung hutthul khoine pikur Lhawai Khying heinekhi mitne mubi tlou mayungpi thimirap hoileime.”

³³ Yama-krung rapne kyun heiwaya mayeknarouri meithukne malungkhakur, heirou yane paocha thimi rapya hatnikur.

³⁴ Heiya yaihangrei minri Gamalial toubi ung, Lhangai marnopi pukhi hoikhou heirou thimi rapne ayari choune rikrai khrumkna napawa heiwane Yama-krung rapbei hangrei katmayungbi, Paocha rapya dangra lepcha wathukrina'nungei chay pikur.

³⁵ Heitoubi ane Yama-krung rapnung shun, “Kei palui Israelrap, nane heinaksi thimi rapnung toupikur heiwari mukheine toulak.

³⁶ Heitoubi maibongrakhi thukkurkhou lhou khatya nane ningthutlak, touri Theudas'ne pothutbi aitamtomya tangyerninei ngamrou marnopinarou, thimi macha phaliyei'mal aihilla chanthungkur. Heiya ayari hatdurbi aihil chanthungkhou thimirap heiri trukchekkur, heirouri aiyei kanyerkhou lhourap heiri yentrimkur.

³⁷ Heihillou hanuikhi Galilee'rei Judas'ne thimi mshing mayebaangna kum heirou hungthukbi, thimi kounakya aihilla chanthungyernanungei ungmarkumkur, heiya ayakhi hatdurpi, heitoubi aihilla chanthungkhou thimirap nammaya hulchekurpithu.

³⁸ Heinakrimne keine nanungei yunpirou, nane anaksi thimi rapbei doura chuiyernanungei lhou koukhatkhi toupimaka. Yayari malhetdurlak! Yane tlaipang thimiyei kningne, heirou yaitamne wairangbi touthutkur hoiyanungri, heirapri yenmangeirou,

³⁹ heiya heinak rapri Dunpurei kyong hoiyanungri, nane kouniroukhi yayari manekhoumakrou. Nari naitamtom Dunpukou kngaalnaksi darou!” Heirou Yama-krung rapne Gamalial'yei shunmatupikur heiwaya chanthungkur.

⁴⁰ Heitoubi yane Paocha thimi rapya rilla unglhakbine, heitoubi yaya ummurbine, Jesuei minra hanui kallengne marnopimak'nungei tlousher pikur, heitoubi yaya malhetkur.

⁴¹ Heirouri Paocha thimi rapne Yama-krung rapbei maibong'rouwei wathukkurle, yari beimakne haraokur, kouweiyo toulanungri, yane Jesunung'tlim klah-knang douwurnei ngamrou Dunpune yaya kringpikur.

⁴² Heirou tlainiserrei yane Pukhrumna Cheemrale, thimi rapbei cheemrakhi Jesuri ‘Messiahme’ tounei ngamrou Lhangaiyei Pao-laaya shunthutpikur.